1Jesus pel pwuroahng doadoahkki karajraj nehn a sikesik oang armajjok, Ih pwa,
2“Wein nehnloannge doahroar nahmwarki men ma koaunopda kamdipwin koapwoapwoaud oau oang nah jermweinno.
3Ih kadarla nah luduhwok pwa en pakairkihoang irai ma oaloa lukko en indoa; a irai johpwa nimen pwili sowoahda.
4Doari, ih pel kadarla epwi ludu en pwehng irai, ‘Kamdippwe no onopda, uduken kahu pwulopwul kan ne kojkojdi. Me ohroj no onopda. Irai en ken indoa!’
5A Irai ok ma luk wiawihoang johpwa soahk, a pwen wihwiahr pein irai doadoahk, emen inla nehn ah mwoaswel, emen nehn ah stohwa.
6Epwi koldi nah johnpakairrok koalkoa, apel kojukdi irai.
7Doari, nahmwarkiho inenin lioasla. Ih kadarla nah johnpeihok en kojukdi irai ok ma kojukdi nah johnpakairrok apel okojda arai kahnihmmwok.
8Ih pel pwehng nah luduhwok, ‘Kamdipwin koapwoapwoaudde no onopda, a irai ma luk wiawihoang joah warroang pwili.
9Apkas inla nehn al kan lukehdo ohroj ma kamwai kapangda.’
10Doar luduhwok ukdo ohroj ma irai suhwoang, armaj mwehu apel armaj nauna doahr oauwoar, kamdippwo ken dirkihla armaj.
11“A anjoauwo ma nahmwarkiho indoahng suhwoang armajjok, ih kapangda woal men ma joah mine nehn likkoauwin koapwoapwoaud.
12‘Oai pirien,’ imdoahr oamw dildo nehn ummwe johpwa likkoauki likkoauwin koapwoapwoaud? A woallo johpwa japoang.
13Doari, nahmwarkiho pwehng irai ma jeujeuweje ih, ‘Piroahdi poah apel ehn kamwai kerpwihla ih likin wija rosso, wijahu ma joang apel keikeikeisakai.’”
14A Jesus koarjoahla karajrajjo pwa, “Dir armaj oaloa lukko, a epwihoar pilpilda.”
15Pharisee‑ok suhpene pwa irai en koajnehdi doahr irai en lidipihdi Jesus ki mehk ma ih pwa, pwa irai en kak kadipoahki ih.
16Irai kadarlahng Ih epwi nihrai sohnpadahkkok pwilihki epwi nihn Herod sohn doadoahkkok, en idoak oang ih peidek oauwe: “Johnpadahk, kamai kidal pwa koawoa armaj mehlel men. Koawoa padahkki kupwur en Koahs oang armaj johpwa kaspoahki da wiawihoang koawoa. Koawoa johkin lipilpilki armaj.
17Apkas pwehng kamai da oamw lamlam oang me: Pwen pwung en dupuk daksis oang nahmwarkihn Rome ke joah?”
18A Jesus pwen kidal arai lamlam nauna, Ih pwa, “Mwalaun kamwai! Amwda kamwai ke jongjong in lidipihdi ngoahi?
19Kajalehng ngoahi oau send en ma kamwai kin dupukki daksis!” Irai wahdohng ih sendo,
20a ih idoakkoang irai, “Mijen apel oadoan inje me pohn sende?”
21“Caesar,” irai japoang. “Doar ioar,” Jesus pwa, “Dupukkoang Caesar dahkij ma ah. A dupukkoang Koahs dahkij ma ah.”
22Nehn irai rongda me, irai pwuriamweikihla, irai ken japahlpijoang.
23Rehnnohr Sadducee‑pwi indoa ipen Jesus (Ioar irai joangoan armajkoa ma kin sikoa pwa armaj mehdi kan jehpirin iejda). Irai pwa armaj jehpirin iejda jang mehdi.
24Irai pwehng Jesus, “Maing Johnpadahk, Moses pwa, ma woal men mehdi a joh nah jeri, riah woal pirin wud painkihla liho pwa en wiahda kadaudokoan woal mehdiho.
25Doari, riari oau kin minmine ipamai, woal ijimen. Minnohr koalik pwoapwoaudla oaroh mehdi jang pahioahu a joh nihra jeri. A in doahroar siahk oauwe riah woal pel painkihla liohdiho.
26Joanngohr pel wiawihoang karoahmenno, apel kajilimenno. Allaluhdi oaroh lel min kaijimenno.
27A oh mwuhr lihwa mehdi.
28Doari nehn rehnno ma armaj mehdi kan pirin iejda, inje in min ijimenno ma ioar pirin pahien liho, nehn irai ohroj ne painkihda ih.”
29Jesus ken japoang irai, “Kamwai inenin japwung, kijehn amwai johkin woahwoahki Puk Joarwi apel manman in Koahs.
30Anjoauwo ma mehdihok iejda, irai pirin doahrla sohnloang in nehnloannge, jehpirin pwoapwoaud.
31A oang in irair oauwe, kamwai johkin wadek dahkij Koahs pwehng kamwai? Ih pwa,
32‘Ngoahi ioar Koahs in Abraham, Koahs in Isaac, apel Koahs in Jacob.’ Ih ioar Koahs in armaj mour, jaudi armaj mehdi.”
33Nehn en pokonno rong ih, irai ken pwuriamweikihla ah padahk.
34Nehn en Pharisee‑ok rongda pwa Jesus ne kasukihdi en Sadducee‑ok ahr peidekkok, irai ken pokopene.
35Emen in irai, johnpadahk in Kojonneddo nimen lidipihki Jesus ki peidek oau,
36“Johnpadahk,” ih idoak, “ia kojonned wa ma keiou kajampwal nehn Kojonneddok?”
37A Jesus japoanngki, “‘Koawoa en ipwilki Koaunno oamw Koahs ki oamw mohngiong ohroj, ngenimwen ohroj, apel oamw lamlam ohroj.’
38Me ioar kojonned wa ma keiou Koalik apel kajampwal.
39A kariau in kajampwal ma pel doahroar me: ‘Ipwilki mihn impoamw doahroar oamw ipwilki pein koawoa.’
40Kojonned in Moses kan ohroj apel padahk in johkohp kan ohroj poahjoanda pohn kojonned riau pwiai.”
41Nehn en Pharisee‑ok pokopene; Jesus idoak oang irai,
42“Ia amwai lamlam oang Messiah? Kijehn kadaudokin inje ih?” Irai japoang, “Ih kijehn kadaudokin David.”
43Jesus pel idoak, “Amwda Ngenin Koahs ke audohkihda David pwa Ih en panginki ‘Oai Koaun.’
44‘Koaunno pwehng oai koaun: Koawoa en mwindi oang in loapmoaun in ngoahi, Oaroh ngoahi kihdihoang oamw imwinsihsi kan pehn pwoalkoamwen kan.’
45Ma David panginki ih ‘Koaun’, imdoahr ih en kak wia kadaudokin David?”
46Johpwa emen kak japoanngki Jesus mehkij; Jang rehnno inla, johla emen nimen idoakkoang ih mehkij.
