Tukpɔɠaaleʋe Nuiti 4

1

2

3

4

5

6

7

8

9

10

11

12

13

14

15

16

17

18

19

20

21

¹Eɠude zaa ʋoluma, Izelayɛle nuiti ti tɔɔzeini ga Ɠɔoɠɔ GALAGI wanama vai ɠɛa.

²Ɠɔoɠɔ GALAGI ti lɔɔni Kanaan masagi Yaɓin yeezu, nii é ɠɛni masadai ɠɛɛzu Ɠasɔɔl taa wolai unda. Ná-kɔɔɠɔ ɠundiɠii ɠɛni ga Sisela, é ɠɛni zeini Ɠalɔsɛte-Gɔyime.

³Kɔlu wotolo untaaʋuugɔ (900) ɠa é ɠɛni Yaɓin ya, é Izelayɛle nuiti gola zopele ɲɔuni, kona ʋuufelegɔ (20) laawu. Naati ti kpeei looni Ɠɔoɠɔ GALAGI woizu ga é ɓɔ ti ʋa.

⁴Naama ziɛgi zu, Lapidɔte anzai Deeɓola, GALA goo wo anzanui, é ɠɛni ga tukpɔɠaaleʋe nui Izelayɛle yooi zu.

⁵É ɠɛni zeizu dɔɔ wului wu, ti daasei pɛɛni ga Deeɓola ná-dɔɔ wului, Lama ta Ɓeetɛle ti yɔɠɔzuʋɛ, Efelayime ɠize yooi zu. Izelayɛle nuiti ti ɠɛni liizu pɔ bɛ faawo bo fai ma.

⁶Foloi ta, é keela leʋeni Ɓalake ma, Aɓinoame ná-doun zunui, Keedɛse nui, Nɛfetali yooi zu, é ɠɛ ma: «Wɛlɛ, Ɠɔoɠɔ GALAGI, Izelayɛle ná-GALAGI devei, nii veeʋɛ è ya: ‹Li è zunu waapuugɔ (10 000) laasei sɛʋɛ, Nɛfetali ná-bolodai zu, ta Zaɓulɔn ná-bolodai, è lo ti luɠɔ, wo li Taɓɔɔl gizei ma.

⁷Nà ʋaazu ga Yaɓin ná-kɔɔɠɔ ɠundiɠii Sisela è ʋɔ, ziɛ wolai Kison ʋɔ bɛ, ta ná-wotoloiti, ta ná-salaʋusuiti, nà ti lɔɔzu è yeezu.› »

⁸Ɓalake Deeɓola wooɠaaʋoteni, é ɠɛ ma: «Ni ɗa ʋilɛ pòlu, nà li, kɛlɛ ni è la ʋilɛni pòlu, gè la lia.»

⁹É gooɠaaʋoteni, é ɠɛ ma: «Nà ʋilɛsu è ʋolu, de li, kɛlɛ è la lɛbiya zɔlɔɔga pelei naa zu, è ɓɔɠɔ lɔɔzu su, mazɔlɔɔ Ɠɔoɠɔ GALAGI ɠa Sisela lɔɔzu anzanu yeezu.» Deeɓola ʋilɛni Ɓalake ʋolu, ti li Keedɛse.

¹⁰Ɓalake Nɛfetali ná-bolodai lolini Keedɛse, ta Zaɓulɔn ná-bolodai. Zunu waapuugɔ (10 000) ʋilɛni polu, Deeɓola ʋɛɛni ti ʋa, ti li.

¹¹Ma ziɛgi nɔ zu, Ɠeeɓɛɛl, Ken nui, ɓeteʋeni Ken nui zɔiti ba, Ɠɔɓaɓe mavofodaiti, Moize nɛkoi, é liini é ná-seɠe ɠotai lo Keedɛse, Saananime sɛne gului ɠobaʋɛ.

¹²É woni Sisela ma, ga Aɓinoame ná-doun zunui Ɓalake lɛa Taɓɔɔl gizei ma.

