Sɑkɑlɩ 1

1

2

3

4

5

6

7

8

9

10

11

12

13

14

¹Pɛɛsɩ wulɑʋ sɔsɔ Tɑliyusi kɑwulɑɣɑ pənɑɣɑ nɑɑlɛ nyəŋkɑ, ɩsɔtʋ pəlefɛɩ nyəŋ, kɛ Tɑcɑɑ yɔɣɔtənɑ Pelekiyɑ pəyɑlʋ Sɑkɑlɩ. Ɩtoo sɑɑlɩ kɛlɛ.

²Sɩ ɩ́ heeli Ɩsɛɣɛlɩ nyə́mɑ sɩ: Pə tənɑ pə tʋ Tɑcɑɑ mɑ́, mɑ mʋnɑ mə cɔsɔnɑɑ kɛ pɑ́ɑ́nɑ́ kɛ́ təsəɣəsəɣɩ. Ɩ́ məlɩ mɑ kiŋ, ɩlɛnɑ mɑ́ɑ́ kɛɛsənɑ mə tɔɔ. Mɑ sɩɩ ḿpʋɣʋ mɑ nɔɣɔ kɛ́.

⁴Ɩ́ tɑɑ kɛɛnɑ mə cɑɑnɑɑ. Mɑɑ tɛmɑ mɑ kʋyɔɣɔtʋtʋ tɛləsəlɑɑ heeluɣu kɛ lɔŋtɑɑ sɩ pɑ́ tɛləsɩ-mɛ sɩ, ɩ́ lɔ mə tɔntɛ nɑ mə lɑkɑsɩ ɩsɑɣɑsɩ. Amɑ ɩ́ tɑ tisi nɑ ɩ́ mʋ mɑ tɔm nɑ ɩ́ nɩɩnɑ-m.

⁵Ɩ́ nyə́mɑ teu sɩ mə cɔsɔnɑɑ nɑ mɑ kʋyɔɣɔtʋtʋ tɛləsəlɑɑ mpɛ pɑ səpɑ.

⁶Pəyele mɑ kʋkpɑɑlətʋ nɑ mɑ kʋsəsɩɩtʋ nti tə tɔm mɑɑ heelɑ mɑ kʋyɔɣɔtʋtʋ tɛləsəlɑɑ sɩ, pɑ́ tɛləsɩ-mɛ tɔ, tə mɑɣɑnɑ-mɛɣɛ teitei kɛ́. Ɩlɛnɑ ɩ́ cɛkənɑ sɩ mə lɑkɑsɩ ɩsɑɣɑsɩ tɔɔ kɛ́ Tɑcɑɑ mɑ́, mɑ lɑpɑ-mɛɣɛ mpʋ. Ɩlɛnɑ ɩ́ lɑɣɑsɩ.

⁷Ḿpʋɣʋ Tɑcɑɑ yɔɣɔtənɑ Pelekiyɑ pəyɑlʋ Ɩsɔ kʋyɔɣɔtʋtʋ tɛləsʋlʋ Sɑkɑlɩ. Wulɑʋ sɔsɔ Tɑliyusi kɑwulɑɣɑ wɑɑtʋ tɑɑ kɛ́ ɩ yɔɣɔtənɑ-ɩ, pənɑɣɑ nɑɑlɛ nyəŋkɑ ɩsɔtʋ nɑɑnʋwɑ nɑ kʋlʋm nyəŋ kʋyɑkʋ hiu nɑ liɣiti wule.

⁸Ɩlɛnɑ pə́ lɑ́ Sɑkɑlɩ ɩsɩɩ toosee tɑkɑ nɑ ɩ́ nɑ́ nɔɣɔlʋ cɑɣɑ kpɑɣɑnʋsɛɛmɑɣɑ. Ɩlɛnɑ ɩ́ səŋɑ tiikɑsɩ nɑsəlɩ sɩ hɛkʋ kɛ tɛtɛkəlɛ nɑtəlɩ tə tɑɑ. Ɩ wɑɑlɩ kɛ́ kpɑɣɑnʋsɛɛmɑsɩ nɑ kpɑɣɑnʋhʋlʋmɑsɩ nɑ huluhuluŋ.

