1 SAMUEL 2:2-27

²Amo aqui seyoc catli tlatzejtzeloltic quen ta, TOTECO. Amo aqui seyoc Dios. Amo aqui seyoc catli hueli temanahuía quen ta, san Toteco Dios tiiyojtzi.

³Amojuanti anmasehualme, amo ximohueyimatica. Amo xicamanaltica chicahuac. Amo ximotlepanitaca. Pampa TOTECO san yaya Dios catli nochi quimati. Yaya anmechtlajtolsencahuas ica catli anquichihuaj.

⁴Tiquinquixtilía ininteticayo catli yolchicahuaque, huan tiquinyolchicahua catli amo quipiyaj fuerza.

⁵Masehualme catli quipixque tlacualistli hasta mocahua ama tlaijiyohuíaj ica mayantli. Huan catli mayanayayaj, ama hasta mocahua inintlacualis. Huan nopa sihuatl catli amo hueli conepiya, ama ya quinpixtoc hasta chicome iconehua. Huan nopa sihuatl catli quinpiyayaya miyac iconehua, ama ayacmo tleno quinpiya.

⁶TOTECO, ta titemictía huan ta titemaca nemilistli. Ta titetemohuía campa miquilistli huan ta catli titetlejcoltía.

⁷TOTECO, ta tiquinchihua sequin masehualme teicneltzitzi, huan sequin ta tiquinricojchihua. Ta catli titeicnotlalía huan titehueyichihua.

⁸TOTECO, ta tiquintlanana nopa teicneltzitzi catli itztoque tlalchi. Quena, tiquintlanana catli mosehuíaj campa cuanextli, huan tiquinhueyichihua para ma mosehuica ininhuaya huejhueyi tequitini. Quena, TOTECO tiquinchihua ma mosehuica campa más onca tlatlepanitacayotl. Pampa ta catli más tihueyi. Huan ta moaxca nochi tlamantli hasta nopa tlaquetzali ipan catli tijquetzqui ni tlaltipactli.

⁹TOTECO, tiquinmocuitlahuía catli tlaiyocatlalilme para ta, pero catli amo cuajcualme itztose ipan tzintlayohuilotl campa ayacmo molinise. Amo aqui tlatlanis san ica ya ichicahualis.

¹⁰TOTECO, tiquintzontlamiltis nochi catli mitzhuilanaj. Tlatlatzinaltis tlen ilhuicactli ininca nocualancaitacahua. Tiquintlajtolsencahuas nochi masehualme campa hueli ipan tlaltipactli. TOTECO, ta catli tijmacas chicahualistli nopa tlanahuatijquetl catli tijtlapejpenijtoc. Quena, yaya catli ticajaltijtoc para quichihuas itequi, tijhueyichihuas.”

¹¹Huan Elcana huan nochi ichampoyohua mocuepque ininchaj ipan altepetl Ramá, pero nopa conetl Samuel mocajqui huan quitequipano TOTECO quen quinahuati totajtzi Elí.

¹²Huan itelpocahua Elí nelía eliyayaj amo cuajcualme huan niyon quentzi amo quiiximatiyayaj TOTECO.

¹³Quema tequitiyayaj quen totajtzitzi huan hualayaya se acajya para quitlatis tlacajcahualistli para TOTECO, inijuanti quititlaniyayaj se inintequipanojca ica se hueyi teposhuitztli imaco catli quipixqui eyi cuachijcoli. Huan quema nopa nacatl tlen nopa tlacajcahualistli ya icsi,

¹⁴inintequipanojca quicalaquiyaya nopa teposhuitztli ipan chachapali o ipan tlen hueli campa quiicxitíaj nopa nacatl huan nochi nopa nacatl catli quiquixtiyaya quinhuiquiliyaya itelpocahua Elí. Huan quej nopa quichijque catli amo monejqui nochipa ica nochi israelitame catli ajsiyayaj Silo para quihueyitlalise TOTECO.

