Sɑkɑlɩ 13

1

2

3

4

5

6

7

8

9

10

11

12

13

14

¹Ḿpʋɣʋ Tɑcɑɑ yɔɣɔtɑɑ sɩ: Wɑɑtʋ ɩnɩ ɩ tɑɑ kɛ́ sɛɛlʋ nɔɣɔlʋ ɩ kɑ́ tʋlɩ. Ɩ kɑ́ nyɑɑlɩ Tɑfiiti lʋlʋɣʋ nyə́mɑ nɑ Yosɑlɛm nyə́mɑ mɛ mə ɩsɑɣɑtʋ.

²Ɩlɛnɑ Pə tənɑ pə tʋ tɑsɑ yɔɣɔtʋɣʋ sɩ: Wɑɑtʋ ɩnɩ ɩ tɑɑ kɛ́ mɑɑ kpiisi tɛtʋ tənɑ tɑɑ tɩɩŋ tənɑ, nɑ ɩ kɔtəlɑɑ. Nɔɣɔlʋ kɑɑ tɑsɑ ɩ hətɛ yɑɑʋ. Mɑɑ ləsɩ lɑɑtʋ kʋnyɩɩlʋɣʋ kɛ mə tɑɑ.

³Hɑlənɑ ye pə cəpɑ mə tɑɑ wei nɑ ɩ́ yɔɣɔtɩ pɔpɔtʋ tɔm nɑtəlɩ, ɩ cɑɑ nɑ ɩ too pɑɑ tɔmɩ-ɩ sɩ: Timpi n looliɣinɑ Ɩsɔ Tɔm tɔ, ɩsɩɩ ń səpɑ. Pɑ mɑɣɑmɑɣɑ pɑɑ tɩɩ kʋnɑ-ŋ pə təlɑtɛ.

⁴Wɑɑtʋ ɩnɩ ɩ tɑɑ Ɩsɔ kʋyɔɣɔtʋtʋ tɛləsəlɑɑ kɑ́ wɛɛnɑ pɑ tɔm kpɑɑlʋɣʋ, nɑ pɑ toosee heeluɣu fɛɛlɛ. Hɑlɩ pɑ kɑɑ tɩɩ suu pɑ təmlɛ tokonɑɑ mpɑ pɑ puɣusiɣinɑ yəlɑɑ tɔ.

⁵Pɑɑ wei ɩ kɑ́ tɔ sɩ: Mɑ kɛ́ hɑ́tʋ kɛ́, mɑ tɑ kɛ Ɩsɔ kʋyɔɣɔtʋtʋ tɛləsʋlʋ. Hɑtoo mɑ pəcɑɑtʋ kɛ mɑ wɛnɑ tɑwɑ nɑ mɑ́ hɑləɣɩ.

⁶Ye pɑ pɔɔsɑ-ɩ sɩ: Pepe kʋnɑ-ŋ nyɑ́ lɑŋlɛ tɑɑ kɛ́ ɩsəntɔ? Ɩlɛ ɩ cɔ sɩ: Mɑ nɑ mɑ cɑmnɑnɑɑ kɛ́, nɑ pə́ kʋ-m mpʋ.

⁷Ḿpʋɣʋ Pə tənɑ pə tʋ Tɑcɑɑ tɔmɑ sɩ: Lɑɣɑtɛ nyɑ́, kʋ mɑ sənlʋ wei ɩ kɛ́ tiikilu tɔ, nɑ heeŋ yɑ yem yem. Ɩlɛnɑ mɑ́ kʋlɩ ɩwɛɛsɩ tɔɔ.

⁸Tɛtʋ heeŋ hɔɣɔləŋ nɑɑlɛ kɑ́ sɩ nɑ pə́ kɑɑsɩ kʋlʋmʋɣʋ tike.

⁹Mɑɑ tɑɣɑnɩ kʋkɑɑsɑɑ mɛ ɩsɩɩ pɑ wɔkʋɣʋ wʋlɑ nɑ liɣitee nyəɣətʋ kɛ kɔkɔ nɑ pə́ nyɑɑlɩ-tɩ tɔ. Ɩlɛnɑ ɩ́ sələmɩ-m nɑ mɑ́ mʋ, nɑ mɑ́ yɑɑ-mɛɣɛ mɑ yəlɑɑ. Ɩlɛnɑ mɩɩ yɔɣɔtəɣɩ sɩ: Tɑcɑɑ kɛlɛ Ɩsɔ.