⁹Ntɛnɑ mɑ́ pɔɔsɩ ɩsɔtɑɑ tillu wei ɩ kɑ yɔɣɔtənɑ-m tɔ sɩ: Tɑcɑɑ, kpɑɣɑnəŋ ɩnɩ, ɩ kʋtoluɣu suwe? Mpʋɣʋlɛ sɩ: Mɑɑ kɛɛsɩ-ŋ.

¹⁰Ḿpʋɣʋ ɑpɑlʋ wei ɩ səŋɑ tiikɑsɩ hɛkʋ tɑɑ tɔ ɩ́ tɔmɑ sɩ: Tɑcɑɑ tilinɑ-wɛ sɩ, pɑ́ cɔɔ tɛtʋ.

¹¹Ntɛnɑ kpɑɣɑnəŋ cɑɣɑlɑɑ mpɛ pɑ kɛɛsəɣɩ ɩsɔtɑɑ tillu sɩ: Tə cɔɔwɑ tɛtʋ tənɑ. Amɑ hɛɛsʋɣʋ wɛnnɑ pɑɑ timpi, yoou fɛɩ tiili.

¹²Ntɛnɑ ɩsɔtɑɑ tillu nɔɣɔ təkpɑʋ sɩ: Tɑcɑɑ Pə tənɑ pə tʋ, pɩɩsɩ hiu nɑ nɑɑnʋwɑ kɔlɔ n mʋ Yosɑlɛm nɑ Yutɑ ɑcɑlɛɛ lɛnnɑ nɑ pɑ́ɑ́nɑ́. Pəlee kɛ́ n kɑ́ hʋlɩ-yɛɣɛ suulu?

¹³Mpʋɣʋlɛ Tɑcɑɑ heelɑ-ɩ tɔm nɑɑni nyəntʋ nti tə kpɑɑsəɣɩ ɑpɑlʋtʋ tɔ.

¹⁴Ḿpʋɣʋ ɩsɔtɑɑ tillu wei ɩ yɔɣɔtɑɣɑnɑ-m tɔ ɩ tɔmɑ-m sɩ: Kpɑɑlɩ Pə tənɑ pə tʋ Tɑcɑɑ mɑ́ mɑ tɔm. Mɑ sɔɔlɑ Yosɑlɛm nɑ Siyɔŋ pulɑɣɑ kɛ́ ɩsɩɩ yem nɑ kpɛtɛ.

¹⁵Amɑ mɑ tɑɑ kpɑɑnɑ piitimnɑɑ mpɑ mɛ ɩ́ hɔŋ mə tɩ tɔɣɔ. Mpi tɔ, pəciiu kɛ mɑ mʋnɑ Ɩsɛɣɛlɩ nɑ pɑ́ɑ́nɑ́. Ɩlɛnɑ mɩɩ pəsəɣɩ-ɩ ncɑɑlɛ.

¹⁶Pə tɔɔ kɛ́ mɑ kpɑɑləɣɩ sɩ mɑɣɑ Pə tənɑ pə tʋ Tɑcɑɑ, mɑɑ məlɩ Yosɑlɛm. Mɑɑ lɑ kʋpɑntʋ nɑ ɩ́ tɑɣɑnɩ Ɩsɔ təsɛɛlɛ kɛ ŋmɑʋ, nɑ ɩ́ kʋsɩ ɩcɑtɛ tɔtɔ.

¹⁷Ḿpʋɣʋ ɩsɔtɑɑ tillu tɑsɑ-m heeluɣu sɩ: Kpɑɑlɩ tɔtɔ sɩ, mɑɑ tɑsɑ Yosɑlɛm kɛ ləsʋɣʋ. Mɑɑ wɑɑsɩ Siyɔŋ nɑ pə́ cɑɣɑnɑ mə ɑcɑlɛɛ təpɔkɛɛ.