MUDENNIMÙ 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi kɛ dɔ̀: A bo yɑ̀ di mmɔ̀nnì n yóó dɔɔ̀ dɛ̀ okpɑ̀ɑ̀tì. M bo ò dɔ̀ɔ̀nɛ̀ muwɛ̃rímú kòò di yóu kɛ̀ dí yɛ̀. M bo ò ɛ̃̀ṹtɛ́ kòo di bɛti.

²Kɛ̀ ti Yiɛ̀ nKuyie nyíɛ́ kóò nɑ̀kɛ́ kɛ dɔ̀: Míì tu di Yiɛ̀ nKuyie.

³M bɛnkɛmu m mɑ́ɑ̀ Abɑrɑhɑmmu nɛ̀ Isɑki nɛ̀ Sɑkɔbu n túmɛ̀ di Yiɛ̀ nKuyie nkɛ̀ kpeńnì. Bɛ̀ nɛ́ do í yɛ̃́ kɛ dò mmíì tu bɛ Yiɛ̀ nKuyie.

⁴N do bɛ̀ tɑunnɛ̀mu m mɑ́ɑ̀, kɛ dɔ̀ n yóó bɛ̀ duɔ́ nKɑnnɑhɑ̃ɑ̃, kɛtenkɛ̀ bɛ̀ do bo kɛ̀ kupɔ̀ɔ̀kù.

⁵N kèèmu Esibiti tenkɛ̀ kɔbɛ di fɛ̃́ũnkomɛ̀ kɛ̀ di kuɔ̀ nkɛ̀ n dèntɛní ti kó mɛtɑummɛ̀ kpɛ́í.

⁶Dɛɛ̀ te kɛ̀ n tu ɑ kɔtɛ kɛ́nɑ́kɛ́ Isidɑyɛɛribɛ kɛ dɔ̀ n tú: Mí ndi Yiɛ̀ nKuyie n yóó di dɛɛtɛ́nɛ̀mu mudɑɑtɔ̃mmú Esibiti kɔbɛ di duɔ́ mmù, kɛ́ di om̀pùnnɛ. N yóó bɛnkɛmu Esibiti kɔbɛ n wɛ̃rímú kɛ́ bɛ̀ potɛ́, kɛ́ di dɛɛtɛ́.

⁷Kɛ̀ di ntú n kɔbɛ kɛ̀ n di te. Kɛ̀ di n yɛ̃́ míì di dènnɛmɛ̀ Esibiti kó mudɑɑtɔ̃mmú.

⁸Mí ndi Yiɛ̀ nKuyie mmíì bɛ́i nkɛ tú m bo di kɔtɛnɛ̀ n do yɛ̃ n yóó duɔ́ nkɛ̀ɛ̀ tenkɛ̀ Abɑrɑhɑmmu nɛ̀ Isɑki nɛ̀ Sɑkɔbu kɛ̀ di kɛ̀ tiekɛ.

⁹Kɛ̀ Mɔyiisii tì nɑ̀kɛ́ Isidɑyɛɛribɛ. Kɛ̀ bɛ̀ í nyie, kɛ yɛ̃́ bɛ̀ fɛ̃́ũ̀rìnɛ̀mɛ̀ mutɔ̃mmú mɛdiɛ̀.

¹⁰Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀:

¹¹Kɔtɛ kɛ́nɑ́kɛ́ okpɑ̀ɑ̀tì kɛ dɔ̀, wèe yóu Isidɑyɛɛribɛ kɛ̀ bɛ̀ɛ yɛ̀ o tenkɛ̀.

¹²Kɛ̀ Mɔyiisi dɔ̀: Isidɑyɛɛribɛ í yie n kpɛti, kɛ̀ m bo nɑ kɛ́nɑ́kɛ́nɛ̀ okpɑ̀ɑ̀tì nwe, mí nwèè í nɔ nkɛ nɑ́ɑ́nnɑ́ɑ̀?

¹³Kɛ̀ ti Yiɛ̀ nKuyie nnɑ́kɛ́ Mɔyiisi nɛ̀ Anɔɔ bɛ̀ yóó nɑ́kɛ́ tì Isidɑyɛɛribɛ nɛ̀ Esibiti kóo kpɑ̀ɑ̀tì, kɛ̀ dɛ̀ɛ yie nkɛ̀ bɛ̀ɛ dennɛ Isidɑyɛɛribɛ Esibiti tenkɛ̀.

¹⁴Ntɛ Isidɑyɛɛribɛ bɛ̀ɛ̀ bɑkɛ́ Isidɑyɛɛribɛ nɑɑ̀mùntì bɛ yètɛ̀: Sɑkɔbu kóo po Dubɛnni bí: Enɔki nɛ̀ Pɑduu nɛ̀ Ɛtisidonni nɛ̀ Kɑdimii bɛɛ̀ do tú Dubɛnni nɑɑ̀mùnkù kó bɛyɑ̀ɑ̀rìbɛ̀.

