1 SAMUEL 2:2-27

²Amo aqui seyoc cati tatzejtzeloltic quej ta, TOTECO. Amo aqui seyoc Dios. Amo aqui seyoc cati hueli temanahuía quej ta, san Toteco Dios tiiyojtzi.

³Amojuanti anmasehualme, amo ximohueyimatica. Amo xicamanaltica chicahuac. Amo ximotepanitaca. Pampa TOTECO san yaya Dios cati nochi quimati. Yaya amechtajtolsencahuas ica cati anquichihuaj.

⁴Tiquinfuerzajcuilía cati yolchicahuaque, huan tiquinyolchicahua cati amo quipiyaj fuerza.

⁵Masehualme cati quipixque tacualisti hasta mocahua, ama taijyohuíaj ica mayanti. Huan cati mayanayayaj, ama hasta mocahua inintacualis. Huan nopa sihuat cati amo hueli conepiya, ama ya quinpixtoc hasta chicome iconehua. Huan nopa sihuat cati quinpiyayaya miyac iconehua, ama ayecmo teno quinpiya.

⁶TOTECO, ta titemictía huan ta titemaca nemilisti. Ta titetemohuía campa miquilisti huan ta cati titetejcoltía.

⁷TOTECO, ta tiquinchihua sequij masehualme teicneltzitzi, huan sequij ta tiquinricojchihua. Ta cati titeicnotalía huan titehueyichihua.

⁸TOTECO, ta tiquintanana nopa teicneltzitzi cati itztoque talchi. Quena, tiquintanana cati mosehuíaj campa cuajnexti, huan tiquinhueyichihua para ma mosehuica inihuaya huejhueyi tequichihuani. Quena, TOTECO tiquinchihua ma mosehuica campa más onca tatepanitacayot. Pampa ta cati más tihueyi. Huan ta moaxca nochi tamanti hasta nopa taquetzali cati ipan tijquetzqui ni taltipacti.

⁹TOTECO, tiquinmocuitahuía cati taiyocatalilme para ta, pero cati sentamique itztose ipan tzintayohuilot campa ayecmo molinise. Amo aqui tatanis san ica ya ichicahualis.

¹⁰TOTECO, tiquintzontamiltis nochi cati mitztehuíaj. Tatatzinaltis ten ilhuicacti ininca nocualancaitacahua. Tiquintajtolsencahuas nochi masehualme campa hueli ipan taltipacti. TOTECO, ta cati tijmacas chicahualisti nopa tanahuatijquet cati tijtapejpenijtoc. Quena, yaya cati ticajaltijtoc para quichihuas itequi, tijhueyichihuas.”

¹¹Huan Elcana huan nochi ichampoyohua tacuepilijque ininchaj ipan altepet Ramá, pero nopa conet Samuel mocajqui huan quitequipano TOTECO quej quinahuati totajtzi Elí.

¹²Huan itelpocahua Elí nelía eliyayaj sentamique huan yon quentzi amo quiixmatiyayaj TOTECO.

¹³Quema tequitiyayaj quej totajtzitzi huan hualayaya se acajya para quitatis tacajcahualisti para TOTECO, inijuanti quititaniyayaj se inintequipanojca ica se hueyi teposhuitzti imaco cati quipiyayaya eyi cuachijcoli. Huan quema nopa nacat ten nopa tacajcahualisti ya icsiyaya,

¹⁴inintequipanojca quicalaquiyaya nopa teposhuitzti ipan chachapali o ipan ten hueli campa quiicxitíaj nopa nacat huan nochi nopa nacat cati quiquixtiyaya quinhuiquiliyaya itelpocahua Elí. Huan quej nopa quichijque cati amo monequi nochipa ica nochi israelitame cati ajsiyayaj Silo para quihueyitalise TOTECO.

