Sɑkɑlɩ 9

1

2

3

4

5

6

7

8

9

10

11

12

13

14

¹Tɑcɑɑ yɔɣɔtɑ ɩ tɔm nɑ tə́ tɑlɑ Hɑtəlɑkɩ tɛtʋ tɑɑ. Tə nɩɩ Tɑmɑsɩ ɩcɑtɛ tɑɑ. Ɩlɛ pə tɑɣɑ Ɩsɛɣɛlɩ nyə́mɑ tike kɛ ɩ pɑɑsəɣənɑ. Amɑ yəlɑɑ tənɑɣɑ.

²Tɑmɑsɩ ɩcɑtɛ cɔlɔ Hɑmɑtɩ ɩcɑtɛ, nɑ Tiii nɑ Sitɔŋ ɑcɑlɛɛ nnɑ ɑ wɛnɑ kpelikpekɑ sɔsɑɣɑ tɔɣɔ Tɑcɑɑ yɔɣɔtəɣənɑ.

³Tiii nyə́mɑ ɩ́ ŋmɑwɑ mə ɩcɑtɛ kɛ koluŋɑ kɛ́. Ɩ́ kɑɑ liɣitee ɩsɩɩ kɑnyəŋɑ nɑ wʋlɑ ɩsɩɩ ɑfəlɑ.

⁴Amɑ Tɑcɑɑ kɑ́ lɛɛkɩ-tɛ. Ɩ kɑ́ tusi tə koluŋɑ kɛ teŋku tɑɑ nɑ ɩ́ nyɑɣɑsɩ-tɛɣɛ kɔkɔ.

⁵Filiisi ɑcɑlɛɛ Asəkɑlɔŋ, nɑ Kɑsɑ, nɑ Ɩkoloŋ nyə́mɑ kɑ́ nɑ́ mpʋ. Sɔɣɔntʋ kɑ́ kpɑ-wɛ nɑ pɑ́ kpisi kɑntəlʋɣʋ. Wulɑʋ kɑɑ kɑɑsɩ Kɑsɑ. Pəyele Asəkɑlɔŋ ɩcɑtɛ nɑ́ kɑɑ nɑ tə yəlɑɑ.

⁶Yəlɑɑ sitɑɑ kɛ́ nɑ pɑ́ kɔɔ pɑ́ cɑɣɑ Asətɔtɩ. Mɑɑ ləsɩ mpi pə tʋɣɩ Filiisi nyə́mɑ kɛ kɑlɑmpɑɑnɩ tɔ.

⁷Mɑɑ ləsɩ mə nɔɔsɩ tɑɑ kɛ́ nɑntʋ nti pɑ tɑ lɛntɩ tɔ, yɑɑ kʋlɑlɑɑtʋ. Mə tɑɑ mpɑ pə kɑɑsɑɑ tɔ, nɑ Yutɑ nyə́mɑ ɩ́ kɑ́ yɑɑnɑ-m mə Ɩsɔ. Ɩkoloŋ nyə́mɑ kɑ́ sʋʋ mə yəlɑɑ tɑɑ ɩsɩɩ Yepusi nyə́mɑ lɑpɑ tɔ.

⁸Mɑɑ tɑŋ Ɩsɛɣɛlɩ tɛtʋ kɛ́. Yoolɑɑ nɑpəlɩ kɑɑ pəsɩ-tɩ, pɑɑ tɛɛlɑɑ yɑɑ kɔntɑɑ. Pə́cɔ́ ŋmɑkəllʋ kɑɑ tɑsɑ mə tɔɔ kɛ́ təŋnɑʋ. Mpi tɔ, mɑ pɑɑsəɣənɑ-mɛɣɛ.

⁹Ḿpʋɣʋ Tɑcɑɑ tɑsɑɑ sɩ: Yosɑlɛm ɩcɑtɛ nyɑ́, nyɑ́ lɑŋlɛ ɩ́ hʋlʋmɩ sɔsɔm. Siyɔŋ nyə́mɑ mɛ, mə wulɑʋ kɔŋnɑ ntɛɣɛ mə cɔlɔ. Ɩ siɣisɑɑ nɑ ɩ kɛ́ ɑkɑ. Ɩ pɑsɑ ɩ tɩ nɑ ɩ́ cɑɣɑ kpɑŋɑɣɑ tɔɔ.

