1Ehut isai madi tama Israel dabego te Genuai Bidi Godigo gedude dwai sę ma ilali.
2Tama tibaso, Genuai Bidigo te Kenan gavman tuni bidi Jabingo te augwali aiyaba elalumainu ilali. Te tuni bidigo te Hasor hanu tonaluali. Tama aga sę tonalubo te polalubo bidi Sisera te aga ami bidi dabego ofisa bidi dao. Aga te bulu Hasoret Hagoim tede bidali.
3Jabin agai hwįbo nai te bidi sese hauwa 900 te karis ain elaluai. Tama agai te Israel dabe dodolama mu tolaluali, tama augwali subigila eliyu, tama doliyu idubadi, te kibu be bidi sese deli bidai. Tama te Israel dabe augwali tau somainu te Genuai Bidiba gela wali.
4Te sogo te nosali pedelabo sę po pusali profet we me deli bidai, te we nogi Debora. Te bidi me deligo we, te bidi aga nogi Lapidot. Te sogo te we Deborago te Godigo homude mabo kolesaga te po te Israel dabebolo ola mawai.
5Aga te ni me deli te ni pam dologode dulalu bidibadi, tama te Israel dabe agaba aselama, tama agai augwaligo po tų dodolomainu eyu, augwaligo agai po odagasiyu yali. Te ni te bulu Rama me Betel te Efraimgo bulu du tomode elaluali.
6Tama Deborago po te Barakba ola tolali, te Abinoamgo ogwa da, te Naptali hanigo hanu Kedes te badu bidali. Tama Deborago agabolo te tiwai po wali, “God, te dago Genuai Bidigo, nagebolo te po wainogo yali: ‘Nage pelama, te Naptaligo hanide, me Sebulungo hanide te bidi sese umabo bidi e tama bidi, te 10,000 bidi dabe sigi pelama, tama augwali te bulu du Tabor teba sisinao,’ wali.
7‘Te eno te gavman tuni bidi Jabingo sę ebo polalubo ofisa bidi Sisera, te aga ami bidi dabe dali odasa asiyu, te nage dali te wę Kisonba hwįgulaibao,’ wali. ‘Aga te aga karis dabe me te aga ami bidi dabe dali asaibao,’ wali, ‘tiali goli tagalao, te eno augwali te dagego nogoba mawaibao,’ Genuai Bidigo te po wali.” Deborago te po te bidi Barakbolo pusali.
8Tama Barakgo Deborabolo te po wali, “Te nage ena dali asobaso da, te ena paibao. Tiali goli te nage asisąbaso da, te ena me pogobeo,” wali.
9Tama Deborago po wei ponoyu, te tiwai po wali, “Tialima, te ena nage dali pelama, tama nago te wąbi hwįbo bomogo te aiyaba elaluaibao. Tiali goli, te nago naga genuai nogi ugwaba me sogobeo, magi baso meni, Genuai Bidigo te hwįbo tobolu bidi Sisera te we me deligo nogoba mawaibao,” wali. Tialima, Debora hogodama, tama Barak dali te bulu Kedesba pali.
10Barakgo te Sebulungo hani me, te Naptaligo hani me i olama, tama te Kedes hanuba pali, tama te bidi sese umabo 10,000 bidi te aga wali pai.
11Tama Debora me te aga dali pali. Te sogo te Kengo hani te bidi me deli Heber, te agai ugwa be te Kedes hanu sesegede sęnama bididuai, te moni ni te Sananim bulu pąde dao. Polobadu Hebergo te Kengo gasa hani tede taga soai, te Hobap aga deli kaneme hani, te Moses aga wąįgo aya dao.
12Te Siserago te Barak te Tabor bulu duba pali po odobaso,
13agai te hwįbo nai te bidi umabo te 900 karis ain me, te aga hani bage me asao olama i wali, tama augwali te wę Kison te badu te elalubo hanu te Haroset Hagoim te badu pai.
14Tama Deborago te Barakbolo te tiwai po wali, “Tegobao! Da pinao. Genuai Bidi te nage pabo badu te polasa pobao. Tama tibaso, te sogo Genuai Bidigo te nage tau selama, tama nago te Sisera aiyaba elalueibao,” te po wai. Tama po obaso, Barakgo te 10,000 bidi hauwa selama, tama augwaligo te Tabor bulu du tagalama, aiyaba dulali.
15Te Barak aga ami bidi dabe dali pedalubo sogo te augwaligo hwįbo sę hodolali, tialima Genuai Bidigo te Sisera me aga karis dali tigidali badi, te aga ami bidi dabe dali, te augwali wabo pabo bidi dabe tiwai ilama, subigila tedela pali. Tama Siserago te aga karis dabe taga peyu, tama aga wi pali.
16Barakgo te karis dabe me te ami bidi dabe dali pobeasa pidubadi, te Haroset Hagoim teba tagaligi pali. Tama Barakgo ami bidi dabego te Siserago ami bidi dabe tigidali ela silali. Te deli digi me bidibeo.
17Sisera wi peyu, te Hebergo we Jaelgo ugwa beba wi duala sigi pali, te Kengo haniba, magi baso meni, Jabin, te Hasor gavman tuni bidi, agai te Hebergo hani dabe dali abagi olama bidali.
18Tama Jael pelama, Sisera subaso, tama agai Siserabolo te po wai, “Genuai bidi, be tomoba asao,” wali. “Nage eno ugwa be tomoba asao,” wali. “Nage wi me elamuo.” Tama Sisera te ugwa be tomoba pelama, tama Jaelgo aga te ugwa blanket ugwa me deligo geme dologoba dualali.
19Tama Siserago Jaelbolo te po wai, “Eno dogoni wa palio. Eno homugo te nago wę ena menama tueio,” wali. Tialima, Jaelgo te kibu meme waligo nigai te botol wę dala mani, tama te ame pę elaluali tama agai te Sisera menama tuali. Nosali Jaelgo aga ma dualali.
20Tama Siserago Jaelbolo te po wali, “Nage te ugwa be sunumide dolaluao,” wali, “tama bidi me deli asama nagebolo hanalu wagasiyu, ‘Te bidi me deli tede bidibowe?’ wagasobaso da, teda nago te po weyu, ‘Menio’ po wao!” Siserago te po wali.
21Te Siserago tigi hagela gana mu ebaso, tama aga piali te bidi isibo tiwai mu elama mu piai. Tama Jaelgo te hama me deli me te pęwadage ni me deli badi, te ugwa be sesege te tǫde dau wabo ni pin, te ni me selama, tama aga te dua dua digi te Sisera pila mubo madiba pali. Tama agai te ni pin te hamago elama, te bidi Siserago tobolu tomoba enani, tama te ni bulu badu teda solama, te tǫba bida sigi pali. Tama Sisera isali.
22Tama Barakgo te Sisera gege asali sogo, Jaelgo te aga tiąba pelama, tama aga sulama, tama agabolo te tiwai po wali, “Nage asao!” wali. “Te eno nago te gegebo sę yali bidi te nagebolo eno ola mawaibao,” wali. Tama Barak te we dali te ugwa be tomoba pali. Tama agai suali, te Sisera isama, te tǫde pila mubo suai. Te enani ni te aga tobolude me elaluali.
23Te sogode Godigo te Israel dabe tau selama, te Kenan gavman tuni bidi Jabin aiyaba elaluali.
24Tama te Israel dabego te Kenan gavman tuni bidi Jabin dali bomo mu elama hwįnama, te augwaligo aga te tigidali mu dolama mu yalio.
