1 SAMUƐLI 2:2-27 - Luda yã takada kↄ̃n Bokobaru yão

1 SAMUƐLI 2:2-27

Click on verse(s) to share them!

²Gbɛ̃kee kú adona lán Dii bàro, gbɛ̃kee kuu lán à bàro, gbɛ̀si kee kuu lán wa Luda bàro.

³Àton yã bↄɛ kↄ̃n yↄ̃nkↄↄoro, àton tó wadayã bↄ a lɛ́nlo, zaakɛ Dii Ludan yãdↄ̃ri ũ, àmbe è wa yãkɛnanↄ yↄ̃ à gwa.

⁴Gↄ̃sagbãaanↄ sá ɛ̀'ɛ, mↄde gbɛ̃ funanↄ gbãa asaa dↄ̀ ń pii.

⁵Gbɛ̃ kãna e a zĩnda aya kɛɛ pↄ́blee yãnzi, mↄde nↄaa e gbɛ̃ kɛ̀ èe à dɛ yãa dɛ dↄro. Pãaa nɛ́ ì mɛ̀n swɛɛplaa, mↄde nɛ́pari'iri gↄ̃̀ wɛ̃nda.

⁶Dii bé è tó gbɛ̃ ga, bensↄ̃ è tó gbɛ̃ gↄ̃ kuu. Àmbe è tó gbɛ̃ gɛ̃ bùsu guu, bensↄ̃ è gɛ̀ vu.

⁷Dii bé è mↄ́ kↄ̃n takaasio kↄ̃n kuuna nnaao, è ↄ tↄ̃ gbɛ̃kenↄa, è gbɛ̃kenↄ sɛ́ lezĩ.

⁸È wɛ̃ndadeenↄ bↄ bùsutitin, è takaasideenↄ bↄ tubura. È ń vɛ̃ɛ gu dↄ̃nkↄ̃n kↄ̃n kínɛnↄ, è tó aↄ̃ kpata ble kↄ̃n gakuio. Zaakɛ tↄↄtɛ kãsãpɛɛkiinↄ nɛ́ Dii pↄ́mɛ, ben à anduna kàɛa.

⁹È a gbɛ̃nↄ gbápɛɛki dãkpańnɛ, è zaakɛrinↄ dúgu zↄ̃ gusiaan. Gbɛ̃ke é fↄ̃ à ↄsii nɛ kↄ̃n a zĩnda gbãaaoro.

¹⁰Dii é a ibɛɛnↄ ú lↄ́, eé pata a ibɛɛnↄa zaa musu, eé yãkpaɛ kɛńyo ai anduna lɛ́zɛkiia. Eé gbãaa kpá kína kɛ̀ à kàa, eé gbɛ̃ kɛ̀ à sɛ̀ pì mì da ía.

¹¹Ben Ɛlɛkana tà a bɛ wɛ́tɛ zaa Rama, ben nɛ́gↄ̃gbɛ̃ pì gↄ̃̀, èe zĩi kɛɛ Diinɛ kↄ̃n sa'ori Ɛlio.

¹²Ɛli nɛ́gↄ̃gbɛ̃nↄ nɛ́ nɛ́ pãsĩnↄmɛ, aↄ̃è Dii daro.

¹³Yã kɛ̀ sa'ori pìnↄ è kɛńnɛn yɛ̀. Tó gbɛ̃ saa ò, gurↄↄ kɛ̀ èe nↄ̀bↄ pì fùfu kɛɛ, sa'ori ìba ke è mↄ́ kↄ̃n saka gbã̀dã aagↄ̃deeo kũna.

¹⁴Ben è pɛɛ taa guu ke oroo ke mↄ̀'oroo, ben sa'ori è pↄ́ kɛ̀ saka pì bↄ̀o sɛ́ a pↄ́ ũ píngi. Lɛn aↄ̃è kɛ Isaraili kɛ̀ aↄ̃ mↄ̀ Silonↄnɛ lɛ ń píngi.

