1Jesus-el angkanem ikwer-rnem ilek, renh-rnem akalty-anthek arrpemarl,
2“Akngey-kenh-angkwarr alakenh aynteyel. Atyetyart anyent anenh. Akngerr akarrirrek, amern kwenty arlkwetyek, alerikw ikwerenh itengirrenty aytaretyek.
3Warrkenh-rnem thwenek, ingwer-rnem ikngwerl-alpetyek. Rerneman arlkarirrek ikwerety.
4Ra warrkenh ingwer-rnem thwenek, ‘Ingkerrenh ikngwerl-alpenherr-arey, amern kwenty arlkwetyek, aker pwelek anter-akngerr ilek-ilek, arlkwetyekant-anem.’
5Rernem ikwer awelhey-angenh. Ingwer-rnem amern weyt atherrk inetyek, ingwerenty amentewarl alherlewenh, ingwerenty amentewarl anew-anenh. Ingwer-rnem store-itwek warrkirrenh ampwal ilek-ilek mpwarenh.
6Ingwer-rnemel warrkenh ingwer-rnem anterrkwemel atwek ipmek-antey.
7Atyetyartel inngantey ingwer-rnem irlkentyilek, rernem apmwernem atwetyek, warl-rnem arrtyeynetyek.
8Ra warrkenh ingwer-rnem thwenek, ingkerrenh ikngwerl-alpetyek, ‘Ingwer-rneman arrwekelarl ayernek-rneman arlkarirreyel amern kwenty ikwer-warl apetyey-angenh. Apmer arrpanenh-warl ingkerrenh ikngwerl-alpenherr-arey, ingkerrenh apetyeyek, kwenty arlkwetyek.’
10Rernem amperirrenhey-alpek akwerr-warl ikngwerl-alpek, artwa ingwerek-ingwer ikngwenhey-alpek warl ikwerenh-warl, amern arlkwetyek, artwa mwerr-rnem-then apmwernem-then ingkerr apey-alhek amern kwenty arlkwetyek. Akngerr innga akarrirrek, warl kwen arrkngelek-anem.
11Akngerr akarrirrek, arnkwa mwerr-angkerel aylpemel. Atyetyart rap arey-alhek artwa ingweran arnkwa aterrng-akertarl, arnkwa mwerrek aylpey-angenh.
12Atyetyart ranem ayernek, ‘Ilek-kety nga arnkwa mwerrelan aylpey-angenh?’
13Atyetyartel-anem artwernem ilanthek, artwa iltyatherr arertnetyek, ingkety-atherr-then aketh-warl-anem iwetyek, atwemengk-warl, artewentyel arrangkeyel-rnem-warl.
14Akngey akngerrek yangkelhek, irrpety ingwer-rnemant-anem ra arrwekel-antey rlwaneynek, ikwerenh-rnem anayntetyek.”
15Pharisee-rnem anyentirrek angkerretyek, rernem Jesus renh irrtywerl-ampernetyek, ra apmwel-areth angkenty renh awetyek.
16Herod-el-rnem-then, Pharisee-rnem-then rernem artwernem thwenek, Jesus renh ayernetyek, “Ingkartay, anwantherr ngenh iterl-areyel. Ngan artwa arraty aneyel, ntwa Akngey-kenh angka arraty akalty-antheyel. Nga ahern-arenyek awelhey-angenh.
17Nthakenh nga iterreyel, anwernantherr kapment ilkwernem man antheynetyek, menty?”
18Jesus ra iterl-arek, rernemarl irrtywerremel angkek ikwer-warl. Ra renh-rnem ilek, “Arrantherr ayenh arrkerneyel, ayeng arrekantherr akengenty angketyek.”
19“Ngkwelty atyeng akngetyay, atha tax maney aretyek.” Rernem ngkwelty anyent renh anthek.
20Jesus angkek, “Angwenharl inngerr-akertan nhenhan, itna angwenh-kenh-akert nhan?”
21Rernem ikwer ilek, “Caesar, atyetyart kapment ilkwarlap ran nhenhey!” Jesus-el renh-rnem ilek, “Man-areny-rnemelarl arrenhantherr manek ankem, arrantherr man renh-rnem anthenherr-arey, rernem-anem kapment man renh anthetyek. Akngey-kenh warrk-rnemel man ineynem, arrantherr ingkerrenhel arrernetyek arrpemarl, Akngey ikwer-anem rernem man renh arrernetyek.”
22Jesus renh awemel, rernem apateyelpek, Jesus-el angka arraty ikwer-rnem ilekarl. Kel rernem alpek-anem.
23Artwa Sadducee-rnem Jesus ikwer-warl apetyek, renh ayernetyek. Sadducee-rnem akalty-anthenh, arrewaly intem-antey ayntem, nthakenh ipmepenh akwentey-angenh. Rernem Jesus renh ayernek.