¹⁵Simmɛɔ̃ɔ̃ bí tú: Yemmuyɛɛdi nɛ̀ Yɑminni nɛ̀ Oɑdi nɛ̀ Yɑkinni nɛ̀ Soɑ nɛ̀ Sɑudi Kɑnnɑhɑ̃ɑ̃ kóo nitipòkù birɛ bɛɛ̀ do tú Simmɛɔ̃ɔ̃ nɑɑ̀mùnkù kó bɛyɑ̀ɑ̀rìbɛ̀.

¹⁶Kɛ̀ Defii pɛitɛ́ initidɑbí ìtɑ̃ɑ̃ti: Kɛrisonni nɛ̀ Keɑti nɛ̀ Mɛdɑdi kɛ̀ bɛ̀ múnkɛ piɛ́ ibí. Defii do yóó kú kɛ mɔkɛ yɛbie ntɛkɔ̀ùtɛ̀ nɛ̀ sipísìtɑ̃ɑ̃ti nɛ̀ yɛ̀yiekɛ̀ (137) ndi.

¹⁷Kɛrisonni bí tú: Dibinii nɛ̀ Simɛii. Bɛɛ̀ do tú bɛ kó bɛyɑ̀ɑ̀rìbɛ̀.

¹⁸Kɛ̀ Keɑti bí ntú: Amudɑmu nɛ̀ Isɑɑdi nɛ̀ Ebunɔɔ nɛ̀ Usiyɛɛdi. Keɑti yóó kú kɛ mɔkɛ yɛbie ntɛkɔ̀ùtɛ̀ nɛ̀ sipísìtɑ̃ɑ̃ti nɛ̀ yɛ̀tɑ̃ɑ̃ti (133) ndi.

¹⁹Kɛ̀ Mɛdɑdi bí ntú: Mɑdi nɛ̀ Musi. Bɛɛ̀ do tú Defii nɑɑ̀mùnkù kó bɛyɑ̀ɑ̀rìbɛ̀.

²⁰Kɛ̀ Amudɑmuu puokɛ o cicɛ tɑ̃ũ̀ Yokebɛti kòo ò pɛitɛ́ initidɑbí ìdɛ́ì, Anɔɔ nɛ̀ Mɔyiisi. Amudɑmu do yóó kú kɛ mɔkɛ yɛbie ntɛkɔ̀ùtɛ̀ nɛ̀ sipísìtɑ̃ɑ̃ti nɛ̀ yɛ̀yiekɛ̀ (137) ndi.

²¹Kɛ̀ Isɑɑdi bí ntú: Kodee nɛ̀ Nɛfɛki nɛ̀ Sikidii.

²²Kɛ̀ Usiyɛɛdi kpɛyi ntú: Mikɑyɛɛdi nɛ̀ Edisɑfɑ̃ɑ̃ nɛ̀ Sitidi.

²³Kɛ̀ Anɔɔ puokɛ Edisebɑɑ Amminɑdɑbu kóo sɑpɑ̀ɑ̀, Nɑsɔ̃ɔ̃ tɑ̃ũ̀ kòo ò pɛitɛ́ initidɑbí ìnɑ̀ɑ̀: Nɑdɑbu nɛ̀ Abiu nɛ̀ Edeɑsɑɑ nɛ̀ Itɑmɑɑ.

²⁴Kɛ̀ Kodee bí ntú: Asii nɛ̀ Ɛdikɑnɑɑ nɛ̀ Abiyɑsɑfu, Kodee nɑɑ̀mùnkù kɔbɛ kó bɛyɑ̀ɑ̀rìbɛ̀ mbɛ.

²⁵Kɛ̀ Edeɑsɑɑ, Anɔɔ birɛɛ puokɛ Pusiyɛɛdi kóo sɑpɑ̀ɑ̀ nkòo ò pɛitɛ́ dɛnitidɑbirɛ kɛ́ dɛ̀ yu kɛ dɔ̀ Pinɑsi. Defiibɛ yɑ̀ɑ̀rìbɛ̀ kó yɛyètɛ̀ nyɛ mɛmmɛ.

²⁶Anɔɔ nɛ̀ Mɔyiisi nwe ti Yiɛ̀ nKuyie nnɑ̀kɛ́mɛ̀ kɛ tú: Dennɛnɛ̀ Isidɑyɛɛribɛ Esibiti bɛ nɑú dò ndòmmɛ̀.

²⁷Bɛɛ̀ do nɑ̀kɛ́ Esibiti kóo kpɑ̀ɑ̀tì kɛ dɔ̀ wèe yóu kɛ̀ Isidɑyɛɛribɛ yɛ̀ Esibiti.

²⁸Kɛ̀ ti Yiɛ̀ nKuyie mbɛ́innɛ̀ Mɔyiisi Esibiti tenkɛ̀ kɛ dɔ̀:

²⁹Míì tu di Yiɛ̀ nKuyie, ɑ́ nɑ́kɛ́ Esibiti kóo kpɑ̀ɑ̀tì n dɑ nɑ̀kɛ́ tì timɔu.

³⁰Kɛ̀ Mɔyiisi dɔ̀: N yí nɔ nkɛ nɑ́ɑ́ nhokpɑ̀ɑ̀tì bo yie n kpɛtɑɑ̀?