¹³Sisela ná-salaʋusuiti gaalɛɛni ba, ta kɔlu wotolo untaaʋuugɔ (900). Ná-kɔɔɠɔ nuiti kpein ti liini Ɠalɔsɛte-Gɔyime, ziɛ wolai Kison ʋɔ bɛ.

¹⁴Deeɓola ɠɛni Ɓalake ma: «De liina! Za ɠa Ɠɔoɠɔ GALAGI Sisela lɔɔzu la è yeezu, è pilɛ sɔlɔɔ ma. Ɠɔoɠɔ GALAGI ɓɔɠɔi ɠa losu è luɠɔ.» Ɓalake loni zunu waapuugɔ (10 000) untuɠɔ, ti Taɓɔɔl gizei yei.

¹⁵Ɠɔoɠɔ GALAGI Sisela ɓɛɛni ta ná-wotoloiti, ta ná-salaʋusuiti, é ti pɛ kpɛɛni ga boɠa zɔkpɔi Ɓalake luɠɔ. Sisela ɠulani ná-wotoloi zu, é ʋilɛ ɠɔɠɔa, é ʋela.

¹⁶Ɓalake ʋilɛni wotoloiti polu, ta salaʋusuiti, eyɛsu ti zeeli Ɠalɔsɛte-Gɔyime, ti Sisela ná-salaʋusuiti kpein paani. Nu ɠila kpalaa ge la ɠɛni ɠulani.

¹⁷Sisela ɓizɛni ɠɔɠɔa, é li Ken nui Eɓɛɛl anzai Yayɛle ná-seɠe ɠotai wu, mazɔlɔɔ ziilɛigi ma minazeɠegi ɠɛni Ɠasɔɔl masagi Yaɓin ta Ɠeeɓɛɛl ná-pɛlɛyeɠei ti zɔɠɔzu.

¹⁸Yayɛle ɠulani, é Sisela laaɠomi, é ɠɛ ma: «Lɛ ʋɛ, màliɠii, lɛ pɔ̀ bɛ. Mina lua!» É lɛɛni ná-seɠe ɠotai wu, naa pɛɛmazeɠei ʋɛɛni ma.

¹⁹É ɠɛni ma: «Soma è ziɛ ve zèa, gè ɓɔɔle, kpɔɔle wɔin ɠa mà.» É kɔlɔ woolei laalaoni nɔnɔi su, é fe zea, é ɓɔɔle, naa ʋolu, é seɠei ʋɛɛ ma.

²⁰Sisela ɠɛni ma: «Li è lo seɠe ɠotai laaʋɛ, ni nu a ʋaana, é è ɠaazaɠa ga: ‹Nu ɠa ʋɛ?›, ɗa ɠɛ ma: ‹Ɓa-o!› »

²¹Sisela wola ɓɔlɔa ɠɛni de, é ɲiini poun. Ɠeeɓɛɛl anzai Yayɛle, seɠe ɠotai ma wulu ɠaazoɓagi ta zeɠeni, é pɛɛ malitoi ʋa, é maaɓuɠa ba vaavaa, é kpadɔ nɔungi ʋa, é folokula é zooi zo, é zaani.

²²Ɓalake yɛni Sisela ɓɛɛzu, é ʋa ná, Yayɛle ɠulani é daaɠomi, é ɠɛ ma: «Ʋa gè zunui lɛ ga ɗe, nii è gaiziɛzu.» É lɛɛni naa ʋɔ bɛ, é Sisela ɠa laani zooi ma, saai, seɠe ɠotai ma wulu ɠaazoɓagi nɔungi volokulaai.

²³Zekana, naama volo ná, GALA ge zobogi veeni la Izelayɛle nuiti bɛ, ti pilɛ sɔlɔɔ Kanaan masagi Yaɓin ma.

²⁴Izelayɛle nuiti ta-zobogi liini ga wɔɔlɔa, Kanaan masagi Yaɓin laalɔɠɔma, eyɛsu ti-ma zuwu ɠaaleʋe.