Pɑɑsǝnlɑɑ 4

1

2

3

4

5

6

7

8

9

10

11

12

13

14

15

¹Ɩhuti sǝpɑ, ɩlɛnɑ Ɩsɛɣɛlɩ nyǝ́mɑ tɑsɑ lɑpʋ kɛ mpi pǝ tɑ mɑɣɑ Tɑcɑɑ tɔ.

²Ḿpʋ́ɣʋ́ Tɑcɑɑ tʋ-wɛɣɛ Kɑnɑɑŋ nyǝ́mɑ wulɑʋ Yɑpɛŋ wei ɩ tɔkɑɣɑ kɑwulɑɣɑ kɛ Hɑsɔɔ tɔ ɩ niŋ tɑɑ. Ɩ yoou wulɑʋ kɛ pɑ yɑɑkɑɣɑ Siselɑ nɑ ɩ́ wɛ Hɑlose-Koyim.

³Yɑpɛŋ ɩnɩ ɩ yoou kɛɛkɛnɑɑ kɑ wɛ nɑsǝnɑɑsɑ nɑ nɩɩnʋwɑ (900) kɛ́. Ḿpʋ́ɣʋ́ ɩ nyǝŋsɑ Ɩsɛɣɛlɩ nyǝ́mɑ ɩsɛ kɛ pɩɩsɩ hiu tǝcu. Ɩlɛnɑ pɛlɛ pɑ́ wiinɑ Tɑcɑɑ sɩ ɩ́ wɑɑsɩ-wɛ.

⁴Lɑpitɔtɩ ɑlʋ Tepolɑ kɑ kɛnɑ Ɩsɔ kʋyɔɣɔtʋtʋ tɛlǝsʋlʋ nɑ ɩ́ hʋʋkɩ Ɩsɛɣɛlɩ nyǝ́mɑ kɛ pɑ tɔmnɑɑ kɛ wɑɑtʋ ɩnɩ ɩ tɑɑ.

⁵Petɛɛlɩ nɑ Lɑmɑ pɑ hɛkʋ tɑɑ timpi pɑ yɑɑ sɩ Tepolɑ Pɑɑʋ kɛ Ɩfǝlɑyim pʋɣʋ tɑɑ tɔɣɔ ɑlʋ ɩnɩ ɩ pukɑɣɑ nɑ ɩ́ cɑkɩ, nɑ ɩ́ tɑɣɑnǝɣɩ Ɩsɛɣɛlɩ nyǝ́mɑ tɔmnɑɑ.

⁶Ḿpʋ́ɣʋ́ kʋyɑkʋ nɑkʋlɩ Tepolɑ ɩnɩ ɩ tilɑ Apinowɑm pǝyɑlʋ Pɑlɑkɩ kiŋ kɛ Ketɛɛsɩ kɛ Nɛfǝtɑli tɛtʋ tɑɑ, nɑ ɩ́ heeli-ɩ sɩ: Ɩsɛɣɛlɩ Ɩsɔ Tɑcɑɑ tɔmɑ sɩ ń lǝsɩ Nɛfǝtɑli nɑ Sɑpulɔŋ pǝ nyǝ́mɑ tɑɑ kɛ́ ɑpɑlɑɑ iyisi nɑɑnʋwɑ (10000) nɑ ń ponɑ-wɛɣɛ Tɑpɔɔ pʋɣʋ tɔɔ.

⁷Mɑɑ yele nɑ Yɑpɛŋ yoolɑɑ wulɑʋ Siselɑ kuu ɩ yoolɑɑ nɑ ɩ kɛɛkɛnɑɑ nyǝɣǝtʋ nyǝ́mɑ nɑ pɑ́ lɩɩ Kisɔŋ lɔɔʋ tɑɑ sɩ pɑ yookinɑ-ŋ, ɩlɛnɑ mɑ́ tʋ-wɛɣɛ nyɑ́ niŋ tɑɑ.

⁸Tǝnɑɣɑlɛ Pɑlɑkɩ cɔwɑ Tepolɑ sɩ: Ye mɑ nɑ-ŋ tɩɩ ponɑ, ɩlɛ mɑɑ polo. Amɑ ye n kɑɑ polo, ɩlɛ mɑɑ puki.

