MUDENNIMÙ 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Kɔtɛ okpɑ̀ɑ̀tì borɛ̀, míì kpénkùnnɛ o to nɛ̀ o tũ̀mbɛ̀ kpɛyɛ kɛ bo dɔɔ̀ tidiɛtì bɛ cuokɛ̀.

²Kɑ̀ɑ tì nɑ̀kɛ́ ɑ bí nɛ̀ ɑ yɑɑ̀bí n dɔ̀ɔ̀ dɛ̀ Esibiti kɔbɛ nɛ̀ n dɔ̀ɔ̀ tìì diɛtì bɛ cuokɛ̀. Kɛ̀ di nyɛ̃́ n túmɛ̀ di Yiɛ̀ nKuyie.

³Mɔyiisi nɛ̀ Anɔɔ kɛ̀ bɛ̀ɛ kɔtɛ okpɑ̀ɑ̀tì borɛ̀ kóo nɑ̀kɛ́ kɛ dɔ̀: Ti Yiɛ̀ nKuyie ntínti Ebedeebɛ ti tũ nkù tu, ɑ yóó kɛ̃́kùnnɛ ɔ̃̀mmɔ̀nnì ɑmɑ́ɑ̀ ku ììkɛ̀, kɛ́ ti yóu kɛ̀ tí yɛ̀ kɛ kù fìé iwũɔ̃?

⁴Kɑ̀ɑ yetɛ ti bo yɛ̀mɛ̀, kù bo duɔnní fɛcofɛ nɑnkɛ ɑ tenkɛ̀.

⁵Kɛ̀ fɛ̀ɛ dɑ́tínnɛ́ kɛtenkɛ̀ bɑ́ kɛ̀ tɛ̃́nkɛ bɑ́ nfeí, fɛ̀ bo cɑ́ɑ́kɛ́ yɛmɑ́tɑ̃́rɛ̀ sùɔ́ ndɛ̀, kɛ́cɑ́ɑ́kɛ́ dɛtie ndɛmɔu kó tifɑ̃ɑ̃̀tì dikpɑ́ɑ̀.

⁶Fɛ̀ bo píɛ nhɑ cĩ́ɛ̃̀tɛ̀ nɛ̀ ɑ tũ̀mbɛ̀ kpɛsi nɛ̀ ɑ nìtìbɛ̀ kpɛsi. A cicɛbɛ̀ nɛ̀ ɑ yɑ̀ɑ̀rìbɛ̀ bɛ̀ mu nyí yɑ̀ dɛ kó kubotí nɛ̀ bɛ̀ bomɛ̀. Mɔyiisi bɛ́i mmɛmmɛ kɛ́ítɛ́ okpɑ̀ɑ̀tì cĩ́ɛ̃̀tɛ̀ kɛ́yɛ̀.

⁷Kòo kpɑ̀ɑ̀tì tũ̀mbɛ̀ɛ ò nɑ̀kɛ́ kɛ dɔ̀: Onìtì yiè nyóó yóu ɔ̃̀mmɔ̀nnì ò bo nti buɔ̀mmɛ̀ mɛyɛi? Yóu bɛ kɛ̀ bɛ̀ɛ yɛ̀ kɛ́fíé bɛ Yiɛ̀ nKuyie nyiwũɔ̃. A í wúó nhEsibiti kɔbɛ deumɑ̀ɑ̀!

⁸Kɛ̀ bɛ̀ɛ yúní Mɔyiisi nɛ̀ Anɔɔ okpɑ̀ɑ̀tì borɛ̀ kòo bɛ̀ nɑ̀kɛ́ kɛ dɔ̀: Kɔtɛnɛ̀ kɛ́fíé iwũɔ̃ di Yiɛ̀ nKuyie. Ɔ̃̀mbɛ kɔri?

⁹Kɛ̀ Mɔyiisi dɔ̀: Ti kɔri timɔu ndi. Ibí nɛ̀ bɛkótíbɛ̀ bɛnitidɑɑbɛ̀ nɛ̀ bɛnitipòbɛ̀ nɛ̀ ti nɑ̀ɑ̀kɛ nɛ̀ ti pe nɛ̀ ti bɔɔ́. Ti Yiɛ̀ nKuyie mbɑnni ndi.

¹⁰Kòo kpɑ̀ɑ̀tì dɔ̀: Di yɛ̀mmɛ̀ dò m bo di yóumu kɛ̀ di kɔtɛ dimɔu, di pobɛ̀ nɛ̀ di bíɑ̀ɑ̀? M bɑ́ɑ́ dɛ̀ dɔ̀ɔ̀! N yɛ̃́mu kɛ dò ndi dɔ́ tì í wenni.

¹¹Bìtì! M bɑ́ɑ́ di yóu. Kɔtɛnɛ̀ díndi bɛnitidɑɑbɛ̀ mɑ́ɑ̀ kɛ́fíé iwũɔ̃ di Yiɛ̀ nKuyie di do mɛ nyɛ̃. Kɛ̀ bɛ̀ɛ bɛ̀ bɛ̀ti okpɑ̀ɑ̀tì cĩ́ɛ̃̀tɛ̀.

¹²Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Youtɛ ɑ nɔ̀ùtɛ̀ Esibiti ĩ́nkɛ̀, kɛ̀ fɛcofɛɛ kɔtɛní kɛ́cɑ́ɑ́kɛ́ yɛmɑ́tɑ̃́rɛ̀ sùɔ́ ndɛ̀.

