Text copied!
CopyCompare
Luda yã takada kũ Bisã yão - YÃGƆ̃GƆ̃RINƆ

YÃGƆ̃GƆ̃RINƆ 4

Help us?
Click on verse(s) to share them!
1Kũ Ɛudu gà, Isarailanↄ ɛ̀ra ò yã kũ Dikiri yeiro kɛ̀ dↄ.
2Akũ Dikiri ń yía Kanaa kína Yabĩ kũ à vutɛna Azoa. A zĩ̀karinↄ gbɛ̃ zↄ̃kↄ̃ tↄ́n Sisera. A bɛn Arose Goyimu.
3À sↄ̃go mↄ̀pↄnↄ vĩ mɛ̀n wàa siikↄ̃ kũ basↄↄroo. À gbãna mↄ̀ Isarailanↄnɛ pãsĩpãsĩ ari wɛ̃̀ baro, akũ Isarailanↄ ↄ́ↄ dↄ̀ Dikirinɛ.
4Gↄrↄ birea nↄgbɛ̃ annabi kũ òdi pinɛ Debora, Lapido nanↄ de Isarailanↄ yãgↄ̃gↄ̃ri ũ.
5Àdi yã gↄ̃gↄ̃ńnɛ a domina lí gbáru Rama kũ Bɛtɛlio dagura Ɛflaimunↄ gukpiden. Isarailanↄ dìgↄ̃ gɛ́ a kĩnaa gwe.
6Akũ à Abinↄamu nɛ́ Baraki kũ à kú Kɛdɛsi, Nafatalinↄ bùsun sìsi à pìnɛ: Dikiri Isarailanↄ Luda pì ǹ futɛ ǹ gɛ́ Nafatalinↄ kũ Zɛbuluninↄ sɛ́ gbɛ̃nↄn dúbu kuri ǹ gɛ́ kũńwo Tabo kpia.
7Dikiri ni Yabĩ zĩ̀karinↄ gbɛ̃ zↄ̃kↄ̃ Sisera gátɛ à su kãao Kisↄ̃ swai kũ a sↄ̃gonↄ kũ a zĩ̀karinↄ dasidasi, gwen ani a nannɛ n ↄĩn.
8Akũ Baraki pìnɛ: Tó ĩni gɛ́ kũmao dé, mani gɛ́. Tó ĩni gɛ́ kũmao sↄ̃ro, mani gɛ́ro.
9Akũ Debora pì: Mani gɛ́ kũnwo, ama kũ n ò lɛ, adi kɛ n tↄ́ mɛ́ ani boro. Nↄgbɛ̃n Dikiri ni Sisera nanɛ a ↄĩ sà. Akũ Debora fùtɛ à gɛ̀ɛ kãao Kɛdɛsi.
10Akũ Baraki Zɛbuluninↄ kũ Nafatalinↄ kàkara Kɛdɛsi, akũ à dà zɛ́n gɛ̀sɛ kũ gbɛ̃nↄn dúbu kurii pìnↄ. Debora kú ń tɛ́.
11Keni buri Eberu bò Keninↄ bùsun yã, à sù à bùraa kàtɛ gbiri lí kũ à kú Zananimu gbáru Kɛdɛsi sarɛ. Keninↄ bi Musa anzure Obabu burinↄ domɛ.
12Ò pì Siseranɛ Abinↄamu nɛ́ Baraki gɛ̀ɛ Tabo kpia,
13akũ à a sↄ̃go mↄ̀pↄnↄ kàkara mɛ̀n wàa siikↄ̃ kũ basↄↄroo kũ zĩ̀kari kũ ò kú kãaonↄ. Bona zaa Arose Goyimu, ò gɛ̀ɛ Kisↄ̃ swai.
14Akũ Debora pì Barakinɛ: Ǹ gɛ́, zaakũ gbãran Dikiri ni Sisera nannɛ n ↄĩ. À de Dikiri dònnɛ arɛ kↄ̀ fá. Akũ Baraki kìpa Tabo kpia kũ zĩ̀kari gbɛ̃nↄn dúbu kurii pìnↄ.
15Dikiri tò Sisera kũ a sↄ̃gonↄ kũ a zĩ̀karinↄ fã̀kↄ̃a Baraki fɛ̃nɛdanɛ, akũ Sisera bò a sↄ̃gon à bàa lɛ̀.
16Baraki pɛ̀tɛ Sisera zĩ̀karinↄ kũ ń sↄ̃gonↄi ari Arose Goyimu. Gwen à ń dɛdɛn kũ fɛ̃nɛdao ń pínki, bee gbɛ̃ mɛ̀n do adi gↄ̃ro.
17Akũ Sisera bàa lɛ̀ gɛ̀sɛ à gɛ̀ɛ Keni buri Eberu nanↄ Yaɛli kuta kĩnaa, zaakũ Azo kína Yabĩ kũ Eberu bedenↄ kↄ̃ yã mà yã.
18Yaɛli bò à dàalɛ à pì: Ǹ mↄ́ ǹ gɛ̃ kpɛ́n, Baa. Ǹ gɛ̃! Ǹsun tó vĩna n kũro. Kũ à gɛ̃̀, akũ nↄgbɛ̃ pìi bↄrↄgↄ dàala,

19akũ Sisera pìnɛ: Ími tɛni ma dɛ. Ǹ ma gba í mà mi. Akũ à vĩ tùruu sɛ̀ à dã̀nɛ à mì, akũ à ɛ̀ra à bↄrↄgↄ dàala.
20Sisera pìnɛ: Ǹ zɛ kpɛ́lɛlɛa. Tó gbɛ̃ke sù à n la à pi, gbɛ̃ke kú la yá, ǹ pinɛ, oi.
21Kpasa'i a sɛ̀, a gbãna làka, akũ Eberu nanↄ Yaɛli kuta káro sɛ̀ kũ éreo à nào Siserai tɛɛnɛ, akũ à káro pìi pɛ̀ a mì'arɛ kpadoa à pà ari à gɛ̃̀ à gɛ̀ɛ à zĩtɛ kũ̀, akũ à gà.
22Baraki sↄ̃ àtɛn pɛ́tɛ Siserai, akũ Yaɛli bò à gɛ̀ɛ à dàalɛ à pì: Ǹ mↄ́ mà gbɛ̃ kũ ntɛni wɛtɛ mↄnnɛ. Kũ à gɛ̃̀ kpɛ́n, akũ à Sisera è wutɛna, à gà kũ károo pɛna a mì'arɛ kpadoa.
23Zĩ birea Luda Kanaa kína Yabĩ bùsa Isarailanↄnɛ.
24Akũ Isarailanↄ pãsĩkɛ tɛn kara ari ò gɛ̀ɛ ò Kanaa kína Yabĩ dɛ̀o. Akũ ń bùsuu gↄ̃̀ a laakariia ari wɛ̃̀ bupla.