Exodus 6

1

2

3

4

5

6

7

8

9

10

11

12

13

14

15

16

17

19

20

24

31

32

33

34

40

¹YAHWEH anteme Moses-eke angkeke, “Unte kwenhe ayenge aretyenhe nhenge The Pharaoh ayaketyenhenge Israel-arenye areye akurne-ileme-ketye itnenhe atwerle-aneme-ketye. The ngangkerele renhe atwetyenhe nhenge re tyerrtye Atyinhe areye Egypt-ngentyele apmere arrangkethe ikwere-werne ipmentye yernetyenhenge. Re tyerrtye areye yernetyenhe atyenge-ngentyele ware.”

²Ngkarte anteme Moses-eke angkeke, “Ayenge kwenhe YAHWEH aneme.

³Arrule anthurre Ayenge Abraham, Isaac uthene Jacob utheneke imernelheke. Ayenge itneke ilelheke arritnye Atyinhe NGKARTE LTERRKE ANTHURRE ANEME-ARLE. Itne YAHWEH arritnyeke akutne aneke.

⁴The itnenhe alhileke The itnenhe apmere Canaan itnenhe anthetyeke aneme. Arrule anthurre itne apmere yanhe ikwerele anetyarte, itnekenhe anetyakenhe aneke. Apmere yanhe tyerrtye arrpenhe areye-kenhe aneke.

⁵Lyete The awerne tyerrtye Israel-arenye areye ampwangkewarrerlenge. The kwenhe itelareme Egypt-arenye areyele itnenhe atwemenge itnenhe warrke-irretyeke ayernentye akngerre areye-arteke uternemele. Ayenge tyerrtye Atyinhe areyeke alkngwirretyakenhe The apmere Canaan yanhe renhe anthetyeke alhileke-iperre.

⁶“Tyerrtye Israel-arenye areye Atyenge-akerte iletyeke alhaye. Itneke alakenhe ilaye, ‘Ayenge kwenhe YAHWEH. The kwenhe Egypt-arenye areye ayaketyeke itnenhe atweme-ketye arnterre warrke-irretyeke uterneme-ketye anteye. Arrantherre itneke awethe warrke-irretyakenhe anetyenhenge. The arrenhantherrenhe ngangkerele Egypt-arenye areye-ngentyele akngetyenhenge. The itnenhe akurne-iletyenhe akurnentye anthurre.

⁷Arrantherre tyerrtye Atyinhe areye anteme aneme, ayenge Ngkarte arrekantherrenhe anetyenhe. Arrantherre itelaretyenhenge Ayenge-arle Ngkarte YAHWEH aneme. The arrenhantherrenhe Egypt-arenye areye-ngentyele akngetyenhe, itne arrenhantherrenhe warrke-irretyeke awethe uternetyakenhe anetyenhenge.

⁸The arrenhantherrenhe yerrele-akngetyenhe apmere ahelhe ikwere-werne The arrule anthurre Abraham, Isaac, Jacob utheneke alhileke-iperrele. The arrenhantherrenhe apmere yanhe renhe anthetyenhe. Apmere re arrekantherrenhe anetyenhe. Ayenge kwenhe YAHWEH.’ Alakenhe renhe unte tyerrtye Israel-arenye areyeke angketyenhe.”

⁹Kele Moses-ele anteme tyerrtye Israel-arenye areyeke iwenhe renhe iletye-alheke Ngkartele renhe angketyeke ileke. Kenhe itne akenhe renhe arratye itelaretyakenhe akwete aneke, arrangkwe-arle. Egypt-arenye areyele itnenhe akwete anthurre warrke-irretyeke uternetyame, Israel-arenye areye itneke-arrpe alhwarrpe anthurre awelheke. Alakenhe ikwerenge anteme itne Moses arratye itelaretyakenhe aneke.

¹⁰YAHWEH anteme Moses-eke angkeke, “Pharaoh iletyeke alhaye tyerrtye Israel-arenye areye Egypt-ngentyele ipmentye yernetyeke itnenhe mwernte-iletyale.”

¹²Moses anteme YAHWEH-eke angkeke, “Araye! Tyerrtye Israel-arenye areyele kwenhe ayenge awetyakenhe! Pharaoh-ele ayenge awetyakenhe itanye! Ayenge kwenhe akutne, ayenge kwenhe tyerrtye atningkeke arrekwele angketyakenhe aneke, iwenhe re-anteme ayenge ikwere angketyenhe?”