¹⁵Nojquiya quemantica nopa tequipanojquet ajsiyaya quema ayemo quitatiyayaj ichiyajca nopa nacat ipan taixpa, huan quinilhuiyaya cati temacaj tacajcahualisti: “Techmaca nacat para nijcacatzohuiti nopa totajtzi pampa yaya amo quiselis sinta ya icsitoc. Yaya quinequi xoxohuic para quicacatzos.”

¹⁶Huan quemantica nopa tacame quinanquiliyayaj quej ni: “Huelis tijhuicas ten tijnequis, pero achtohui xijcahua ma tata ichiyajca quej quiijtohua tanahuatili, huan huajca huelis tijcuis”. Huan quema quej nopa quinanquiliyayaj, huajca nopa tetequipanojquet quiijtohuayaya: “Techmaca amantzi pampa sinta amo techmacas nimitzquixtilis ica cualanti.”

¹⁷Huajca nelía se hueyi tajtacoli cati quichihuayayaj ni telpocame iixpa TOTECO, pampa san quiahuilmatiyayaj nopa tacajcahualisti cati nopa israelitame quihualicayayaj para quimacase TOTECO.

¹⁸Huan nopa piloquichpiltzi Samuel quitequipanohuayaya TOTECO tiopan calijtic huan moyoyontiyaya ica se pilyolixtzajcayotzi ten lino yoyomit quej moyoyontíaj totajtzitzi.

¹⁹Huan sesen xihuit inana quichihuiliyaya seyoc pilpantzajcayotzi huan quihuiquiliyaya quema yahuiyaya campa tiopa ihuaya ihuehue para quimacati TOTECO nopa tacajcahualisti cati monejqui sesen xihuit.

²⁰Huan sesen xihuit nopa totajtzi Elí quitiochijqui Elcana ihuaya isihua, itatahua Samuel huan quiilhuiyaya Elcana: “Ma TOTECO mitztiochihua huan ma mitzmaca más coneme ica ni sihuat pampa quimactilijtoc ni icone para quitequipanos TOTECO.” Huan teipa inijuanti tacuepiliyayaj ininchaj.

²¹Huan TOTECO quitiochijqui Ana huan quimacac eyi ioquichpilhua huan ome isihuapilhua. Huan Samuel moscaltijtiyajqui ipan itiopa TOTECO.

²²Huan Elí eliyaya nelía huehuentzi. Huan quimatiyaya nochi cati fiero cati itelpocahua quinchihuiliyayaj nopa israelitame. Quimatiyaya quenicatza cochiyayaj inihuaya nopa sihuame cati quimocuitahuíaj nopa caltemit ipan nopa Yoyon Tiopamit campa TOTECO mopantiyaya inihuaya.

²³Huajca Elí quinilhui itelpocahua: “¿Para ten anquichihuaj cati nelía fiero? Nijcactoc nochi cati imasehualhua TOTECO mopohuilíaj para anquichihuaj.

²⁴Noconehua, monequi xijcahuaca. Nelía amo cuali cati anquichihuaj. Anquintajtacoltíaj imasehualhua TOTECO.

²⁵Sinta se quichihuilía seyoc tacat cati fiero, quiselis se tatzacuiltili. Pero amojuanti anquichihuaj cati fiero ica TOTECO, huajca ¿ajquiya huelis amechmanahuis ten nopa hueyi tatzacuiltili cati amechajsis?” Pero itelpocahua Elí amo quinejque quitacaquilise cati inintata quinilhuiyaya pampa TOTECO ya motemacatoya para quintzontamiltis.

²⁶Pero nopa oquichpil Samuel moscaltiyaya huan Toteco Dios quipactiyaya nochi cati quichihuayaya, huan nojquiya nochi masehualme quicualitayayaj.

²⁷Huan se tonali hualajqui se itajtolpanextijca Toteco Dios para quipaxaloqui Elí huan quimacac ni camanali cati TOTECO quiilhuijtiyahuiyaya: “Na nimonexti iniixpa mohuejcapan tatahua quema itztoyaj ipan tali Egipto huan quitequipanohuayayaj Faraón san tapic.