MUDENNIMÙ 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Kòo yúókù yùúkú kɛyènkɛ̀, kɛ̀ bɛ̀ ò sɔ̃̀ńkɛ́ koò kùɔ, dɛ̀ í tú munitikɔ̀ù.

²Kɛ̀ diyiè mɛ nyɛ̀nní kɛ̀ bɛ̀ ò kùɔ, munitikɔ̀ù mmu. Kòo yúókù mɔù mɛ nyí mɔkɛ dɛ̀mɑrɛ̀ kɛ bo yietí ò yùúkú dɛ̀ bɛ̀ɛ ò fìtɛ́ kɛ́yietí.

³Kòo yùúkú fɛnɑ̀ɑ̀fɛ̀ nfɛ yoo sɑ̃mmɑrímú yoo fɛpìèfɛ̀, kɛ̀ dɛ̀ kpɑɑ́ o cĩ́ɛ̃̀tɛ̀ wèe dɛ̀ tɛ̃̀ńnɛ́ kɛ́nɔ́ɔ́ ndɛtɛrɛ̀.

⁴Kòo mɔù yóu kòo wũɔ̃ cɑ̀ɑ́kɛ́ otɔù diitì yoo o tebɛ, wèè te fɛɔ̃̀fɛ̀ wèe dɛitɛ o kó kupɑku tidiitì sɑ̀ɑ̀tì yoo o tebɛ sɑ̀ɑ̀yɛ̀ kɛ́yietí o ɔ̃̀fɛ̀ di wèè diitì.

⁵Kòò mɔù cɔ́u ndikpɑ́ɑ̀, kɛ̀ dɛ̀ cɔ̀útɛ́ òmɔù diitì, tì còú dɛ̀ yoo tì kpɑɑ́ cómmú dɛ̀, wèe yietí tidiitì yiɛ̀.

⁶Kòò mɔù sɔ̀nnɛ o diitì yoo o kpɛrɛ otɔù borɛ̀, kòò mɔù dɛ̀ yùúkú kɛ̀ bɛ̀ ò yɑ̀, wèe yietí kucɛ mɛ̀dɛ́mɛ̀.

⁷Kɛ̀ bɛ̀ í yɑ̀ wèè yùúkú, dɛ̀ do duɔ́ wèè cĩ́ɛ̃̀tɛ̀ɛ yú mí nKuyie nyètìrì kɛ́bɛ́i nkɛ dɔ̀: N yí tùótɛ́ n kou kpɛrɛ.

⁸Kɛ̀ bɛ̀mɑbɛ̀ nɛ̀nni fɛnɑ̀ɑ̀fɛ̀ kpɛ́í nyoo sɑ̃mmɑrímú, yoo fɛpìèfɛ̀, yoo kuyɑ̀ɑ̀kù, yoo dɛ̀mɑrɛ̀ kpɛ́í, bɛ̀ɛ kɔtɛ m borɛ̀, kɛ̀ n yĩ wèè í nɑɑti, wèe yietí kucɛ mɛ̀dɛ́mɛ̀.

⁹Kòo mɔù tɑnnɛ́nɛ̀ otɔù fɛnɑ̀ɑ̀fɛ̀, yoo sɑ̃mmɑrímú, yoo fɛpìèfɛ̀, yoo fɛɔ̃̀fɛ̀ tɛfɛ̀ mɑfɛ̀, kɛ̀ fɛ̀ ku yoo fɛ̀ kèétɛ́, yoo bɛ̀ fɛ̀ yùúkú, bɑ́ bɛ̀ í fɛ̀ yɑ̀.

¹⁰Fɛɔ̃̀fɛ̀ tɑɑ̀ wèè borɛ̀ɛ yú n yètìrì kɛ dɔ̀, ò í fɛ̀ tùótɛ́. Kòò ĩ mɛmmɛ wèè te fɛɔ̃̀fɛ̀ wèe yie nhò bɛ́i ntì bɑ́ ò bɑ́ɑ́ yietí.

¹¹Kòò mɛ nyóu kɛ̀ bɛ̀ fɛ̀ yùúkú o cĩ́ɛ̃̀tɛ̀, wèe yietí fɛɔ̃̀fɛ̀ yiɛ̀.

¹²Kɛ̀ musĩ̀mmù muù mɛ nfɛ̀ pĩ nwèe tɔní mù cɑ̀ɑ́kɛ́ kɛ sùɔ́ ndɛ̀, kɛ́bɛnkɛ fɛ yiɛ̀ nhò bɑ́ɑ́ yietí dɛ̀mɑrɛ̀.

¹³Kòò mɔù yɑ̃ũtɛ́ otɔù fɛɔ̃̀fɛ̀, kɛ̀ fɛ̀ kèétɛ́, yoo fɛ̀ ku, bɑ́ fɛ yiɛ̀ nyí dɛ̀ bo, wèè fɛ̀ yɑ̃ũtɛ́ wèe yietí fɛ yiɛ̀.

