1. Samuel 2:2-27

²Esap wor eman mi pin usun ewe Samol mi Lapalap, esap wor eman lükün i, esap pwal wor eu achau usun ach we Kot.

³Ousap chüen fos lamalamtekia, kapasen tunesikesik esap chüen towu seni lon awemi. Pun ewe Samol mi Lapalap eman Kot mi silei mettoch meinisin, i a apwüngü än aramas meinisin föför.

⁴Nöün ekewe sounfiu mi pwora föün esefich ra kup, nge chokewe mi mwatötö repwe pöchökülela.

⁵Iwe, ekewe mi pisekisek me mwan ra chon angang fän iten ener mongö, nge ekewe mi echik me mwan resap chüen echik. Neminewe mi rit a nöüni füman, nge neminewe mi wor chomong nöün a aleman.

⁶Ewe Samol mi Lapalap a niela aramas, a pwal amanaueer, a atolonga aramas lon lenien sotup, a pwal amanaueretä.

⁷Iwe, ewe Samol mi Lapalap a föri pwe aramas repwe wöüngau, a pwal föri pwe repwe pisekisek, a atekisona aramas, a pwal atekiaretä.

⁸A aütai ekewe chon wöüngau seni lon pwül, a ekiewu chon mwelele seni lon ewe ioien falang, a amoteer ren ekewe samol o alenier won än chon iteföüla lenien mot. Pun ekewe longolongun fanüfan än ewe Samol mi Lapalap. I a aüetä fanüfan wor.

⁹Iwe, a tümwünü manauen nöün kewe mi allükülük, nge ekewe chon föföringau repwe mäla lon rochopwak. Pun eman aramas esap win ren püsin an pwora.

¹⁰Ekewe chon ü ngeni ewe Samol mi Lapalap repwe rosola. Kot epwe apüngätiu chopulap wor seni lon läng. Ewe Samol mi Lapalap epwe apwüngü unusen fanüfan, epwe ngeni nöün king pöchökül o awinna nöün we mi kepit.”

¹¹Mürin, Elkana a liwiniti lenian lon Rama. Nge ewe ät a nonom lon Silo o angang ngeni ewe Samol mi Lapalap fän emwenien ewe souasor Eli.

¹²Nge nöün Eli kewe mwän ra aramasangau. Resap meniniti ewe Samol mi Lapalap,

¹³resap pwal föri pwüngün wisen ekewe souasor me ren ekewe aramas. Are eman mwän a eäni asor eman mönün asor, nöün ewe souasor chon angang epwe feito fän efoch fok mi ülükeang, lupwen ewe fituk a chüen kuk,

¹⁴o chüralong ewe fok lon ewe pan ika pakku ika kama ika nape. Nge meinisin mine a pachetä won ewe fok, ewe souasor epwe angei pwe ochan. Iei usun ra föri ngeni ekewe chon Israel meinisin mi feito Silo.

¹⁵Nge nöün ewe souasor chon angang epwe pwal feito me mwen kirisin ewe mönün asor epwe kek o üreni ätewe mi eäni ewe asor, “Kopwe ngeniei fituk fän iten ewe souasor pwe epwe furainei. Pun esap mochen ochoch senuk fituk mi kuk, pwe fituk mi amas.”

¹⁶Nge are ewe mwän epwe üreni, “Witi mwo ekis, pun ewe kiris epwe akom le kek, mürin kopwe angei ükükün om mochen,” ewe chon angang epwe apasa, “Apwi, kopwe chök ngeniei iei, nge are kosap mochen, üpwe chök angei fän pöchökül.”

¹⁷Iei usun än ekewe alüal tipis a fokun wattela me fän mesen ewe Samol mi Lapalap, pun ra turunufasei ewe asor ngeni ewe Samol mi Lapalap.

¹⁸Nge ewe ät Samuel a angang fän mesen ewe Samol mi Lapalap. A üföüf echö üf itan efot seni mangaku mi pwechepwech.

¹⁹Iwe, inan a tei fän itan echö kükün owokot o uweetä ren iteiten ier, lupwen a eti pwülüan we le feitä pwe epwe eäni ewe asor mi fis iteiten ier.

²⁰Eli a afeiöchü Elkana me pwülüan we o apasa, “Ewe Samol mi Lapalap epwe fang ngonuk noum me won ewe fefin fän iten ätewe a fangala ngeni ewe Samol mi Lapalap.” Mürin ra liwiniti lenier.

²¹Iwe, ewe Samol mi Lapalap a afeiöchü Hana, iei mine a pwal wor ülüman nöün ät me ruoman nengin. Nge ewe ät Samuel a mämäritä o föri an angang ngeni ewe Samol mi Lapalap.

²²Iwe, Eli a fokun chinlap. A rong meinisin usun mine nöün kewe mwän ra föri ngeni chon Israel meinisin, pwal usun ar kon ren ekewe fefin mi angang leasamalapen ewe imwenfel seni mangaku.

²³Iei mine a üreniir, “Pwota oua föri ekei sokun föför? Pun üa rong seni ekewe aramas meinisin usun ämi föför mi ngau.

²⁴Nei mwän, oupwe ükütiu le föri ei sokun föför. Pun mine üa rongorong seni nöün ewe Samol mi Lapalap kewe aramas ra apworausafetalei, esap eu pworaus mi öch.

²⁵Are eman aramas a tipis ngeni eman aramas, Kot epwe aför lefiler. Nge are eman aramas a tipis ngeni ewe Samol mi Lapalap, iö epwe tüngor fän itan?” Nge ekewe alüal resap aüselinga alon semer we, pun a fen letipen ewe Samol mi Lapalap pwe epwe nirela.

²⁶Nge ewe ät Samuel a mämäritä lon löllön o küna ümöümöch me ren ewe Samol mi Lapalap pwal me ren aramas.

²⁷Iwe, eman aramasen Kot a feito ren Eli o üreni, “Iei alon ewe Samol mi Lapalap, ‘Üa püsin pwäriei ngeni om we lewo Aaron, lupwen i me chon leimwan ra nom Isip fän nemenemen Farao.