1 SAMUEL 2:2-27

²Ta dia helaḡa Iehova heḡereḡerena, asi dirava ta, oi mo sibomu, asi nadi-gini ta emai Dirava heḡereḡerena.

³Heaḡi herevadia basio gwaurai lou, hekokoroku herevadia na udumu amo basie lasi; badina be Iehova na aonega Diravana, ia ese kara iboudiai e hahetohodiamu.

⁴Goada taudia edia peva e hakwaidudiamu, a manoka taudia na goada e hariolaimu.

⁵Bogadia e kunuva taudia na aniani idavalaina ḡaukaradia vada e kara, a e hitolodiava taudia na edia hitolo vada e doko. Gabani hahinena ese natuna hahitu vada e havaradia, a natuna hoho e havaradia hahinena na vada e dabu.

⁶Iehova ese e healamu bona e hahemaurimu; mase taudia edia gabu ai e hakaudia dihomu bona e hakaudia daemu.

⁷Iehova ese taunimanima na e ha-ogoḡamidiamu bona e hataḡadiamu; e atodia dihomu bona e abidia isimu.

⁸Ogoḡami tauna na ḡahu amo e abia isimu; e dabumu tauna na kahu e negeamu gabuna amo e abia daemu; lohia ida e hahelaidiamu, bona helai ḡauna hereana e henidiarnu. Badina be tanobada dudia na Iehova ena, idia latadiai ia ese tanobada vada e hadaia.

⁹Ia ese ena helaḡa taudia aedia baine gimadia, a kara dika taudia na dibura ai baine negedia daure; badina be dia goada amo tau ta baine kwalimu.

¹⁰Iehova inaina bae hehuari kohi; ia ese guba baine harahurahu henidia. Iehova ese tanobada dokodia baine hahemaoro henidia; e duanaia pavapavana na ia ese goada baine henia, bona e horoa tauna na ia ese ena siahu baine habadaia.

¹¹Una negana ai Elkana na Rama e lou lao. A hari mero na Iehova isiaina e lao heniva, hahelaḡa tauna Eli vairanai.

¹²Eli natuna na lebulebu taudia; idia ese Iehova asie matauraia.

¹³Hari hahelaḡa taudia edia kara taunimanima ediai na iniheto. Tau ta ena boubou ḡauna e mailaia negana ai, hahelaḡa tauna ena hesiai tauna na ema, vamu dounu e naduava negana ai, diniga mai matana toi na imana ai e abia;

¹⁴bena oburo eiava uro eiava tohe eiava keikei lalonai e kodoa dobi, bena hari diniga amo e kodo isi ḡaudia iboudiai na hahelaḡa tauna ana. Israel taudia iboudiai na Silo ela negadia ai na unu e karadia tomava.

¹⁵Ma ina danu: digara do se haḡolea oho negana ai, hahelaḡa tauna ena hesiai tauna na bema mai, boubou ḡauna e mailaia tauna bema hereva henia, bema toma, Vamu taina na hahelaḡa tauna ba henia, baine gabua; badina be o naduamu ḡauna na oiemu amo basine abia, kasirina mo e uramu.

¹⁶Bena una tau bema toma “Mani digara bae haḡolea oho guna, bena emu ura heḡereḡerena bavabia”, ia na bema haere, bema toma “Lasi, harihari ba henigu; bema lasi, lau ese baina dadihaia”.

¹⁷Taunabunai, hari eregabe edia kara havara na bada herea Iehova vairanai; badina be idia ese Iehova ena ihaboulaina ḡaudia na asie matauraidia.

¹⁸Hari mero Samuel ese Iehova isiaina e lao heniva. Ena hahedoki helaḡana na dabua aukana amo e karaia.

¹⁹Laḡani ta ta amo sinana ese ena hahedoki maraḡina ta e turia, bena e laohaia, e henia, adavana ida laḡani boubouna ihahelaḡana totona ela negana ai.

²⁰Unu negadia ai, Eli ese Elkana mai adavana ida e hanamodia, eto, Iehova ese natumu na ina hahine ena amo baine henimu, ina mero na Iehova vada o henia davana. Bena idia na edia ruma e lou lao.

²¹Iehova ese Hana e vadivadi henia; bena e rogorogo, natuna haida e abidia, memero tatoi bona kekeni rarua. A Samuel na Iehova vairanai e bada oho bada oho.

²²Eli na vada e buruka herea. Ia ese natuna mamaruanedia edia kara iboudiai, Israel taudia iboudiai e kara henidiava karadia, na haridia e kamonai. E kamonai danu, idia na hebou kalagana iduarana ai hesiai karadia e karava hahinedia ida e eno bouva.

²³Bena ia ese e gvvau henidia, eto, Dahaka dainai ene kara o karamu? Emui kara havara haridia na taunimanima iboudiai edia amo na kamonaimu.

²⁴Lasi, natugu, Iehova ena orea taudia e hapiuamu sivaraina na dia namo.

²⁵Tau ta ese tau ta baine kara dika henia, Dirava ese baine hahemaoro henia; a tau ta ese Iehova baine kara dika henia, daika ese baine hamauria? A idia ese tamadia erena na asie kamonai; badina be Iehova ena ura na baine aladia mase.

²⁶Samuel na e bada oho bada oho; Iehova bona taunimanima edia uraheni ienai e bada e laova danu.

²⁷Una negana ai Dirava ena hesiai tauna ta be Eli dekena ela, e hereva henia, eto, Iehova na ini e gwau tomamu: senemu ena iduhu taudia na hahedinarai henidia, Aigupto ai Farao mai ena orea taudia ida isiaidia e lao heniva negana ai.