Samuweli I 2:2-27

²Alatala xa sɛniyɛnyi maniyɛ mu na. Ala gbɛtɛ yo mu na, bafe a tan na. Sɛnbɛma yo mu na alɔ won Marigi Ala.

³Wo naxa wo yɛtɛ igbo, na wɔyɛnyi mɔɔli naxa mini wo dɛ i, barima Alatala, Ala nan a ra naxan fe birin kolon, naxan mixi xa wali birin maniyama sikeeli ra.

⁴Gereso sɛnbɛmae xa xali igirama nɛ, kɔnɔ yɛtɛ magoroe sɛnbɛ sɔtɔma.

⁵Naxee singe nu lugaxi, nee nu walima nɛ alako e xa taami sare sɔtɔ, kɔnɔ naxee nu kaamɛxi, nee tan bara wasa. Ginɛ dibaritare di solofere barima nɛ, kɔnɔ dibari bara findi dibaritare ra.

⁶Alatala nan mixi faxama, a tan nan mixi baloma. A mixi rasigama aligiyama, a tan nan mixi rakelima faxɛ ma.

⁷Alatala nan keren mixi rabannama, a tan nan mixi rafuxarima. A mixi itema, a tan nan mixi igoroma.

⁸A misikiinɛ bama a xa setareɲa kui, a niya a xa dɔxɔ kuntigie tagi binyɛ ra. Alatala nan gbe na duniɲa tunxunyie ra, a bɔxi italaxi e tan nan fari.

⁹A ɲɔxɔ sama nɛ a batulae ɲɛrɛ ki xɔn ma, kɔnɔ mixi kobie tan lɔɛma nɛ dimi kui. Mixi yo mu geenima a yɛtɛ sɛnbɛ ra.

¹⁰Alatala matandilae xa fe kanama nɛ. Galanyi bulama e tan nan xili ma. Alatala bɔxi birin makiitima nɛ. A sɛnbɛ fima nɛ a xa mangɛ sugandixi ma, a fa a xa Masiihu sɛnbɛ gbo.»

¹¹Na dangi xanbi, Elekana naxa gbilen a xɔnyi Rama. A naxa a xa di Samuweli lu Alatala xa wali ra Eli sɛrɛxɛdubɛ fɛ ma.

¹²Fuyante nan nu na Eli xa die ra, naxee mu nu birama Alatala fɔxɔ ra.

¹³Yi sɛrɛxɛdubɛe nu walima yi ki nɛ ɲama ra: Mixie to nu fama sɛrɛxɛ bade, e nɛ sɛrɛxɛ sube ɲinma, sɛrɛxɛdubɛ xa walikɛ nu sube sɔxɔse belebele

¹⁴ragoroma nɛ tunde kui, xa na mu se ɲin se gbɛtɛ kui, a nu naxan yo sɔxɔ, a a rate, a na soma sɛrɛxɛdubɛ nan yi ra. E nu na mɔɔli rabama Isirayilakae birin na naxee nu fama Silo.

¹⁵Waxati ndee beenun xuruse ture gan tɛmui xa fɔlɔ, sɛrɛxɛdubɛ xa walikɛ nu a falama nɛ sɛrɛxɛ kanyi bɛ, «Beenun i xa na sube gan, i xa nde so n yi ra sɛrɛxɛdubɛ bɛ. A mu wama sube ganxi xɔn.»

¹⁶Xa sɛrɛxɛ kanyi a yaabi, «A lanma ture xa gan sinden. Na dangi xanbi, i na wa naxan xɔn, i xa na tongo.» Sɛrɛxɛdubɛ xa walikɛ nu a yaabima nɛ, «N tondi. Xa i mu tin, n a tongoma sɛnbɛ nan na.»

¹⁷Na kui, Eli xa die nu yunubi ɲaaxi nan sɔtɔma Alatala ra, barima e mu nu binyɛ yo saxi sɛrɛxɛe ma naxee nu bama a bɛ.

¹⁸Samuweli nu Alatala xa wali rabama nɛ, donma kuye sɛrɛxɛdubɛ daaxi ragoroxi a ma.

¹⁹Ɲɛ yo ɲɛ a nga nun a baba nu fama Silo sɛrɛxɛ bade. A nga nu a sanbama guba di ra.

²⁰Eli nu Ala maxandima nɛ Elekana nun a xa ginɛ bɛ a falafe ra, «Alatala xa a ragiri i xa ginɛ xa di gbɛtɛe bari i bɛ di ɲɔxɔɛ ra a naxan fixi Alatala ma.» Na dangi xanbi, Elekana nun Ani naxa gbilen e xɔnyi.

²¹Alatala naxa hinnɛ Ani ra, a fa di xɛmɛ saxan nun di ginɛ firin bari. Na tɛmui Samuweli nu na mɔfe Alatala ya i.

²²Eli sɛrɛxɛdubɛ naxan nu bara fori ki fanyi ra, a naxa a kolon a xa die nu na fe ɲaaxi rabafe Isirayilakae ra. E nun ginɛ naxee nu wali rabama hɔrɔmɔlingira sode dɛ ra, e nu yɛnɛ rabama nee yɛtɛ yati ra.

²³Eli naxa a xa die maxɔrin, «Munfe ra wo yi mɔɔli rabama? Ɲama birin wo xa wali kobi nan falafe n bɛ.

²⁴N ma die, wo xa ba na mɔɔli rabafe. N naxan mɛfe wo xun, a mu fan feo. Wo Alatala xa ɲama ramurutama nɛ a xa sɛriyɛ ma.

²⁵Xa mixi yunubi raba a boore ra, Ala nan a makiitima, kɔnɔ xa mixi sa yunubi raba Alatala ra, nde xari sama na kanyi bɛ?» Kɔnɔ Eli xa die mu tin e tuli matide e baba ra, barima Ala sago na nu a ra e xa faxa.

²⁶Na fonike Samuweli nu na mɔfe a fanyi ra. A nu rafan Ala ma, a nu rafan mixie ma.

²⁷Lɔxɔɛ nde namiɲɔnmɛ nde naxa fa Eli yire, a a fala a bɛ, «Alatala xa masenyi nan ya: N mu n yɛtɛ masen xɛ i benbae bɛ Misira, e nu na Firawuna xa yaamari bun ma tɛmui naxɛ?