Annabi Sakari 10

1

2

3

4

5

6

7

8

9

10

11

12

13

14

¹Wo xa Alatala maxandi ɲɛmɛ tɛmui. Alatala fama nɛ tunɛ belebele ra wo bɛ, alako wo xa xɛe xa fan.

²Kuyee wule falama, sematoee mu nɔndi toma, e xiyee fasarima wule ra, e xa madundui fufafu na a ra. Na birin bara a niya ɲama xa lɔɛ alɔ xurusee. E na tɔɔrɛ kui barima xuruse dɛmadonyi mu na e bɛ.

³N bara xɔnɔ na xuruse dɛmadonyie ma. N e xa yareratie ɲaxankatama nɛ. Yudaya luma nɛ alɔ Mangɛ Alatala xa xurusee, a mɛɛnima nɛ e ma. E fama nɛ binyɛ sɔtɔde, alɔ sɔɔri mangɛ xa soe.

⁴Mixi nde kelima nɛ Yudaya naxan misaalima gɛmɛ ra banxi tixi naxan fari, naxan misaalima wuri ra kiri banxi xirixi naxan na, naxan misaalima xali geresose ra. Mangɛ birin fatanxi Yudaya bɔnsɔɛ nan na.

⁵Yudayakae findima nɛ sɛnbɛmae ra, naxee e yaxuie maboronma gere kui, barima Alatala na e fɛ ma. E yaxuie xa soe ragimae luma nɛ yaagi kui.

⁶«N Yudaya bɔnsɔɛ xun nakelima nɛ, n Yusufu bɔnsɔɛ rakisi, n e xa taae yailan, barima n bara kinikini e ma. E fama nɛ lude alɔ n mu e rabɛɲin. E Marigi Alatala nan n na, n e xa duba suxuma nɛ.

⁷Efirami bɔnsɔɛ fan findima nɛ sɛnbɛmae ra. E sɛɛwama nɛ dangife siisilae ra. E xa die na birin toma nɛ, e fan ɲɛlɛxin. E birin bɔɲɛ sɛɛwama nɛ Alatala xa fe ra.

⁸N nan n ma ɲama maxilima nɛ, n xa e xun sara, e xa wuya dangife singe ra.

⁹Hali n to e rayensenxi sie ya ma, e e ratuma nɛ n ma fe ma yire makuye. E tan nun e xa die kisima nɛ, e man fa gbilen e xɔnyi.

¹⁰N e rafama nɛ kelife Misira bɔxi ma, n e malan kelife Asiriya bɔxi ma. N man Galadi nun Liban bɔxi fima nɛ e ma, kɔnɔ e kɔnti dangima nɛ na birin na.

¹¹E xa tɔɔrɛ bara lu alɔ baa mɔrɔnyie, kɔnɔ Ala na mɔrɔnyie ragoroma nɛ. Nili xure bara a niya e xa lu konyiya kui, kɔnɔ na xure bara xɔri. Asiriya xa yɛtɛ igboɲa goroma nɛ, Misira xa mangɛya ɲɔn.

¹²N tan nan e sɛnbɛ soma, e fama nɛ ɲɛrɛde n xili ra.» Alatala xa masenyi nan na ki.