⁹Mpʋɣʋlɛ Tepolɑ sɩ: Mɑ nɑ-ŋ tɩɩ polo yɑɑ. Amɑ pɑɑ n tɑlɑ timpi nɔɣɔlʋ kɑɑ sɑ-ŋ kɛ́. Mpi tɔ, ɑlʋ niŋ tɑɑ kɛ́ Tɑcɑɑ kɑ́ tʋ Siselɑ. Ɩlɛnɑ Tepolɑ kʋlɩ nɑ ɩ́ nɑ Pɑlɑkɩ pɑ́ tɛɛ Ketɛɛsɩ.

¹⁰Ḿpʋ́ɣʋ́ Pɑlɑkɩ kpeɣelɑ Nɛfǝtɑli nɑ Sɑpulɔŋ nyǝ́mɑ, nɑ yǝlɑɑ iyisi nɑɑnʋwɑ (10000) tisi sɩ pɑɑ tǝŋɩ-ɩ, nɑ Tepolɑ mɑɣɑmɑɣɑ nɑ́ɑ́ polo tɔtɔ.

¹¹Keni tʋ Hepɛɛ kɑ fɑɣɑnɑ Keni nyǝ́mɑ lɛlɑɑ mpɑ pɑ kɛ́ Moisi yǝtɩ Hopɑpɩ pǝyɑlɑɑ tɔɣɔ. Ɩlɛnɑ ɩ́ polo ɩ́ siki Sɑɑnɑnim tɩɩŋ sɔsɔɔŋ tɛɛ kɛ́ Ketɛɛsɩ kiŋ.

¹²Ḿpʋ́ɣʋ́ Siselɑ nɩɩwɑ sɩ Apinowɑm pǝyɑlʋ kpɑwɑ Tɑpɔɔ pʋɣʋ tɔɔ.

¹³Ɩlɛnɑ ɩ́ koti ɩ yoolɑɑ nɑsǝnɑɑsɑ nɑ nɩɩnʋwɑ (900) kɛ́ Hɑlose nɑ pɑ́ tɛɛ Kisɔŋ lɔɔʋ tɑɑ.

¹⁴Ntɛnɑ Tepolɑ tɔ Pɑlɑkɩ sɩ: Polo pɑ tɔɔ, sɑŋɑ kɛ Tɑcɑɑ tʋɣɩ Siselɑ kɛ nyɑ́ niŋ tɑɑ, nɑ ɩ mɑɣɑmɑɣɑ ɩ kɑ́ wɛɛnɑ nyɑ́ wɑɑlɩ. Ḿpʋ́ɣʋ́ Pɑlɑkɩ tiiwɑ Tɑpɔɔ pʋɣʋ nɑ ɩ wɑɑlɩ kɛ́ yoolɑɑ iyisi nɑɑnʋwɑ (10000).

¹⁵Pɑ nikɑ yoou, ɩlɛnɑ Tɑcɑɑ yele nɑ Siselɑ yoolɑɑ nɑ ɩ kɛɛkɛnɑɑ pɑ́ kuu-tɛ. Hɑlǝnɑ Siselɑ lɩɩ ɩ kɛɛkɛ tɑɑ, nɑ ɩ́ se nɔɔhɛɛ.

¹⁶Ɩlɛnɑ Pɑlɑkɩ tʋ ɩ kolontunɑɑ nɑ pɑ kɛɛkɛnɑɑ wɑɑlɩ, nɑ ɩ́ tɑnɑ-wɛɣɛ Hɑlose. Nɑ ɩ́ hɛɛlɩ pɑ yoolɑɑ tǝnɑ pǝ tɑ sɔɔ pɑɑ ɩlɔɣɔʋ pǝyɑɣɑ.

¹⁷Ḿpʋ́ɣʋ́ Siselɑ sewɑ nɑ ɩ́ polo Keni tʋ Hepɛɛ ɑlʋ Yɑyɛɛ tɛ. Mpi tɔ, wulɑʋ Yɑpɛŋ yǝlɑɑ nɑ Hepɛɛ nyǝ́mɑ pɑɑ wɛ tǝmɑ nɑ leleŋ kɛ́.

