MUDENNIMÙ 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Kɛ̀ Defii nɑɑ̀mùnkù kou mɔùu puokɛ bɛ nɑɑ̀mùnkù kóo sɑpɑ̀ɑ̀ mmɔù.

²Kòo púó nkɛ́pɛitɛ́ dɛnitidɑbirɛ, kɛ́yɑ̀ dɛ̀ wennimɛ̀, kɛ́ dɛ̀ sɔ̀nnɛ bɛtɑ̃̀ɑ̃̀bɛ̀ bɛ̀tɑ̃ɑ̃ti.

³Ò tɛ̃́nkɛ í nnɑ kɛ bo ndɛ̀ sɔ̀rì, kɛ́tɛí dikũ̀mɑ̀nnì kùtìnɔ́ɔ̀, kɛ́ dɛ̀ ɑ̃nnɛ́ di miɛkɛ, kɛ́tɑ kɛ́dɔú nkukó nNiidi tipèntì miɛkɛ.

⁴Kɛ̀ dɛbirɛ tɑ̃ũ̀ ńsɔri mɛkɛntímɛ̀ kɛ bo yɑ̀ dɛ̀ɛ̀ yóó tuɔkɛní dɛbirɛ.

⁵Kòo kpɑ̀ɑ̀tì kóo sɑpɑ̀ɑ̀ ńtɑ kukó mmuhɔ̀rìmù kɛ nɛínɛ̀ o dúɔ̀bɛ̀. Kòo dúɔ̀bɛ̀ ńcentì kukó ntɑkɛ́, kòo yɑ̀ dikũ̀mɑ̀nnì, kɛ́tɔ̃ nho kóo tɔ̃ntì kòo dì tùótɛ́ní.

⁶Kòo pootɛ kɛ́yɑ̀ dɛnitidɑbirɛ kɛ̀ dɛ̀ kuɔ̀, kɛ̀ mɛsémmɛ̀ɛ ò pĩ nkòò dɔ̀: Ebedeebɛ kó dɛbirɛ ndɛ.

⁷Kɛ̀ dɛbirɛ tɑ̃ũ̀ũ ò bekɛ kɛ dɔ̀: A dɔ́ kɛ̀ ń kɔtɛ kɛ́ dɑ wɑɑnní Ebedee kóo nitipòkù mɔù kòò ndɛ̀ ndɑ yɑ̃ɑ̃nkoɑ̀ɑ̀?

⁸Kòò dɔ̀: Ɛ̃ɛ̃, kɔtɛ! Kòo kɔtɛ kɛ́yúní dɛbirɛ yɔ̃.

⁹Kòo kpɑ̀ɑ̀tì kóo sɑpɑ̀ɑ̀ ndɔ̀: Túótɛ́ dɛbirɛ diɛ nkɛ́ ndɛ̀ nni nyɑ̃ɑ̃nko kɛ̀ n dɑ yietí. Kòo nitipòkùu dɛ̀ tùótɛ́ kɛ́nyɑ̃ɑ̃nko.

¹⁰Kɛ̀ dɛ̀ɛ kótɛ́ kòo dɛ̀ duɔ́ nhokpɑ̀ɑ̀tì sɑpɑ̀ɑ̀, kɛ̀ dɛ̀ɛ nɑɑ́ nho birɛ, kòo dɛ̀ yu kɛ dɔ̀: Mɔyiisi, dɛ̀ɛ̀ tu ò dɛ̀ dɛ̀itɛ mɛniɛ mmiɛkɛ.

¹¹Kɛ̀ Mɔyiisii kótɛ́ kɛ́kɔtɛ o kɔbɛ borɛ̀, kɛ́yɑ̀ bɛ̀ bɛ̀ fɛ̃́ũnkonɛ̀mɛ̀ mutɔ̃mmú, kɛ́yɑ̀ Esibiti kou mɔù puotìmɛ̀ o kou Ebedee.

¹²Kòo wéntɛ́ wéntɛ́, ò í nyɑ̀ òmɔù, kɛ́potɛ́ Esibiti kou kɛ́kuɔ, kɛ́kũnnɛ́ mubirímú miɛkɛ.

