Ʒekaria 10

1

2

3

4

5

6

7

8

9

10

11

12

13

14

¹Ŋoŋe Wofuŋ numucnepie hoe i dameŋ‐ticnaoa hezejec. Eki hâcne mume karorac fuaekac â hoe heekac, erâ ekizia wâc mume ŋic ru sâc gie‐jeŋicko nânâ monʒaŋ fua‐jareekac.

²Ɋâŋ qâqâtâc jaŋe sioc eeŋgopieŋ â qaŋgec bapazi findaŋdâŋ burecne mueŋgopieŋ, ehuc guŋ fâri tâmiric manahuc irec fuŋne mueŋgopieŋ, â ŋic bâbâmiriŋ dâŋ racne jazaeŋgopieŋ. Irec hâcne ŋic jaŋe lama iŋucne qac qâsoric eeŋgopieŋ, ehuc soŋaŋ tâmiric jueŋgopieŋte ʒârâ ʒâpâ faio feeŋgopieŋ.

³“No soŋaŋ jaŋe aaric mana‐jarepemu, â micne jaŋe ine okacne bazu‐jarepemu, Anutu Tâpiri Ɋuŋɋasaŋ Wofuŋ no lamafâc‐nane, Juda kikefuŋ hâcne, jaŋe hone maiŋ ejarepemu, erâ ʒikao sanaŋkerâ domaniŋte bafic‐jopapemu.

⁴Eme guru‐jeŋickonec ŋic kecʒiŋuczi fuarâ juniŋmu: Ŋicwofuŋ, â momori jaŋere micne, erâ ŋic fekicne â tâpirihec sasawa.

⁵Jaŋe mâmâc jaha ŋic qac momori iŋucne ʒika qahuc râsifâc‐jeŋic sohoŋko âte utuc‐jopaniŋmu. Eme Wofuŋzi jaŋehec juekacte sanaŋkerâ râsi jopapie becâsicko rara ŋic jaŋe qurutuaniŋmu.

⁶“No Juda kikefuŋ basanaŋ‐jopahuc Josefe kikefuŋ bafic‐jopapemu. No busâqoc mana‐jarehuc bârisiec‐jopapemu, eme jaŋe mi behec‐jopapo irec sâcko junʒepieŋ; no Wofuŋ Anutu‐jeŋic jukopacte dâŋjeŋic manapemu.

⁷Eme Eferaim ŋic jaŋe momori ŋic tâpirihec iŋucne erâ junʒepieŋ, ehame waiŋ opâ nârâ maŋjeŋiczi bubiaŋ manaeŋgopieŋ irec sâc enʒepieŋ. Eme naru motecfâc‐jeŋic jaŋe honerâ ʒeri eniŋmu, jaŋe Wofuŋte erâ ʒeri bari eniŋmu hâcne.

⁸“No firuec‐jopapo, irec hetumaŋ‐jopapemurâ qeŋ qajarepemu, eme ŋic ʒare‐jeŋic mârâc jaha fowec irec sâc jaha mocwâc fuazejec.

⁹No jâmbomac ŋicne ŋicne jaŋere ŋondeŋko bâtâtiec‐jopape rambiŋ, jaŋe ine mâreŋ ʒoricko juhuc nore manasueŋgopieŋte juku naru motecfâc‐jeŋic jaŋehec risienʒepieŋ.

¹⁰No Aigita mâreŋkonec jowac‐jopape mâreŋfuŋ‐jeŋicko risienʒepieŋ, erâ Asiria mâreŋkonec hetumaŋ‐joparâ Gileade â Lebanoŋ mâreŋko râec‐jopape hae mâreŋ i fusucma sâqorenʒepieŋ.

¹¹Jaŋe Aigita hâwec fotâcnehapie Wofuŋzi hâwec siri bâniniŋkeocmu, ehame Nilu opâre ʒâkâŋzi ʒicke kereŋ eocmu. Asiria maŋfefe‐ticne i bawahaocmu, â Aigita ŋicwofuŋte gunu i rârieocmu.

¹²Jaŋe Wofuŋte erâ sanaŋkeniŋmu, erâ ʒâŋe biŋe‐ticnere manasuhuc juniŋmu,” Wofuŋte dâŋ iŋuc.