1. Samueloskero 2:2-27

²Ňiko nane ajso sentno sar o RAJ; nane ňiko, ča tu jekh; nane aver Skala, sar hin amaro Del.

³Preačhen pes te presikavel, ma vakeren avke barikanes; bo o RAJ hin o Del, savo džanel savorestar, ov sudzinel sa, so keren o manuša.

⁴O luki le zorale slugaďengere phaďon, ale ola, save na birinen, chuden nevi zor.

⁵O čale mušinen te kerel buči prekal aver, hoj len te el maro, ale o bokhale imar buter na bokhaľon. Ola džuvľake, savi na uľonas o čhave, uľon eftavar čhave, ale odi džuvľi, sava sas but čhave, hiňi andre bari žaľa.

⁶O RAJ lel o dživipen a del o dživipen, bičhavel andre mulengero svetos a odarik lel avri.

⁷O RAJ del o čoripen the o barvaľipen. Varekas thovel tele a varekas hazdel upre.

⁸Oles, kas nane, hazdel andral o prachos; le čores cirdel avri andral e čhik, hoj len te thovel te bešel le rajikane manušenca a te thovel len te bešel pro pačivalo tronos. Bo le RAJESKERE hine o slupi, so ľikeren e phuv, bo pre lende ačhaďa o svetos.

⁹Ov merkinel pro phiriben peskere pačivale manušengere, ale o bijedevleskere ňemisaľona andro kaľipen, bo ňiko na ňerinela (na zviťazinela) peskera zoraha.

¹⁰Ola, ko džan pro RAJ, ena zňičimen, demela pre lende le perumoha andral o ňebos. O RAJ sudzinela caľi phuv. Peskere kraľis dela zor; hazdela upre peskere pomakhles.”

¹¹O Elkanah geľa pale khere andre Rama, ale o čhavo o Samuel ačhiľa te služinel le RAJESKE paš o rašaj Eli.

¹²O čhave le Eliskere sas nalačhe a na daranas pes le RAJESTAR.

¹³Na ľikerenas pes ko manuša avke, sar pes le rašajendar užarelas. Bo sar vareko anelas e obeta, avelas le rašaskero služobňikos la vidlaha ipen akor, sar pes o mas tavelas.

¹⁴Demelas laha andro kotlos, piri, panvica abo čaro a savoro, so e vidla zachudelas, peske lelas. Kavke kerenas savore Izraelitenge, save avenas andro Šilo.

¹⁵A mek ke oda; sigeder, sar zlabarenas o žiros, avelas le rašaskero služobňikos a phenelas oleske, savo obetinelas: “De mange o mas, hoj les te pekav avri le rašaske. Bo na prilela tutar o mas tado, ale ča jalo!”

¹⁶Ale te vareko leske phenelas: “Ešeb (peršo) kampel te zlabarel o žiros, paľis tuke le, so kames,” ov leske odphenelas: “Na! De mange oda takoj, bo te na, ta lava mange oda zoraha!”

¹⁷O binos ole ternengero sas igen baro anglo RAJ, bo kerenas bi e pačiv le RAJESKERE obetenca.

¹⁸O Samuel služinelas anglo RAJ a sas pre leste urdo ľanoskero efodos.

¹⁹Leskeri daj leske sako berš sivelas cikno plašťos a anelas leske oda akor, sar peskere romeha avelas pre beršeskeri obeta.

²⁰Sar o Eli požehňinelas le Elkanah the leskera romňa, phenďa: “Mi del tuke o RAJ kala romňaha avre čhaven vaš kada, savo sas avrimanglo a dino prekal o RAJ.” Paľis gele khere.

²¹O RAJ požehňinďa la Anna andre oda, hoj lake uľile (narodzinde pes) trin muršora the duj čhajora. Ale o Samuel barolas avri anglo RAJ.

²²O Eli sas imar igen phuro a furt šunelas pal savoro, so kerenas leskere čhave savore Izraelitenge, the pal oda, sar pašľuvkerenas le džuvľenca, save služinenas anglo vudar andre le RAJESKERO Stanos.

²³Dovakerelas lenge: “Oda so tumen keren? Savore manušendar šunav pal tumende ča nalačhe lava.

²⁴Preačhen aleha, čhave mire! Nane oda lačho hiros, so džal pal tumende maškar o RAJESKERE manuša.

²⁵Te kerela manuš namištes le manušeske, o Del pes vaš leste zaačhela, ale te vareko kerela binos anglo RAJ, ko vaš leste zaačhela?” Vašoda o RAJ len kamelas te murdarel, bo on na šunenas peskere dades.

²⁶Ale o terno Samuel barolas a le RAJESKE the le manušenge sas pre dzeka.

²⁷Jekhvar avľa ko Eli le Devleskero murš a phenďa leske: “Kavke phenel o RAJ: ‘Sikaďom man tire dadeskera famelijake, sar mek sas otroka andro Egipt tel e zor le Faraonoskere manušengeri.