Text copied!
CopyCompare
PIIPILI ƖSƆ TƆM TAKƎLAƔA - Sɑkɑlɩ

Sɑkɑlɩ 2

Help us?
Click on verse(s) to share them!
1Ḿpʋɣʋ pə tɑsɑ-m ɩsɩɩ toosee tɑkɑ tɔtɔ nɑ mɑ nɑ́ həŋ liɣiti.
2Ɩlɛnɑ mɑ́ pɔɔsɩ ɩsɔtɑɑ tillu wei ɩ yɔɣɔtəɣənɑ-m tɔ sɩ: Həŋ ɩnɩ ɩ kʋtoluɣu suwe? Mpʋɣʋlɛ sɩ: Ɩnɩ ɩ hʋləɣənɑ piitimnɑɑ toŋ nyəm. Mpɩ pə yɑsənɑ Yutɑ nɑ Ɩsɛɣɛlɩ nɑ Yosɑlɛm pə yəlɑɑ.
3Ɩlɛnɑ Tɑcɑɑ hʋlʋ-m koolɑɑ liɣiti.
4Ḿpʋɣʋ mɑ pɔɔsɑ-ɩ sɩ: Pepeɣe pɑ kɔmɑ lɑpʋ kɛ cənɛ? Ɩlɛnɑ ɩ́ cɔ-m sɩ: Pɑ kɔmɑɣɑ sɩ, pɑ nyɑɑsəɣɩ piitimnɑɑ. Mpɛ pɑ yoonnɑ Yutɑ nyə́mɑ nɑ pɑ́ yɑsɩ pɑ yəlɑɑ. Ɩlɛnɑ pɑ́ yɔkɩ pɑ toŋ.
5Ḿpʋɣʋ pə lɑpɑ-m ɩsɩɩ toosee tɑkɑ nɑ mɑ nɑ́ yʋlʋ nɑ ɩ́ tɔkɑ ŋmənɑɣɑ kʋmɑɣɑsɑɣɑ.
6Ɩlɛnɑ mɑ́ pɔɔsɩ-ɩ sɩ: Leɣe n puki? Ḿpʋɣʋ sɩ: Mɑ puki sɩ mɑ mɑɣɑsəɣɩ Yosɑlɛm ɩcɑtɛ wɑŋ nɑ tə tɑɣɑləŋ.
7Ntɛnɑ ɩsɔtɑɑ tillu wei ɩ yɔɣɔtənɑ-m tɔ ɩ́ kpətənɑ ɩsɔtɑɑ tillu lɛlʋ wei ɩ səŋɑ-ɩ tɔ.
8Ḿpʋɣʋ ɩ tɔmɑ-ɩ sɩ: Polo ń heeli ɩfepu wei ɩ tɔkɑ ŋmənɑɣɑ tɔ sɩ, pɑ kɑɑ ŋmɑ koluŋɑ nɑ pɑ́ cɔɔnɑ Yosɑlɛm. Mpi tɔ, ɩ tɑɑ yəlɑɑ nɑ tɔlɑ pɑ kəlɑ pɑɣɑlɛ.
9Amɑ Tɑcɑɑ yɔɣɔtɑɑ sɩ: Mɑ́ɑ́ wɛɛnɑ ɩsɩɩ ɩcɑtɛ koluŋɑ kɔkɔ nyəŋkɑ nɑ mɑ teu nɑɑkɩ tə tɑɑ.
10Ḿpʋɣʋ Tɑcɑɑ tɔmɑ sɩ: Mpɑ mɛ mɑ yɑsɑ tɛtʋ tənɑ tɑɑ tɔ, ɩ́ lɩɩ ilim ntɔɣɔŋ tɔɔ tɛtʋ tɑɑ nɑ ɩ́ se.
11Yosɑlɛm nyə́mɑ mpɑ mɛ ɩ́ wɛ yomle tɑɑ kɛ Pɑpiloni tɔ, ɩ́ tɑɣɑnɩ mə tɩ nɑ ɩ́ se.
12Ḿpʋɣʋ Sɑkɑlɩ tɔmɑ sɩ: Pə tənɑ pə tʋ Tɑcɑɑ tilinɑnɑ-m tɔm sɔsɔɔntʋ tənɛ. Ɩ yɔɣɔtəɣənɑ piitimnɑɑ mpɑ pɑ yoonɑ ɩ yəlɑɑ mɛ tɔ sɩ: Ye wei ɩ́ tokinɑ-mɛ pə wɛ ɩsɩɩ mɑɣɑ pʋntʋ tokinɑɑ.
13Mɑɑ kʋlɩ piitimnɑɑ mpɑ pɑ ŋmɑkəlɑ-mɛ tɔ pɑ tɔɔ. Mɑɑ yele nɑ mə yomɑɑ ŋmɑkəlɩ-mɛ. Pɩɩ kɔɔ nɑ pə lɑ mpʋ ɩlɛ pəlɛɣɛlɛ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m.
14Tɑcɑɑ sɩ: Yosɑlɛm nyə́mɑ ɩ́ ŋmɑɑlənɑ lɑŋhʋlʋmlɛ. Mɑɑ kɔɔ nɑ mɑ́ cɑɣɑ mə cɔlɔ.
15Wɑɑtʋ ɩnəɣɩ piitimnɑɑ pɑɣɑlɛ kɑ kpɛntənɑ-m. Ɩ́ kɑ́ pəsɩ mɑ yəlɑɑ. Ɩlɛnɑ mɑ́ wɛɛ mə hɛkʋ. Wɑɑtʋ wei mpʋ ɩnɩ pɩɩ lɑ tɔɣɔ ɩ́ kɑ́ nyɩ sɩ, mɑɣɑlɛ Pə tənɑ pə tʋ Tɑcɑɑ wei ɩ tilɑ-m mə kiŋ tɔ.
16Yutɑ kɑ́ tɑɣɑnɩ pəsʋɣʋ kɛ mɑ kpəntɛ kɛ mɑ tɛtʋ tɑɑ. Ɩlɛnɑ Yosɑlɛm nɑ́ɑ́ pəsɩ mɑ ɩcɑtɛ kʋləsəlɛ.
17Yəlɑɑ tənɑ ɩ́ su. Tɑcɑɑ lɩɩnɑ ɩ təyɑɣɑ tɑɑ.