Sameela Maxaafaa Koiruwaa 2:2-27

²GODAA mala geeshshi issoinne baawa; a mali issoinne baawa. Nu Xoossaappe attin, hara attiyo wogga Zaalli baawa.

³“Otoro haasayaa aggite; otoro qaalai intte doonaappe kiyoppo. Aissi giikko, GODAI eriya Xoossaa; asa ooso i yiggi xeellees.

⁴“Olanchchatu wonddafee meqqiis; shin xubettidaageeti wolqqaa gixxidosona.

⁵Kalli uttidaageeti namisettidi, qumau keraa oottoosona; shin namisetti uttidaageeti ha77i kallidosona. Mainiyaa laappun naata yelaasu; shin cora naata yelidaara daafuraasu.

⁶“GODAI woreesinne pattees; qassi i duge Si7ooliyan yeggeesinne pude kessees.

⁷GODAI manqqetteesinne dureyees; qassi i ziqqisseesinne xoqqissees.

⁸I hiyyeesata buhiyaappe denttees. Metootanchchatakka bidinttaa pituwaappe denttees; denttidi eta halaqatuura utissees; eta bonchcho araataa laatissees. “Aissi giikko, biittaa baasoti GODAASSA; i eta bollan sa7aa essiis.

⁹I Xoossaa asatu gediyaa naagees; shin iitata i xuman co77u oottana. Asi ba wolqqan xoonenna;

¹⁰GODAARA eqettiyaageeti liiqana. GODAI saluwaappe eta bolli dadadan guummana; GODAI sa7an de7iyaageeta ubbaa pirddana. I ba kawuwaayyo wolqqaa immana; i ba tiyidoogaayyo xoonuwaa immana” yaagada woossaasu.

¹¹Hegaappe guyyiyan, Elqqaani Raaman de7iya ba soo biis; shin na7ai Sameeli qeesiyaa Eelappe garssaara GODAAYYO oottees.

¹²Eela attuma naati iita asata; eti GODAA erokkona,

¹³woikko yarshshuwaa immiya asaayyo qeeseti oottiyo wogaa naagokkona. Hegeenne, asi yarshshuwaa yarshshiyo wode, qeesiyaa ashkkarai heezzu achcha birata sirinttaa ekkees; ekkidi ashoi biron porshshishin,

¹⁴doissiyo wogga otuwan woikko keriyan he sirinttaa yeddidi, sirinttai oiqqi kessiyo ai qommo asho gidikkonne efiidi, qeesiyaayyo immees. Yarshsho yarshshanau Seelo yiya Israa7eela asaa ubbaa eti hagaadan oottoosona.

¹⁵Qassi modhdhuwaa yarshshiyoosan xuugganaappe kasetidi, qeesiyaa ashkkarai yarshshuwaa yarshshiya bitaniyaakko biidi, “Qeesee qayye ashoppe attin, doisa asho neeppe ekkenna gishshau, ayyo xiixxanau amarida ashuwaa hamma” yaagees.

¹⁶Yaagin bitanee zaaridi, “Wogaadan qeeseti modhdhuwaa koiro xuuggona; hegaappe guyyiyan, neeni koyiyoogaa ekka” yaagees; yaagikko qeesiyaa ashkkarai, “CHii; taayyo ha77i imma; shin neeni diggikko, taani neeppe wolqqan ekkana” yaagees.

¹⁷GODAU immiyo yarshshuwaa Eela naati karido gishshau, eta nagarai GODAA sinttan keehi dariis.

¹⁸SHin Sameeli na7atettan de7iiddi, liinuwaa giyo kiriyaappe dadettida eefuude giyo maayuwaa maayidi, GODAAYYO oottees.

¹⁹Sameela aayyiyaa laittan laittan guutta qoliyaa giigissada, laittaa yarshshuwaa yarshshanau ba keettaawaara baidda Sameelayyo ekkada bausu.

²⁰Bin Eeli Elqqaananne a keettaayyiyo, “Ne keettaayyiyaa GODAAYYO immido na7aa gishshaa GODAI neeyyo ha maccaasen hara naata immo” yaagidi anjjees; yaatin, eti bantta soo simmoosona.

²¹GODAI Haanno anjjin, shahaarada heezzu attuma naatanne naa77u macca naata yelaasu. Na7ai Sameeli GODAA sinttan dicciis.

²²Eeli keehippe ceeggiis. A naati Israa7eela asaa ubbaa bolli oottido ubbabaanne qassi Xoossaa Dunkkaaniyaa penggiyan GODAAYYO oottiya maccaasatuura zin77idoogaa siyiis.

²³Siyidi eta, “Intte hagaa malabaa aissi ootteetii? Intte iita oosuwaa taani asa ubbaappe siyais.

²⁴Ta naatoo, hagaa aggite; GODAA asai inttena giyoobaa taani siyidoogee lo77obaa gidenna.

²⁵Issi asi asa naaqqikko, Xoossai au gaannatana; shin asi GODAA naaqqikko, oonee ayyo gaannatanai?” yaagiis. GODAI, “Taani eta worana” giido gishshau, eti bantta aawaa seeraa siyennan ixxidosona.

²⁶Na7ai Sameeli GODAA sinttaaninne asaa sinttan dicciisinne sabettiis.

²⁷Issi gallassi Xoossaa asi Eelakko yiidi a, “GODAI hagaadan yaagees; ‘Ne maizza aawai Aarooninne a so asai Gibxxen kawuwaa ailletettan de7iyo wode, taani etayyo qonccaas.