¹⁰Mɑɑ ləsɩ Ɩfəlɑyim tɑɑ kɛ́ yoou kɛɛkɛnɑɑ nɑ Yosɑlɛm tɑɑ kɛ́ pə kpɑɣɑnəŋ nɑ pə tɔɔŋ. Wulɑʋ ɩnɩ ɩ kɑ́ tʋ piitimnɑɑ kɛ hɛɛsʋɣʋ. Ɩ kɑ́ tɔɣɔ kɑwulɑɣɑ kɛ ɑntulinyɑ tənɑ təpɑɩ.

¹¹Ḿpʋɣʋ Tɑcɑɑ yɔɣɔtɑɑ sɩ: Mɑɑ cɛ mə nyə́mɑ mpɑ pɑ təkɑ sɑləkɑ kɛ lɔkɔ wei ɩ tɑɑ lʋm fɛɩ tɔ. Mɑ́ nɑ mɛ tɑ́ nɔɣɔ pɛɛlʋɣʋ kɔtɑɣɑ cɑləm tɔɔ kɛ́ mɑɑ lɑ mpʋ.

¹²Sɑləkɑtʋnɑɑ mɛ, ɩ́ məlɩ koluŋɑ ɩcɑtɛ tɑɑ nɑ tɛɛlʋɣʋ. Sɑŋɑ mɑ tɑsəɣɩ yɔɣɔtʋɣʋ sɩ mɑɑ lɛɛtɩ-mɛɣɛ kʋpɑntʋ kɛ tɔm nɑɑlɛ.

¹³Mɑɑ pəsɩ Yutɑ kɛ tɔɔʋ, nɑ Ɩfəlɑyim kɛ nyəmɑ́. Mɑɑ kʋsɩ Siyɔŋ nyə́mɑ nɑ pɑ́ yoonɑ Kəlɛɛkɩ nyə́mɑ nɑ mɑ́ lɑ́ nɑ pɑ́ pəsɩ ɩsɩɩ ɑkɑ lɑɣɑtɛ.

¹⁴Tɑcɑɑ mɑ́ mɑɑ sɔɔsɩ mɑ yəlɑɑ tɔɔ. Mɑɑ yɑɣɑ ɑpɑlʋtutuɣu ɩsɩɩ tɛʋ holɑ. Mɑɑ tɔ nyəmɑ́ ɩsɩɩ tɛʋ ŋmɛləsʋɣʋ. Mɑɑ hɔkɔ mə wɑɑlɩ ɩsɩɩ ilim mpətəŋ tɔɔ kɑcuculɑɣɑ.

¹⁵Pə tənɑ pə tʋ Tɑcɑɑ mɑ́ mɑɑ kenti mɑ yəlɑɑ tɔɔ. Mɑɑ tɔ mə kolontunɑɑ kɛ pəntɔlʋpɛɛ nɑ mɑ́ wɑkəlɩ-wɛ. Ɩsɛɣɛlɩ nyə́mɑ ɩ́ kɑ́ kʋ mə kolontunɑɑ. Cɑləm kɑ́ kpe ɩsɩɩ sʋlʋm. Yɑɑ ɩsɩɩ kɔtɑɣɑ təlɑtɛ cɑləm sukuɣu poosiisi, nɑ pɑ́ ŋmɩɩsɩ tə ŋkuluŋɑsɩ tɔɔ tɔ.

¹⁶Wɑɑtʋ ɩnɩ ɩ tɑɑ kɛ́ Ɩsɔ Tɑcɑɑ kɑ́ wɑɑsɩ ɩ yəlɑɑ. Ɩsɩɩ tiikilu wɑɑsʋɣʋ ɩ kɑləkʋ tɔ. Ɩ́ kɑ́ teeki kɔkɔ ɩsɩɩ liɣitee pɛɛ.

¹⁷Mə tɛtʋ tɑɑ, lɑŋhʋlʋmlɛ nɑ kɑcɔkɑ kɑ́ wɛɛ. Tɔɣɔʋ nɑ nyɔɔʋ kɑ́ hɑ ɩfepiyɑ kɛ kpelikpekɑ.