¹⁵Nojquiya quemantic nopa tequipanojquetl ajsiyaya quema ayamo quitlatiyayaj ichiyajca nopa nacatl ipan tlaixpa, huan quinilhuiyaya catli temacaj tlacajcahualistli: “Techmaca nacatl para nijcacatzhuiliti nopa totajtzi pampa yaya amo quiselis sintla ya icsitoc. Yaya quinequi xoxohuic para quicacatzos.”

¹⁶Huan quemantic nopa tlacame quinanquiliyayaj quej ni: “Huelis tijhuicas tlen tijnequis, pero achtihui xijcahua ma tlatla ichiyajca quen quiijtohua tlanahuatili, huan huajca huelis tijcuis”. Huan quema quej nopa quinanquiliyayaj, huajca nopa tetequipanojquetl quiijtohuayaya: “Techmaca amantzi pampa sintla amo techmacas nimitzquixtilis ica cualantli.”

¹⁷Huajca nelía se hueyi tlajtlacoli catli quichihuayayaj ni telpocame iixpa TOTECO, pampa san quiahuilmatiyayaj nopa tlacajcahualistli catli nopa israelitame quihualicayayaj para quimacase TOTECO.

¹⁸Huan nopa piloquichpiltzi Samuel quitequipanohuayaya TOTECO tiopan calijtic huan moyoyontiyaya ica se pilyolixpantzajcayotzi tlen lino yoyomitl quen moyoyontíaj totajtzitzi.

¹⁹Huan sesen xihuitl inana quichihuiliyaya seyoc pilpantzajcayotzi huan quihuiquiliyaya quema yohuiyaya campa tiopamitl ihuaya ihuehue para quimacati TOTECO nopa tlacajcahualistli catli monejqui sesen xihuitl.

²⁰Huan sesen xihuitl nopa totajtzi Elí quitiochijqui Elcana ihuaya isihua, itatahua Samuel huan quiilhuiyaya Elcana: “Ma TOTECO mitztiochihua huan ma mitzmaca más coneme ica ni sihuatl pampa quimactilijtoc ni icone para quitequipanos TOTECO.” Huan teipa inijuanti mocuepayayaj ininchaj.

²¹Huan TOTECO quitiochijqui Ana huan quimacac eyi ioquichpilhua huan ome isihuapilhua. Huan Samuel moscaltijtiyajqui ipan itiopa TOTECO.

²²Huan Elí eliyaya nelía huehuentzi. Huan quimatiyaya nochi catli fiero quinchihuiliyayaj itelpocahua nopa israelitame. Quimatqui quenicatza cochiyayaj ininhuaya nopa sihuame catli quimocuitlahuíaj nopa cuapuerta ipan nopa Yoyon Tiopamitl campa TOTECO mopantiyaya ininhuaya.

²³Huajca Elí quinilhui itelpocahua: ―¿Para tlen anquichihuaj catli nelía fiero? Nijcactoc nochi catli imasehualhua TOTECO mopohuilíaj para anquichihuaj.

²⁴Noconehua, monequi xijcahuaca. Nelía amo cuali catli anquichihuaj. Anquintlajtlacoltíaj imasehualhua TOTECO.

²⁵Sintla se quichihuilía seyoc tlacatl catli fiero, quiselis se tlatzacuiltilistli. Pero amojuanti anquichihuaj catli fiero ica TOTECO, huajca ¿ajqueya huelis anmechmanahuis tlen nopa hueyi tlatzacuiltili catli anmechajsis? Pero itelpocahua Elí amo quinejque quitlacaquilise catli inintata quinilhuiyaya pampa TOTECO ya motemacatoya para quintzontlamiltis.

²⁶Pero nopa oquichpil Samuel moscaltiyaya huan Toteco Dios quipactiyaya nochi catli quichihuayaya, huan nojquiya nochi masehualme quicualitayayaj.

²⁷Huan se tonal hualajqui se itlajtol pannextijca Toteco Dios para quipaxaloqui Elí huan quimacac ni camanali catli TOTECO quiilhuijtiyohuiyaya: ―Na nimonexti iniixpa mohuejcapan tatahua quema itztoyaj ipan tlali Egipto huan quitequipanohuayayaj Faraón san tlapic.