1Anjoauwo ma Jesus no doari ah kioang kaweiddok oang nah sohnpadahk eijek roahmenno, ih inla jang o pwa ih en skuhli pel padahk nehn arai koaujoan kan.
2John Johnpoapdaij, mine nehn kalpwuhj, rongda pwa da Christ wihwia, kadarla nah sohnpadahkkok ipen Jesus, kalelpoak.
3“Koawoa oar ma John Johnpoapdaij ma pirin indoa, ke kamain pel kajkajik emen sohrohr?”
4Jesus japoang, “Pwurla pwehng John da kamwai rong apel kapang:
5‘Majkun kan kapangda wija, mwoasor kan alu, irai kan ma anki lepa mwehula, pongpong kan rongda wija, mehdi kan mourda, Rongmwehu no pel padahk oang armaj joamwoahmwoa kan.’
6Meid pai armajjok me johpwa peikajalki ngoahi.”
7Anjoauwo ma nihn John sohnpadahkkok pwurpwurla, Jesus sapda siksikoahng pokonno doahr John: “Da kamwai inlahki nehn japwsoahn ipen John pwa kamwain kapang? Alek pas jahkkihla enngo?
8Ma jaudi, da kamwai inlahng kapang? Woal men kapwasda inenin mwehu? Irai ma kin kapwasda mwehu kin mine nehn umwen nahmwarki.
9Doari da kamwai inlahng kapang? Johkohp men? Eh, ngoahi pwehng kamwai, pel koalikjang johkohp men.
10John ioar ma puk joarwi pwa: ‘Koahs pwa, ngoahi pirin kadarwe noai johnpakairro mwohn koawoa, ma pirin koaunopda allo mwohn koawoa.’
11Ngoahi pwehng kamwai in mehlel: Johpwa armaj men ma mour nehn jampah laplap jang John Johnpoapdaij; a ih ma keiou siksik nehn Wein nehnloannge laplapjang John.
12Jang nehn rehn kan ma John kapkapahrak leldo apkas, Wein nehnloannge inenin apwalkihda mwoakidpwi, apel irai ok ma wia mwoakid pwiai jong en koldi.
13Mwohn John Johnpoapdaij, Johkohp kan ohroj apel kojonned en Moses sikoa doahr Wein Koahs.
14A ma kamwai nimen kamehlehle, John ioar Elijah ma kokohppok sikoa ma pirin indoa.
15Armaj men ma mine sioa mihn rongrong, a ih en rong!
16“Da ngoahi kak karjahkihoang armaj en rehn pwiai? Irai doahroar jeri kan mwindi nehn market kan poangpoanglahng epwi:
17‘Kamai koajoang oang kamwai, a kamwai johpwa kahlek; kamai koaul ki koaul en mehdi, a kamwai johpwa joang!’
18John indoa, ih kaijihjol apel joah nim wain, a armaj ohroj pwa, ‘ih dirkihla ngen jaus.’
19Anjoauwo ma Nihn Armaj indoa, ih mwinge apel nimnim, armaj ohroj pwa, ‘kapang woal menen! Ih mijen mwinge apel sohn nim jakau men, Ih pirienki johnrik daksissok apel armaj jekenkennok!’ En Koahs loalkoang kadehdehda ah wihwia pwung kan.”
20Doar Jesus sapda kajalehda ah japwungki koaujoannok ma Ih wiahda loapdirin ah manmannok, pwa sowoahk johpwa koluhla apel wikla.
21Ih pwehng irai, “Inenin naunahng koawoa, Chorazin! Pel naunahng koawoa, Bethsaida! Pwa manmannok ma no wiawihoang kamwai, wiawihoang Tyre pel Sidon, irai ne likkoaukihda likkoauwin injinjuwed pel kamwroahdihoang moalkoahr pohrai, pwa en kajalehda irai no koluhla apel wikla.
22A ngoahi pwehng kamwa, Ngoahi nimen kamwahn kidal, pwa nen rehnin kadeikko Koahs pirin kajalehda Ah kalahngan oang sohn Tyre pel Sidon koalik jang kamwa.
23A koawoa, Capernaum, koawoa ma nimen leldahla nehnloannge, koawoa nen jinoakekdihla nehn ehl! Pwa manmannok ma no wiawihoang koawoa, wiawihoang sohn Sodom, irai nen minehr lel rehnnoauwe.
24Ah koawoa en kidal pwa rehnin kadeikko, Koahs nen kajalehda Ah kalahngan oang Sodom koalik jang oang koawoa!”
25Anjoauwo Jesus pwa, “Ngoahi kapnga koawoa, joamoai, Koaun in nehnloannge apel jampah! Ngoahi kapnga ki koawoa, oamw kajalehng irai joaloalkoanngok mehkan ma koawoa oakihjang irai ok ma koahioak apel loalkoang in jampah.
26Joamoai, me ne wiawi pwa ioar mehwa koawoa pwungki.
27“Me ohroj no mweimweioang ngoahi jang ipen Joamoaiho. Johpwa emen kidal Nahu likin Jamahu, pel johpwa emen kidal Jamahu likin Nahu pwilihki araihok ma Nahu pilda pwa Ih en kajalehng irai Ih.
28“Kamwai ohroj indoa ipoai kamwai ma ne koakoahkla apel soausoaukihla amwai wijik kan, ngoahi en kakoammoalihla kamwai.”
29Kamwai oaloa aproahda oai mihn wijikke, apel skuhl jang ngoahi, pwa ngoahi ma aksiksik apel nehn kapehd karkarahk, kamwai nen diar koammoal nehn ngenimwaikan.
30Pwa oai mihn wijikke ma ngoahi pirin kioang kamwai, moangoai apel marahra.