24“Ingkartay, Moses-el angka anwekantherr arrernek, arelh inpertirrenty, ayteyikw ranemarl arelh ikwer-warl itengirretyek ikwer-atherrenh-anemarl, ampa ingwer-anem anetyek.
25Anew ikwerenhek arelh anyent ran inpertirrek ampeweny-anteyarl, ra ayteyikw ikwerenh-itwel itengirrek arrpemarl. Arelh ra inpertirrek ayteyikw ingwerek-anemarl, ampeweny-antey arrpemarl. Ayteyikw-rnem 6 ilenh-rnem arelh anyent ikwer-itwel-antey, rernem ingkerrenh anyentarl-anyentarl itengirrek, arrewaly ingwer iylpelerlewenty, awayikw ingwer-itwel itengirremel, ra ampeweny arrangkw arrpemarl. Artwa anyent aytey aynek itengirrek, arelh ikwer-itwel-antey. Artwa ranem ilwek, ampeweny-antey, arelh anyent ikwerenh ampa ikwer-atherrenh aney-angenh-antey.
27Arelh ranem ilwek.
28Artwa rernem ipmepenh akemirrenty, artwa angwenharlap arelh ikwerenh inngan?”
29Jesus-el renh-rnem ilek, “Arrantherr apmwel-areth akalty-antheyel Akngey-kenh angka arrantherr iterl-arey-angenh. Arrantherr Akngey iterl-arey-angenh-antey, Akngeyan rlterrk ilkwakertarl aneyel, ingkerrenh ipmepenh itethiletyek.
30Rernem ingkerrenh itethirremel alpeyenh rernem aney-alpeyenh intem-antey, arelh-itwel itengirrey-angenh, irrwerl-areny-rnem-apeny.
31Akngeyel arrwekel-antey renh-rnem ilek, rernem angkeparl itethirreyenh, ipmepenh. Arrantherr angka ilenh iterl-arey-areny, angka ilenhan Akngey-kenh pipel arraty inngarl aynteyel. Arwerl wethelarl lherrm ampenh-apeny.
32Akngeyel Moses renh ilek, ‘Ayeng ngkwenhek-rnem ingkerrenhek Atyetyart aneyenh, Abraham-ek, Isaac-ek, Jacob-ek.’ Rernem iteth-antey aneyarr-alpek Akngey-kenh apmerel irrwerl, Abraham-akerr, Isaac-akerr, Jacob-akerr. Arrantherran ingwer-rnem apmwel-aretharl akalty-antheyel intem ilwenty-arrpantey. Rernem ipmepenh itethirremel ingkerrenh alpek Akngey-itwel aney-alpek, intem-antey. Alakenh-anyem, anwantherrarl ilwem, Akngeyel anenhantherrenh angkep arrpemarl itethilem, anwantherrap apmer ikwerenh-warl irrwerl alpem, ra arrenhantherr arntarnt-arayntetyek apmer ikwerenh-itwek intem-antey.”
33Jesus-el renh-rnem apatel-anthek.
34Pharisee-el-rnem awek-penh, rernem anyentirrek, angkerretyek.
35Artwa anyent ingwerel Jew-kenh-angkwarran iterl-arenhan. Ranem Jesus ikwer arrkernelhek, ayernemel,
36“Ingkartay, Moses-el angka akngerr anwekantherr arrernek. Nthenh-apenyarl angka rlterrk impen inngan, anwantherr renh apentetyek?”
37Jesus-el renh tyernek, “‘Anyent renhant apentetyek, anyent ikwerant iterretyek’,
38Angka nhanyem impen, arrwekeleny.
39Akngey-kenh angka ingweran alakenhaym aynteyel: ‘Arrantherr ingwer-rnem arntarnt-arayntetyek, ikwer-rnem inkwerelh-ayntetyek, ampa arrekantherrenh-rnem arntarnt-areyel-apeny.’
40Angka ingwer-rnem arrangkwarl, Moses-kenh angka ingwer-rnem artwa angkakert ingwer-rnem-anem ingkern-they-anem aremirrek.”
41Pharisee-rnem ikwer-itwek rtnenh-antey, Jesus-el renh-rnem ayernek,
42“Nthakenh arrantherr iterl-areyel Christ itethiley-angker renhan. Angwenh-kenh ran?” “Ranem Atyetyart David-kenh,” rernem renh tyernek.
43Jesus-el-anem renh-rnem tyernek, “Akngey-kenh itnwengel ikwer lwewarrernek. David-el Christ renh itnewek ‘Atyetyart atyenh’.
44Akngeyel atyetyart atyenh renh ilek, ‘Atyeng-itwel ana! Arlkarirreyel-rnem, atha ngenh atyetyart arrernem ikwer-rnem.’
45Nthakenh atyetyart David-kenh? David-el renh atyetyart antweyel. Nthakenh arrantherr iterreyel.”
46Ingwerentyel arraty renh tyerney-angenh-they, rernemap menty-anem ipmelhek, angka ingwerek ayerney-angenh-anem.
