1Ɩ́ sələmɩ Tɑcɑɑ sɩ ɩ́ hɑ-mɛɣɛ tɛʋ kɛ toomɑɣɑ. Ɩ kɑ́ yele nɑ kʋ nɩɩ-mɛɣɛ sɔsɔm nɑ tɔɣɔnɑɣɑ nyɑlɑ tɑwɑ tɑɑ.
2Ɩ́ kʋɣɩ mə təɣɩ yem kɛ́ nɑ tɩɩŋ, ɩ wɛ kpɛtɛ kɛ́. Pə́cɔ́ tʋwɑɑ nɑɑ nɑɑkɩ mə pee. Pɑ puɣusiɣi-mɛ nɑ pɔpɔtʋ toosee sɩ, pɑ hɛɛsəɣɩ mə lɑŋɑ. Ḿpʋɣʋ mə cɑɑnɑɑ lɑpɑ nɑ pə́ yɑsɩ-wɛ ɩsɩɩ heeŋ wei ɩ fɛɩnɑ tiikilu tɔ.
3Pə tənɑ pə tʋ Tɑcɑɑ mɑ́, mɑ mʋ pɑ́ɑ́nɑ́ nɑ kpɑɩ nyə́mɑ. Mpɛ pɑ tiikiɣinɑ Ɩsɛɣɛlɩ nyə́mɑ nɑ mʋsʋŋ. Mɑɑ səŋ pɑ tɔɔ. Mɑɑ pɑɑsənɑ mɑ Yutɑ yəlɑɑ nɑ mɑ́ tʋ-mɛɣɛ toŋ ɩsɩɩ mɑ yoou kpɑɣɑnəŋ.
4Mə tɑɑ kɛ́ ɑwulɑɑ kɑ́ lɩɩ wɑɑnɩ wɑɑnɩ. Mə toŋ kɑ́ wɛɛ ɩsɩɩ kutuluɣu kite tɛɛ pəlɛ. Ɩ́ səŋɑɑ kɛ́ təcɑ ɩsɩɩ lɑŋɑɣɑ tesikɑ, nɑ ɩ́ wɛnɑ pəsʋɣʋ ɩsɩɩ yoou tɔɔʋ.
5Ɩ́ kɑ́ wɛɛ ɩsɩɩ yoou ɑkɑnɑɑ, nɑ ɩ́ fɛləɣɩ mə kolontunɑɑ kɛ ɑtɛ. Ḿpʋɣʋ ɩ́ kɑ́ yoo. Mpi tɔ, Tɑcɑɑ mɑ́, mɑɑ wɛɛ mə wɑɑlɩ kɛ́. Fɛɛlɛ kɑ́ kpɑ mə kolontunɑɑ kpɑɣɑnəŋ cɑɣɑlɑɑ.
6Mɑɑ yele nɑ Yutɑ nyə́mɑ nyɔɔ toŋ. Mɑɑ wɑɑsɩ Yosɛɛfʋ təyɑɣɑ nyə́mɑ. Mɑɑ məŋnɑ-mɛɣɛ mə tɛtʋ tɑɑ ɩsɩɩ mɑ tɑɑ lɔ-mɛ. Mpi tɔ, mɑɣɑlɛ mə Ɩsɔ, mɑ wɛnɑ mə pətɔɔtəlɛ kɛ́, mɑɑ cɔ-mɛ.
7Ɩsɛɣɛlɩ nyə́mɑ kɑ́ pəsɩ ɑkɑnɑɑ kɛ́. Mə lɑŋɑ kɑ́ hʋlʋmɩ ɩsɩɩ ɩ́ nyɔɔ sʋlʋm. Mə piyɑ kɑ́ nɑ mə ɑkɑɩtʋ ntɩ. Ɩlɛnɑ pɛlɛ pɑ tɑɑ hɛɛnɑ Tɑcɑɑ.
8Mɑɑ yɑɑ mɑ yəlɑɑ mɛ nɑ mɑ́ hɛtɩ-mɛ nɑ mɑ́ kpeɣeli-mɛ. Ɩ́ kɑ́ huki ɩsɩɩ pɑ hukɑɣɑ lɔŋ tɔ.
9Mpi tɔ, mɑɑ ŋmɩɩsɩ-mɛɣɛ piitimnɑɑ tɑɑ. Amɑ ɩ́ kɑ́ tɔɔsɩ mɑ tɔɔ kɛ́ pooluŋ tɑɑ tənɑ. Mənɑ mə pəyɑlɑɑ ɩ́ kɑ́ cɑɣɑ tənɑ. Ɩlɛnɑ ɩ́ tɑɣɑnɩ məlʋɣʋ.
10Mɑɑ ləsɩ-mɛɣɛ Icipiti nɑ Asilii pɑ tɛtʋnɑɑ tɑɑ. Mɑɑ məŋnɑ-mɛɣɛ mə tɛ nɑ mɑ́ sɔɔsɩ-mɛɣɛ Kɑlɑɑtɩ nɑ Lipɑŋ tɛtʋ. Pɑɑ nɑ mpʋ tɔ, təcɑɣɑlɛ kɑɑ tɑlɑ-mɛ.
11Pɑɑ lɑŋwɑkəllɛ mɑɣɑnɑ-mɛ ɩsɩɩ teŋku. Mɑɑ cɛ mə holɑ nɑ hɑlɩ Nili pɔɣɔ pəle mɑɣɑmɑɣɑ wʋlɩ. Kɑlɑmpɑɑnɩ tʋ Asilii kɑ́ hoti ɩsɩɩ tɑɑʋ. Icipiti ɩ́lɛ́ ɩ toŋ kɑ́ yɔkɩ.
12Mɑɑ yele nɑ Ɩsɛɣɛlɩ nyə́mɑ nyɔɔ toŋ. Ɩ́ kɑ́ nɩɩnɑ-m nɑ ɩ́ tɔkɩ mɑ kiiŋ. Tɑcɑɑ mɑ́, mɑ yɔɣɔtəɣənɑ mpʋ.
