Waha Rara 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Wofuŋzi ine Mose ʒiŋuc âzâcnewec: “No miŋecne Farao wiac ecnepe honezemec, mesanaŋ‐nanezi ecnepe râec‐ŋopame raniŋmu, mesanaŋ‐nanezi ecnepe mâreŋ‐ticnaonec jâpec‐ŋopaocmu hâcne.”

²Erâ Anutuzi ʒuhuckerâ Mose ʒiŋuc âzâcnewec: “No hâcne Wofuŋ jukopac.

³No Anutu tâpiri runezi Abraham, Isaka â Jakobo fua‐jarepo, mâc Wofuŋ ʒâŋe‐nane mutaniŋkerâ fuŋne‐nane mumufua‐jare ine mi epo.

⁴No Kanaaŋ mâreŋ jarepemurâ jaŋehec ʒâʒâfic epo wâc, mâreŋ jaba jumbiŋ i hâcne.

⁵Erâ i sawa mâcne, Aigita ŋic jaŋe kâpâcwâru gie mujareeŋgopieŋ Israe ŋic i jaŋere ki owa manapo wâc, ehuc ʒâʒâfic‐nanere manasupo.

⁶Irec Israe ŋicguru jazac, ‘No hâcne Wofuŋ jukopac, erâ no Aigita mâreŋte ʒâic gieonec â kiŋaŋ qaqa bacŋopakicnaonec batarac‐ŋoparâ bawefuc‐ŋopahuc mesanaŋ‐nanezi okac babazu gie bahuc firuec‐ŋopapemu.

⁷Erâ no ŋicfâc‐nane bacŋoparâ Anutu‐ŋeŋic juhape ŋoŋe ʒiŋuc mana taranʒepieŋ: Anutu‐ŋeŋic, Wofuŋ no hâcne Aigita mâreŋte kâpâcwâru â ʒâic gieonec batarac‐ŋopakopac.

⁸No menane bafaharehuc Abraham, Isaka â Jakobo mâreŋ jarezo mupaŋke‐jarepo ira hâcne jowac‐ŋopape raʒiniŋmu; eme qikiŋne‐ŋarepe ŋoŋere biŋe eocmu. No hâcne Wofuŋ jukopac.’”

⁹Mose e Israe ŋic jaŋe iŋuc hâcne jazawec. Jaŋe ine kâpâcwâru giere hâbi fafara ejareha dâŋticne mi manambiŋ.

¹⁰Eme Wofuŋzi Mose ʒiŋuc âzâcnewec:

¹¹“Go Aigita ŋicwofuŋ Faraorao ferâ âzâcnetec Israe ŋic jaŋe mâreŋ‐ticne beherâ raniŋte mana‐jarezejec.”

¹²Eme Mosezi Wofuŋ ʒiŋuc âzâcnewec: “Manakic, Israe ŋic jaŋe dâŋnane qatarambiŋko Faraozi wemocko moc manaocmu, erâ no micnane ŋemâcne i.”

¹³Wofuŋ eki ine Mose â Aroŋ jahe Israe ŋic Aigita mâreŋkonec jowac‐jopa ranicte mukicne dâŋ i Israe ŋic mecne, â Farao mecne mâmâc jazanicte mujactewec.

¹⁴Israe ficne ficne micnefâc‐jeŋic jaŋere ʒâŋe ʒine hâcne: Israe mârâc ŋokâ‐ticne Rubeŋ ere ŋokâfâc: Hanoki, Palu, Hezoroŋ â Karami. Ŋic i jaŋe hâcne Rubeŋte ɋâricfâc.

¹⁵Simeoŋte ŋokâfâc ine ʒiŋuc: Jemue, Jamiŋ, Ohada, Jakiŋ, Zohari â Sauli. Sauli e ine Kanaaŋ ŋokac ere ŋokâ. Ŋic i jaŋe Simeoŋte ɋâricfâc.

¹⁶Ʒi Lewi ŋokâfâcne fuambiŋ sâc jaŋere ʒâŋe: Geresoŋ, Kohati â Merari. Lewi e jara 137 bazurâ hâmowec.

¹⁷Geresoŋte ŋokâ jajahec ine ʒiŋuc: Libini â Simei, guru‐jekicte micne hâcne.

¹⁸Kohati ere ŋokâfâc: Amaram, Izara, Heboroŋ â Uʒiele. Kohati e ine jara 133 bazuwec.

¹⁹Merari ere ŋokâ jajahec ʒiŋuc: Mali â Musi. Ŋic i jaŋe Lewire ɋâricfâc gaŋne gaŋne fua wefumbiŋ.

²⁰Eme Amaram e neŋgoc pitic‐ticne Jokebede ŋokac‐ticne bawec, eme eki hâcne Mose â Aroŋ rocjofawec. Amaram e ine jara 137 bazurâ hâmowec.

²¹Izara ere ŋokâfâc ʒiŋuc: Kora, Nefege â Sikiri.

²²Uʒiele ere ŋokâfâc ʒiŋuc: Misae, Eliʒafaŋ â Sitiri.

²³Aroŋ eki ine Aminadare otâ, Nasoŋ ere seŋ, ʒâŋene Eliseba e ŋokac‐ticne bawec. Eme eki Nadaba, Abihu, Eleaʒa â Itama rocjopawec.

²⁴Kora ere ŋokâfâc ine Asiri, Elikana â Abiasa iŋuc fuambiŋ. Ŋic i jaŋe hâcne Korare ɋâricfâc.

²⁵Aroŋte ŋokâ Eleaʒa e Putie otâfâcne jaŋeraonec moc ŋokac‐ticne bawec, eme eki Pinehasi rowec. Ŋic i jaŋe Lewire ɋâricfâc gaŋne gaŋne juwefumbiŋ jaŋere micnefâc.

²⁶Mose â Aroŋ jahe hâcne Wofuŋzi ʒiŋuc jasawec: “Ŋohe Israe ŋic guru‐jeŋic sâc biric‐jopahuc Aigita mâreŋkonec jowac‐jopapire wahanʒepieŋ.”

²⁷Erâ Mose â Aroŋ jahezia Israe ŋic Aigita mâreŋkonec jowac‐jopanicte Faraorao dâŋgie bapic.

²⁸Eme Wofuŋ e Aigita mâreŋko Mosehec dâŋ muc manac ehuc

²⁹ʒiŋuc âzâcnewec: “No hâcne Wofuŋ jukopac, irec no dâŋ sasawa gazakopac i Aigita ŋicwofuŋ Farao âzâcne‐fârezemec.”

³⁰Mosezi ine Wofuŋ ʒiŋuc muhuc âzâcnewec: “Manakic, no micnane ŋemâcne, irec Farao e dâŋnane wemocko moc manaocmu?”