Samuyɛli Singena 2:2-27

²Muxu yo mi sariɲan alo Alatala. En ma Ala keden peen nan en kantan fanyen na. Ala gbɛtɛ mi na, ba i tan na.

³Ɛ nama waso falane ti. Ɛ nama konbin ti, bayo Alatala, Ala na a ra naxan feen birin kolon, a muxune kɛwanle birin makitima nɛn.

⁴Sofa sɛnbɛmane xanle bata kala, koni naxanye fanga mi gbo ne bata sɛnbɛn sɔtɔ.

⁵Naxanye yi lugoxi nun ne donseen fenma, koni kamɛn yi naxanye ma nun ne mako mi fa wanla ma. Ɲaxalan gbantan bata dii solofere bari, koni naxan bata yi dii xɛmɛ wuyaxi bari, na bata a kui ɲan.

⁶Alatala faxan tima, a kisin tima, a muxun nasigɛ laxira yi, a a bɛ na.

⁷Alatala muxun fuxarɛ, a a bannɛ, a nde ragodɛ, a nde yitɛ.

⁸A fangatarene rakelɛ nɛn burunburunni, a tɔrɔ muxun nakeli xubeni. A e nun kuntigine radɔxɔ yire kedenni manga gbɛdɛne ma. Alatala nan bɔxɔ xɔnna bɛtɛn saxi, a tan nan a dɔxɔ a funfuni.

⁹A muxu tɔgɔndiyaxine yisuxuma nɛn koni ɲaxudene lɔma ayi nɛn dimini, bayo muxun mi nɔɔn sɔtɔma fangani.

¹⁰Alatala na galanna xuiin namini a yaxune raxuyama ayi nɛn. A tan nan kitisa gbeen na han bɔxɔn danna. A a yamaan mangan sɛnbɛn gboma ayi nɛn, a a manga sugandixin fangan xun masama nɛn.

¹¹Na xanbi ra, Elikana yi xɛtɛ a konni Rama yi, koni Samuyɛli yi lu walideni Alatala xa, saraxarali Heli bun ma.

¹²Fuyantenna nan yi Heli a diine ra, e mi yi Alatala kolon.

¹³Saraxaraline namunna nan yi ito ra lan yamaan ma: Xa muxuna nde saraxan ba, saraxaralina walikɛɛn yi a masoma nɛn suben ɲinmatɔɔn na, wure binga dɛ saxanna a yii.

¹⁴A yi a rasin goronna kui hanma tundena hanma gbɛtɛ. Wure bingaan na yi naxan birin sɔxɔn, na yi findima saraxaraliin nan gbee ra. Isirayila kaan naxanye birin yi fama Silo batu banxini, na nan yi ligama.

¹⁵Koni, waxatina nde, benun e xa turen gan, saraxaralina walikɛɛn yi fama nɛn a a fala saraxa baan xa, a naxa, “Fa suben gilin daxin na saraxaraliin xa. A mi tinɲɛ i ya sube ɲinxin na, fɔ sube xindena.”

¹⁶Xa na kanna a fala a xa, a naxa, “Sube turen xa gan singen, na xanbi ra, naxan na i kɛnɛn, i na tongo,” walikɛɛn yi a yabima nɛn, a naxa, “Ɛn-ɛn, a so n yii iki, hanma n xa a tongo fangan na.”

¹⁷Nayi, Heli a diine yi yulubi ɲaxin nan tongoma Alatala mabinni, bayo saraxan naxan yi bama Alatala xa e mi yi binye yo saxi na ma.

¹⁸Koni Samuyɛli tan yi walima Alatala yɛtagi a banxulan ɲɔrɛyani, a maxidixi taa dugi saraxarali domani.

¹⁹Ɲɛɛ yo ɲɛɛ, Samuyɛli nga yi domadina nde dɛgɛma nɛn, a a xali a diin yɛɛ ra, e nun a xɛmɛn na yi siga Silo yi ɲɛɛn saraxan badeni waxatin naxan yi.

²⁰Heli yi dubama Elikana nun a ɲaxanla xa iki, a naxa, “Alatala xa mamandenne fi i ma fata ɲaxanli ito ra, naxan luyɛ na diin ɲɔxɔni a naxan maxɔdin, a yi a fi Alatala ma.” Na xanbi ra, e yi xɛtɛ e konni.

²¹Alatala yi Xana ki, a yi dii xɛmɛ saxan bari e nun dii tɛmɛ firin. Banxulan ɲɔrɛn Samuyɛli yi gboma Alatala yɛtagi.

²²Heli naxan bata yi fori, na yi a kolon, a diine yi naxan ligama Isirayila kaane ra, a mɔn yi a kolon fa fala e nun ɲaxanle yi kafuma naxanye yi walima Naralan Bubun dɛɛn na.

²³A yi a fala e xa, a naxa, “Nanfera ɛ fe sifani itoe ligama? Bayo n na ɛ kɛwali ɲaxina fe mɛma yamaan birin na.

²⁴Ɛ lu n ma diine. N naxan mɛma ɛ xun ma Alatala a yamaan xɔn, na magaxu.

²⁵Xa muxuna nde a boden hakɛn tongo, Ala nɔɛ na kitin sɛ nɛn, koni xa muxun yulubin liga Alatala ra, nde fa kitima?” Koni e mi e baba maxadi xuiin namɛ bayo Alatala yi wama e faxa feni.

²⁶Banxulan ɲɔrɛn Samuyɛli yi gboma nɛn tun, a yi rafan Alatala nun muxune ma.

²⁷Sayibana nde yi fa Heli fɛma a yi a fala a xa, a naxa, “Alatala ito nan falaxi, a naxa, ‘I benbane to yi konyiyani Misiran yi Firawona yii, n na n yɛtɛ makɛnɛn nɛn e xa.