Sɑkɑlɩ 4

1

2

3

4

5

6

7

8

9

10

11

12

13

14

¹Ḿpʋɣʋ ɩsɔtɑɑ tillu wei ɩ yɔɣɔtəɣənɑ-m tɔ, ɩ kɔmɑ nɑ ɩ́ ciɣiti-m ɩsɩɩ pɑ feesuɣu yʋlʋ wei ɩ tooki tɔ.

²Ɩlɛnɑ ɩ́ pɔɔsɩ-m sɩ: Pepeɣe n nɑɑkɩ? Mɑ cɔ-ɩ sɩ: Mɑ nɑɑkɩ wʋlɑ fətəlɑ. Nɑ nim tətʋlɛ kɛ ɩ nyʋɣʋ tɑɑ. Nɑ fətəlɑnɑɑ kɛ nɑɑtosompɔɣɔlɑɣɑ, nɑ pɑ kpoŋkpontu nɑ tə kɔkɔ.

³Pə kɑɑsɩ nɑ Olifi tɩɩŋ nɑɑlɛ səŋɑ tənɑɣɑ ŋwɑɑŋ nɑ mpəlɛ tɔɔ.

⁴Ntɛnɑ mɑ́ pɔɔsɩ ɩsɔtɑɑ tillu wei ɩnɩ ɩ yɔɣɔtənɑ-m tɔ sɩ: Mɑ cɑɑ, pepeɣe pə tənɑ ɩsəntɔ pə hʋləɣɩ?

⁵Ɩlɛnɑ ɩ́ pɔɔsɩ-m sɩ: Ye mpʋ n tɑ nyɩ? Mɑ sɩ: Aɑɩ, mɑ cɑɑ.

⁶Mpʋɣʋlɛ sɩ, Tɑcɑɑ heelɑ-m tɔm sɩ mɑ́ tɛləsɩ Solopɑpɛɛlɩ sɩ: Pə tɑɣɑ toŋ yɑɑ nɑntʋ tɑɑ ɑlɑɑfəyɑ tɔm. Amɑ mɑ feesuɣu toŋ kɛ́. Pə tənɑ pə tʋ mɑ́ mɑ yɔɣɔtənɑ mpʋ.

⁷Pɑɑ wɑhɑlɑnɑɑ kɑɑwɑ ɩsɩɩ pʋɣʋ, Tɑcɑɑ kɑ́ yɔkɩ-wɛɣɛ. Solopɑpɛɛlɩ kɑ́ ləsɩ kɑntəkɑɣɑ pəlɛ nte pɑ kʋnɑ Ɩsɔ təsɛɛlɛ nyʋɣʋ tɔ. Ɩlɛnɑ yəlɑɑ wiliti teu.

⁸Ḿpʋɣʋ Tɑcɑɑ heelɑ-m sɩ:

⁹Solopɑpɛɛlɩ kɑ́ ŋmɑnɑ Ɩsɔ təsɛɛlɛ tənɛ nɑ ɩ niŋ nɑ ɩ́ tɛ-tɛ. Wɑɑtʋ ɩnəɣɩ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m mə kiŋ.

¹⁰Mpɑ pɑ nyənəɣɩ yem kɛ́ təmisi sənɛ tɔ, pɑ lɑŋɑ kɑ́ hʋlʋmɩ wɑɑtʋ wei pɑɑ nɑ́ kʋmɑɣɑsʋɣʋ kɛ Solopɑpɛɛlɩ niŋ tɑɑ tɔ. Fətəlɑnɑɑ nɑɑtosompɔɣɔlɑɣɑ ɩnəɣəlɛ Tɑcɑɑ ɩsɛ nnɑ ɩ nɑɑkənɑ tɛtʋ tənɑ tɔ.

¹¹Ḿpʋɣʋ mɑ́ pɔɔsɑ-ɩ sɩ: Olifinɑɑ tɩɩŋ wei ɩ səŋnɑ ḿpʋɣʋ fətəlɑ ŋwɑɑŋ nɑ ɩ mpəlɛ tɔɔ?

¹²Ɩlɛnɑ mɑ́ tɑsɑ pɔɔsʋɣʋ sɩ: Olifinɑɑ tɩɩŋ wei kɛlɛ wʋlɑ fusi nsi sɩ tɑɑ nim lɩɩkɩ tɔ?

¹³Ntɛnɑ ɩ́lɛ́ ɩ́ pɔɔsɩ-m sɩ: N tɑ nyɩ? Mɑ sɩ: Aɑɩ.

¹⁴Ḿpʋɣʋ ɩ́ cɔ-m sɩ: Olifinɑɑ tɩɩŋ ɩnəɣəlɛ ɑpɑlɑɑ nɑɑlɛ wei pɑ pəlɑ nim nɑ pɑ́ kpɑ-wɛɣɛ Pə tənɑ pə tʋ Tɑcɑɑ təmlɛ nyə́mɑ tɔ.