¹⁴Kɛ̀ fɛɔ̃̀fɛ̀ yiɛ̀ ndɛ̀ bo, ò bɑ́ɑ́ yietí mùmɑmù, kòò mɛ nfɛ̀ yɑ̃ũtɛ́ kɛ yietímu, dɛ kó tiyeti ńsɑ̀nnɛ̀.

¹⁵Kòò mɔù ciitɛ́ osɑpɑ̀ɑ̀ nwèè í yɛ̃́ onitidɔ̀ù, ò mɛ nyí mɔkɛ didɑcɛ̃nnì, koò duɔ́nɛ̀, wèe yietí tipocòntì kóò tùótɛ́ kɛ́puokɛ.

¹⁶Kòo sɑpɑ̀ɑ̀ ncicɛ mɛ nhò yetɛnɛ̀ o kóo sɑpɑ̀ɑ̀ nwèe yietí idíítí kɛ̀ ì mmɑ̀nnɛ̀ osɑpɑ̀ɑ̀ nkó tipocòntì kpɛyi bɑkɛ.

¹⁷Dí kuɔ bɛnitipòbɛ̀ bɛ̀ɛ̀ tu bɛnitinɔ̀mbɛ̀ di cuokɛ̀.

¹⁸Kòò mɔù duɔ́nɛ̀ fɛɔ̃̀fɛ̀ bɛ̀ɛ ò kùɔ.

¹⁹Kòò mɔù fèútɛ́ fɛɔ̃̀fɛ̀ dibɔɔ̀, kɛ yóu mí nKuyie, mbɛ̀ɛ ò kùɔ.

²⁰Di bɑ́ nfɛ̃́ũnko bɛpɔ̀ɔ̀bɛ̀ yoo dí mbɛ̀ cií. Kɛ yɛ̃́ di do túmɛ̀ bɛpɔ̀ɔ̀bɛ̀ mbɛ Esibiti tenkɛ̀.

²¹Di bɑ́ nfɛ̃́ũnko bɛkúpobɛ̀ nɛ̀ iciribí.

²²Kɛ̀ di bɛ̀ fɛ̃́ũnko, kɛ̀ bɛ̀ sɑutɛ kɛ n yu n yóó keèmu.

²³Kɛ̀ m miɛkɛɛ di pɛikɛ, kɛ̀ n duɔ́ nkɛ̀ di dootitɔbɛ̀ di kuɔ, kɛ̀ di pobɛ̀ɛ nɑɑ́ mbɛkúpobɛ̀, kɛ̀ di bíi nɑɑ́ nyiciribí.

²⁴Kɛ̀ wèè pèntɛ ocĩ̀rì idíítí o kó kubotí miɛkɛ o bɑ́ ndɔ́ wèe ò yietí kɛ́nɔ́ɔ́ mbɛtɔbɛ̀ ɔ̃mmɛ̀.

²⁵Kɛ̀ wèè kou yóó ò yɑ̃ũtɛ́ dɛ̀mɑrɛ̀ kòò tùótɛ́ o yɑ̀ɑ̀kù wèe kù nhò tɛ̃̀ńnɛ́ kɛ̀ diyiè mu nyí tɑ.

²⁶Kɛ yɛ̃́ ò ku mmɔkɛmɛ̀ kumɑ́ɑ̀ kɛ dɑɑti, kɛ̀ kù í bo ò bo duɔ́nɛ̀ bɑ, ò yóó sɑutɛmu kɛ̀ n keè, kɛ yɛ̃́ m mɔkɛmɛ̀ mɛsémmɛ̀.

²⁷Di bɑ́ɑ́ sɑ̃́ɑ̃́ mmí nKuyie, di mɛ mbɑ́ɑ́ sɑ̃́ɑ̃́ ndi kóo kpɑ̀ɑ̀tì.

²⁸Di níí n duɔ́ ndi diitì ketitì nɛ̀ di tebɛ ketiyɛ̀ nɛ̀ bɛ̀ɛ̀ tú Mpo.

²⁹Kɛ̀ wèè nɑ̀ɑ̀fɛ̀ yoo o pìèfɛ̀ pɛitɛ́ fɛ birɛ ḿmɔkɛ yɛwe yɛ̀yiekɛ̀, diniínnì yiè kòò dɛ̀ nni nféútɛ́.

³⁰Di tú n kó bɛnìtìbɛ̀ mbɛ, ńdònnɛ̀ pɑ́íí! Dì bɑ́ ncɑ́ɑ́ mmusĩ̀mmù pĩ nfɛ̀ɛ̀ ɔ̃̀fɛ̀, di níí fɛ̀ duɔ́ n simɔɔ́.