¹³Kɛ̀ Mɔyiisii youtɛ kupɑ̀ɑ̀ti Esibiti tenkɛ̀ ĩ́nkɛ̀, kɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkù ntṹṹ nkɛ fuuti, kɛ́nyié nkɛ fuuti kɛ̀ dɛ̀ nyóó wentɛ́ kɛ̀ kù tɔní fɛcofɛ dihɛì.

¹⁴Kɛ̀ fɛ̀ɛ tɑnní Esibiti tenkɛ̀ kɛ́nsũ, kɛ́dɑ́tínnɛ́ Esibiti tentɑ̃́ɑ̃́ mmumɔu miɛkɛ. Bɛ̀ mu nyí yɑ̀ fɛ kóo botí Esibiti, fɛ kóo botí mɛ nyí kpɑɑ́ bo buotɛ́.

¹⁵Kɛ̀ fɛcofɛɛ dɑ́tínnɛ́ kɛtenkɛ̀ kɛmɔu, kɛ̀ dɛ̀ɛ bitoo, kɛ̀ fɛ̀ɛ cɑ́ɑ́kɛ́ tidiitì nɛ̀ yɛtebɛ yɛmɑ́tɑ̃́rɛ̀ do sùɔ́ ndɛ̀. Timútì nɛ̀ tifɑ̃ɑ̃̀tì dɛ̀ tɛ̃́nkɛ í nkpɑɑ́ Esibiti tenkɛ̀ kɛmɔu miɛkɛ.

¹⁶Kòo kpɑ̀ɑ̀tìi yú Mɔyiisi nɛ̀ Anɔɔ kɛ dɔ̀: N yetɛ́nɛ̀ di Yiɛ̀ nKuyie nku, kɛ di yetɛ́nɛ̀ di mɔ́mmɔmbɛ.

¹⁷Di wɛ̃tɛ kɛ́ n cĩ́ɛ̃́ n yɛi nkɛ́bɑ́ntɛ̀ di Yiɛ̀ nKuyie nkɛ̀ kùu fũũ mmɛyɛi nsĩ̀mmɛ̀ miɛ.

¹⁸Kɛ̀ Mɔyiisii ítɛ́ okpɑ̀ɑ̀tì borɛ̀, kɛ́bɑ́ntɛ̀ ti Yiɛ̀ nKuyie.

¹⁹Kɛ̀ kùu duɔ́ nkɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkùu fuutɛ kɛ́túótɛ́ fɛcofɛ kɛ́tɑnnɛ́ tipèntì kóo dɑ̀mɛ́ɛ̀rì, bɑ́ fɛ̀mɑfɛ̀ í nkpɑɑ́ Esibiti tempɛ̃ nkumɔu miɛkɛ.

²⁰Kɛ̀ ti Yiɛ̀ nKuyie nkpénkùnnɛ okpɑ̀ɑ̀tì to, kòo yetɛ Isidɑyɛɛribɛ bo yɛ̀mɛ̀.

²¹Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Youtɛ ɑ nɔ̀ùtɛ̀ kɛ̀ dibiìnnìi tɑnní Esibiti tenkɛ̀ kɛmɔu miɛkɛ kɛ́ncɛ̃́ɛ̃̀ kɛ dò nhonìtì bo nɑ kɛ́ dì kɑ̀ɑ́kɛ́.

²²Kɛ̀ Mɔyiisii youtɛ o nɔ̀ùtɛ̀ kɛ̀ dibiìnnì diɛrìi tɑnní Esibiti tenkɛ̀ kɛmɔu miɛkɛ kɛ́mmɔkɛ yɛwe yɛ̀tɑ̃ɑ̃ti.

²³Òmɔù tɛ̃́nkɛ í nwúó nhotɔù, òmɔù í nyìtɛ́ o kɑ̀rì, kɛ̀ kuwenniku nɛ́ mbo Isidɑyɛɛribɛ kó dikɑrì.

²⁴Kòo kpɑ̀ɑ̀tìi yú Mɔyiisi kóò nɑ́kɛ́ kɛ dɔ̀: Di bo nɑ kɛ́kɔtɛ dimɔu, di pobɛ̀ nɛ̀ di bí kɛ́fíé iwũɔ̃ di Yiɛ̀ nKuyie. Di wũɔ̃ iì mɑ́ɑ̀ yó nkpɑɑ́ diɛ.

²⁵Kɛ̀ Mɔyiisi dɔ̀: Fɔ̃́ɔ̃̀ yóó ti duɔ́ nti yóó fíé ìì wũɔ̃ ti Yiɛ̀ nKuyie nnɛ̀ ti yóó kù pɑ̃ ì kɛ́tuɔ.

²⁶Ti yó ntɔmu ti wũɔ̃ imɔu, fɛ̀mɑfɛ̀ í yó nkpɑɑ́, iì miɛkɛ nkɛ, ti yóó tɑ̃ɑ̃tɛ́mɛ̀ kɛ́fíé ti Yiɛ̀ nKuyie. Ti mɛ nyí yɛ̃́ ti yóó tɑ̃ɑ̃tɛ́ ì, ti yóó kɛ ntuɔkɛ kɛ́ ì yɑ̀.

²⁷Kɛ̀ ti Yiɛ̀ nKuyie nkpénkùnnɛ okpɑ̀ɑ̀tì to, kòo yetɛ bɛ̀ bo yɛ̀mɛ̀,

²⁸kɛ́bɛ́i nkɛ dɔ̀: Ítɛ́ m borɛ̀, kɑ̀ɑ wɛ̃̀tɛní dìì yiè ɑ kumu.

²⁹Kɛ̀ Mɔyiisi dɔ̀: A bɛ́i ntì tiǹti, n tɛ̃́nkɛ í wɛ̃tiní ɑ borɛ̀.