¹³Kɛ̀ dɛ̀ɛ wentɛ́ kòò tó yɛ̀ diyiè tɛrì kɛ́yɑ̀ Ebedeebɛ mɑ́ɑ̀ kɛ̀ bɛ̀ kpɑ̀ nkòo bekɛ wèè í nɑɑti kɛ dɔ̀: Dɛ̀ dòmmɛ kɑ̀ɑ puotì ɑ tebitɛ?

¹⁴Kòo ò tɛ̃̀ńnɛ́ kɛ dɔ̀: We ndɑ pĩ ntikpɑ̀tì kɑ̀ɑ bo nti bekùnɛ̀? A dɔ́ kɛ́ n kuɔ ɑ wee kùɔmɛ̀ mmɛ Esibiti kouɑ̀? Kɛ̀ Mɔyiisi kɔ̃m̀bùɔ̀tìi do, kòò dɔ̀: Bɛnìtìbɛ̀ kèèmu ti nnɑ́ɑǹtɑ̀ɑ̀?

¹⁵Kòo kpɑ̀ɑ̀tìi keè dɛ̀ɛ̀ dɔ̀ɔ̀, kɛ́ndɔ́ kɛ́kuɔ Mɔyiisi. Kòo cokɛ́ kɛ́kɔtɛ Mɑndiyɑ̃ɑ̃ kó kɛtenkɛ̀ kɛ́nkɑri tɛbintɛ bɛ̀ keú tɛ̀ borɛ̀.

¹⁶Mɑndiyɑ̃ɑ̃ tenkɛ̀ kɔbɛ do mɔkɛ ikuɔ́ nìùtì mɔù nwe kòò mɔ̀kɛ bɛsɑpɑ̀mbɛ̀ bɛ̀yiekɛ̀, kɛ̀ bɛ̀ɛ tɑnní tɛbintɛ kɛ bo dó kɛ́nii mbɛ cicɛ wũɔ̃.

¹⁷Kɛ̀ bɛnɑɑcɛ̃mbɛɛ bɛ̀ bɛ̀ti, kɛ̀ Mɔyiisii yetɛ kɛ́nii mbɛ wũɔ̃.

¹⁸Kɛ̀ bɛ̀ɛ wɛ̃tɛ kɛ́kò mbɛ cicɛ borɛ̀ Deuyɛɛdi, kòo bɛ̀ bekɛ kɛ dɔ̀: Dɛ̀ dòmmɛ kɛ̀ di konní mɛcɑ̃ɑ̃ nyíe?

¹⁹Kɛ̀ bɛ̀ dɔ̀: Esibiti kou mɔù weè ti dɛɛtɛ́nɛ̀ bɛnɑɑcɛ̃mbɛ, kɛ nìi nti wũɔ̃.

²⁰Kɛ̀ bɛ̀ cicɛ dɔ̀: Ò borɛ? Dɛ̀ dòmmɛ kɛ̀ di kɛ̀ nhò yóu? Kɔtɛnɛ̀ kóò yuní kòo di.

²¹Mɛm̀mɛ kɛ̀ Mɔyiisi ḿbo dɛ kóo nìtì borɛ̀, kòo ò duɔ́ nho kóo sɑpɑ̀ɑ̀ nSefodɑɑ kòo puokɛ.

²²Kòo púó nkɛ́pɛitɛ́ dɛnitidɑbirɛ, kòo dɛ̀ yu kɛ dɔ̀ Mbo-Kupɔ̀ɔ̀kù.

²³Kɛ̀ dɛ̀ɛ mɔntɛ kɛ̀ Esibiti kóo kpɑ̀ɑ̀tìi kú, kɛ̀ Isidɑyɛɛribɛ bɑɑ nfɛ̃́ũ̀rìnɛ̀ mutɔ̃mmú kɛ kuɔ̀, kɛ̀ bɛ dɑbùò ntuɔkɛ Kuyie.

²⁴Kɛ̀ kùu keè bɛ dɑbùò nkɛ́dentɛní mɛtɑummɛ̀ kù do dɔ̀ɔ̀nɛ̀mɛ̀ Abɑrɑhɑmmu nɛ̀ Isɑki nɛ̀ Sɑkɔbu,

²⁵kɛ́wéntɛ́ kɛ́yɑ̀ Isidɑyɛɛribɛ kɛ́bɑntɛ́ bɛ̀ fɛ̃́ũ̀rìmɛ̀.