¹³YAHWEH-ele Moses uthene Aaron uthene ileke, Israel-arenye areyeke-arlke Pharaoh-ekarlke awethe iletyeke alheme. Itnenhe ilaye Tharle mpwelenhe ileke tyerrtye Israel-arenye areye apmere Egypt-ngentyele arratelhe-iletyeke.

¹⁴Tyerrtye Israel-arenye areye anyenhenge areye apurte anetyarte. Nhenhe anteme arritnye itnekenhe aneme nhenge yanhe areye anyenhenge itnekenhe-arrpe areyeke akngerrepate-arle anekeke. Alere akngerrepate Israel-kenhe Reuben arritnye aneke. Reuben alere 4-pele atnyeneke Hanock, Pallu, Hezron, Carmi. Artwe nhenhe areye anyenhenge four-pele areyeke akngerrepate aneke.

¹⁵Alere Simeon-kenhe areye arritnye aneke: Jemuel, Jamin, Ohad, Jakin, Zohar, Shaul. Shaul-eke mikwe Canaan-arenye aneke. Artwe six-pele nhenhe areye anyenhenge six-pele areyeke akngerrepate areye aneke.

¹⁶Levi itethe aneke uterne 137-eke-atwetye. Alerikwe areye arritnye aneke: Gershon, Kohath, Merari. Itne anyenhenge three-pele apurte anetyarte.

¹⁷Gershon alere atherre atnyeneke, Libni, Shimei arritnye. Ratherre anyenhenge atherre apurte anetyarte.

¹⁸Kohath itethe aneke uterne 133-eke-atwetye. Alere ikwerenhe areye-kenhe arritnye aneke, Amram, Izhar, Hebron, Uzziel.

¹⁹Alere Merari-kenhe atherre arritnye aneke Mahli uthene Mushi uthene. Anyenhenge nhenhe areye Levi-kenhe aneke.

²⁰Artwe Amram-ele atyeyikwe akngeye ikwerenhe-kenhe Jochebed arritnye anewe akeke. Jochebed-ele Aaron uthene Moses uthene-akerte. Amram itethe aneke uterne 137-eke-atwetye.

²¹Artwe Izhar arritnye aneke, alerikwe Korah, Nepheg, Zichri arritnye.

²²Artwe Uzziel arritnye, alerikwe Mishael, Elzaphan, Sithri.

²³Artwe Aaron-ele akenhe Elisheba anewe-akeke, alere Amminadab-kenhe yaye akngerre Nahshon-eke re aneke, Elisheba-le ampe akweke Nadab, Abihu, Eleazar, Ithamar atnyeneke.

²⁴Artwe Korah, alere ikwerenhe areye-kenhe arritnye aneke Assir, Elkanah, Abiasaph. Alerikwe nhenhe areye akenhe anyenhenge three-peleke akngerrepate aneke Korah-kenhe.

²⁵Eleazar, alere Aaron-kenhele arelhe anewe-akeke, akngeye ikwerenhe aneke Putiel. Re ampe akweke Phinehas atnyeneke. Ye, nhenhe kwenhe arritnye anyenhenge areyeke akngerrepate Levi-kenhe aneke.

²⁶Kenhenge yanhe atherre Aaron uthene Moses uthene, yanhe ikwere-atherre thewe YAHWEH-arle angkekeke, “Tyerrtye Atyinhe Israel-arenye areye Egypt-ngentyele arratelhe-ilerle-anerraye. Anyenhenge-arrpe ingkirreke apmere yanhe ikwerenge-ntyele akngetyaye.”

²⁷Ratherre anteme Pharaoh-eke angketyeke alherreke, ratherre renhe ileke tyerrtye Israel-arenye areye apmere Egypt-ngentyele yernetyeke mwernte-iletyale itnenhe.

²⁸Nhenge Moses apmere Egypt-ele akwete anekenge, YAHWEH ikwere angkeke,

²⁹“Ayenge kwenhe YAHWEH. Pharaoh-eke iletyeke alhaye nthakenhe re ayenge ngkwenge angkerne.”

³⁰Moses ikwere angkeke, “Arrangkwe, Ayenge kwenhe apale-apale ware angkentye akngerre. Nthakenhe-ame ayenge ikwere angketyenhe? Re ayenge awetyakenhele anetyenhe.”