¹⁵Baa ai wàgↄ̃ gá nↄ̀bↄ kpá tɛ́a à nↄ́si yãa, sa'ori ìba ke è mↄ́ à be gbɛ̃ kɛ̀ saa ò pìnɛ: Ǹ nↄ̀bↄ kpá sa'oria à kpá tɛ́a, zaakɛ eé we à nↄ̀bↄ fùfukɛna símmaro, sé à búsu.

¹⁶Tó gbɛ̃ pì bènɛ é nↄ̀bↄ kpá tɛ́a gĩa a nↄ́si yãa, gbasa pↄ́ kɛ̀ à yezi à sɛ́ sa, ben ìba pì è be: Auo! Ǹ kpáma gↄ̃ↄ! Tó n gi, mɛ́ bↄ kↄ̃n gbãaao.

¹⁷Gↄ̃kparɛ pìnↄ durun kɛ̀ bíta Diinɛ maamaa, zaakɛ aↄ̃ↄe kya kaa à sa'onↄbↄmmɛ.

¹⁸Nɛ́gↄ̃gbɛ̃ Samuɛli sↄ̃ ègↄ̃ zĩi kɛɛ Diinɛ kↄ̃n dansiki utao dana.

¹⁹À da è uta gyaba nɛ́ngo zↄ̃nɛ. Tó èe mↄↄ saa o kↄ̃n a zão wɛ̃̀ kↄ̃n wɛ̃̀o, ben è mↄ́onɛ.

²⁰Ɛli è sa maaa o Ɛlɛkananɛ kↄ̃n a nↄↄ pìo à be: Dii n gba nɛ́ dↄ kↄ̃n n nↄↄ pìo, nɛ́ kɛ̀ à à wɛ́ɛ kɛ̀ ben à kpà Diia pì gɛ̃ɛ ũ. Ben aↄ̃è tá ń bɛ.

²¹Ben Dii aubarika dà Anan, à ɛ̀ara à nɛ́ ì mɛ̀n sↄↄro, gↄ̃gbɛ̃nↄ gↄ̃ↄn aagↄ̃, nↄgbɛ̃nↄ plaa. Nɛ́gↄ̃gbɛ̃ Samuɛli sↄ̃ↄ e bíta kũu Dii ↄzĩ.

²²Ɛli zi kũ̀ kótokoto, à yã kɛ̀ a nɛ́nↄↄ e kɛɛ Isarailinↄnɛ mà píngi kↄ̃n lán aↄ̃è daɛ kↄ̃n nↄgbɛ̃ kɛ̀ aↄ̃ègↄ̃ zĩi kɛɛ dakↄ̃rɛki kuta kpɛɛlɛnↄo nà.

²³Ben à ń lá à bè: Bↄ́ bé à tò ée yã kɛɛ lɛɛ? Má mà baade píngi e a yãzaakɛna oo.

²⁴Àton kɛ lɛro ma nɛ́nↄ! Baaru kɛ̀ má mà kɛ̀ èe daagula Dii gbɛ̃nↄ tɛ́ pì maaro.

²⁵Tó gbɛ̃ durun kɛ̀ a gbɛ̃daaanɛ, Luda é à yã gↄ̃gↄ̃, mↄde tó gbɛ̃ durun kɛ̀ Diinɛ, dé bé eé agbaa kpánɛ? Ben aↄ̃ gì ń de yã mazi, zaakɛ Dii zɛ̀ kↄ̃n ń dɛdɛna yãomɛ.

²⁶Nɛ́gↄ̃gbɛ̃ Samuɛli sↄ̃ↄ e bíta kũu èe kaara. Ègↄ̃ nna kↄ̃n Diio kↄ̃n baade píngio.

²⁷Ben Luda gbɛ̃ke mↄ̀ à bè Ɛlinɛ: Dii bè, gurↄↄ kɛ̀ n dezi Aruna bɛdeenↄↄ e zↄ̀ blee Firi'aunanɛ zaa Igipiti, a bↄ a mↄńzi tɛ̃tɛ̃ntɛ̃,