¹⁸Ɩlɛnɑ Yɑyɛɛ lɩɩ nɑ ɩ́ sǝŋ Siselɑ nɑ ɩ́ tɔmɩ-ɩ sɩ: Tɑ cɑɑ, sʋʋ mɑ tɛ cǝnɛ, tɑɑ nyɑnɑ pʋlʋ. Siselɑ sʋʋwɑ Yɑyɛɛ cokǝle tɑɑ, ɩlɛnɑ ɩ́ hǝntɩ nɑ ɑlʋ ɩnɩ ɩ́ wɑɑsɩ ɩ tɔɔ kɛ́ pʋʋɣʋ.

¹⁹Ḿpʋ́ɣʋ́ ɑpɑlʋ ɩnɩ ɩ tɔmɑ-ɩ sɩ: Lʋkɔtʋ tɔkɑ-m kɛ́, hɑ-m lʋmɑɣɑ nɑ mɑ́ nyɔɔ. Ɩlɛnɑ ɑlʋ cosi nɑɑlǝm kɛ huluɣu tɑɑ nɑ ɩ́ hɑ-ɩ nɑ ɩ nyɔɔ, nɑ ɩ́ tɑɣɑnɩ-ɩ pʋʋɣʋ wɑɑsʋɣʋ.

²⁰Mpʋɣʋlɛ Siselɑ tɔmɑ ɑlʋ ɩnɩ sɩ: Sǝŋ cokǝle nɔnɔɣɔ, nɑ wei ɩ́ pɔɔsɑ-ŋ sɩ nɔɣɔlʋ wɛ cǝnɛ? Ɩlɛ n cɔ sɩ, ɑɑɩ.

²¹Siselɑ kɑ kɑwɑɣɑ tǝtɔɣɔtɔɣɔ, ɩlɛnɑ ɩ́ too ɩsɩɩ ɩ sǝpɑ. Ḿpʋ́ɣʋ́ Yɑyɛɛ kpɑɣɑ pɔɔŋ cokǝle kɑŋkɑnɑɣɑ nɑ kɑŋkɑnʋɣʋ, nɑ ɩ́ kpǝtǝnɑ-ɩ tǝhɛɛ nɑ ɩ́ kɛɛsǝnɑ ɩ lǝkpɑɣɑsɑɣɑ tɔɔ nɑ ɩ́ kɑ́ nɑ ɩ́ kpǝnɑ tɛtʋ nɑ Siselɑ sɩ.

²²Pǝ wɑɑlɩ kɛ́ Pɑlɑkɩ sewɑ Siselɑ wɑɑlɩ nɑ ɩ́ tɑlɑ Yɑyɛɛ tɛ nɑ Yɑyɛɛ lɩɩ nɑ ɩ́ tɔmɩ-ɩ sɩ. Kɔɔ, mɑɑ hʋlɩ-ŋ yʋlʋ wei n pɛɛkǝɣɩ tɔ. Pɑlɑkɩ sʋʋ cokǝle tɑɑ, ɩlɛnɑ ɩ́ mɑɣɑnɑ ɩ hǝntɑ ɑtɛ tǝcɔmm, nɑ kpɑ́tʋ́ɣʋ́ tʋʋ ɩ lǝkpɑɣɑsɑɣɑ tɑɑ nɑ ɩ́ sǝpɑ.

²³Kʋyɑkʋ ŋkʋɣʋ Ɩsɔ yelɑɑ nɑ Ɩsɛɣɛlɩ nyǝ́mɑ kǝlɩ Kɑnɑɑŋ wulɑʋ Yɑpɛŋ.

²⁴Ḿpʋ́ɣʋ́ Ɩsɛɣɛlɩ nyǝ́mɑ kɑɑsɑ pɑ tǝɣɩ teu nɑ tǝhɛɛ tǝhɛɛ pɑ́ kɔɔ pɑ́ tɛɛsǝnɑ Kɑnɑɑŋ wulɑʋ kɛ kʋɣʋ.