Matiu 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Jisasi'a fronka kea mago'ene zamagrikura anage huno zmasamine.

²Mona kumamo'a mago kini ne'mo mofavre'amo arave huku higeno kave retro hu'neankna hu'ne.

³Huteno Agra kazokzo eri'za vahe'a, zmagima hu'noa vahe'zga ome kehinke'za, aravemahu nezantera eho huno huzmantege'za vzanagi, zamagra omegahune hu'naze.

⁴Mago'ene ruga'a kazokzo eri'za vahera hunezmanteno, anage hu'ne, zmagima hu'noa nagara zmasamiho, Nagra aravehu nezana hago retro huntogeno me'ne. Agusage bulimakao afu'zgani'a, ko ahe'za traga huvazi antazageno, mika'zana retro hunte'ne. Ana hu'negu aravemahu nezante eho.

⁵Hianagi anankea ontahiza atre'za vu'za e'za hu'naze. Mago'mo'a hoza arega vigeno, mago'mo'a zgo eri'za ma'are vu'ne.

⁶Ruga'amo'za eri'za vahe'a zmazeri haviza nehu'za, zmahe fri'naze.

⁷E'ina hazazamo, Kini ne'mofona tusiza huno rimpa haviza higeno, sondia vahe'a huzmantege'za vu'za ana vahe'ma zmahe'fri'naza vahera ome zmahe nefri'za, rankuma zmia teve taginte'naze.

⁸Anante Agra kazokzo eri'za vahe'agura anage huno zmasmi'ne, aravema hu nezana hago trotra hunte'ne. Hu'neanagi zmagima hu'nona vahe'mo'za efregara osu'naze.

⁹E'ina hazagu, ranra kampi vutma inakna vahema zmagesuta, zmagi hinke'za aravema hu nezantera eho.

¹⁰Hige'za ana kazokzo eri'za vahe'amo'za rankuma kampi vu'za e'za hu'za zmagaza vahe'a, havi avu'ava nehaza vahero, knare vahero kehutru hazage'za, ana aravehu nompina, zamagi hu'naza vahe'krerfamo'za avite'naze.

¹¹Hu'neanagi, Kini ne'mo'ma efreno arave hutema zmagi hu'nea vahepima eme keana, anampina mago nera aravehu kukena osu'nea ne' emani'negeno ke'ne.

¹²Hianagi Agra ana neku anage hu'ne, nenfuga aravemahu kukenama osu'nenka kagra inankna hunka amafina efre'nane? Hianagi agrama hukeaga omne'geno mago keaga osu'ne.

¹³Anante Kini ne'mo eri'za vahe'a zmasamino, azeritma nofi agare azante anakitetma, asgahutma tusi'a hanizampi matevutrenkeno, anampinka zvira neteno, ave aninkreki hino hugahie.

¹⁴Na'ankure ra'ma'amokizmi ke hu'neanagi, osi'a naga huhampri nezmante.

¹⁵Anante Farisi vahe'mo'za magopi omeri truhu'za, rehesageno, Agra'a hania kefinti azerisune hu'za ke retro hu'naze.

¹⁶Hute'za zamagri zmage nentaza naga'ene, Herodima amage nentaza disaipol naga'ane, magoka huzmantage'za Jisasinte vu'za anage hu'naze. Rempi huzami nere, tagra antahi'none, Kagra tamage ne'tfa mni'nenka, tamage ke'moma hu'nea kante antenka Anumzamofo kankura rempi hunezmine. Mago'mofonkukera nosane, na'ankure mago'mofontega nontane.

¹⁷Hagi tagrira tasmio. Kagra nankagesa nentahi'ne? Knare hu'negu, Sisama ami takisi zgoa amigahumpi omigahune?

¹⁸Hianagi, Jisasi'a havi antahi'zama eri'zana nezmageno anage hu'ne, tamagra tavre vahere! Na'a higetma renvatga huta negaze?

¹⁹Mago'ma takisima nehaza zgofinti eri naveriho, hige'za mago zgo eri'za Agrite e'naze.

²⁰Jisasi'a zamagriku anage hu'ne, ama aza amema'ane aza naneke krente'naze?

²¹Zamagra ke nona'a hu'naze, Sisa su'ane hazageno, Agra zamagriku anage hu'ne, anama huno, Sisa'zama me'nesiana, Sisa amiho. Hagi Anumzamofo zama me'nesiana, Anumzamofo amiho.

²²Anankema nentahi'za antri nehu'za, Agrira atre'za vu'naze.

²³Ana zupage Satusi mono vahe'mo'za (vahe'mo'za fripintira o'otigahaze nehaza vahe'mo'za) Jisasinte e'za eme antahige'naze,

²⁴Rempi huzami ne'moka, Mosesi'a huno, mago'ne'moma mofavre kse onte'nenoma frisigeno'a, nefu'a ana kentora a'erineno nefu fri'nea ne'mofo mofavre ksentegahie.

²⁵Tagripina 7ni'a kogna mni'nafinti, agonesa mofavremo a' eriteno, mofavre onteno fri'geno, ana ara negna erinte'ne.

²⁶Anantemo'a anazanke hu'ne, hagi 3mo'a anazanke huno tamino 7nimofonte vu'ne.

²⁷Ana ara henka fri'ne.

²⁸Ana hu'negu Fripinti otisaza kna'zupa, ana kognafintira iza a' manigahie? Na'ankure ana miko'mo'za ana ara erinte'naze.

²⁹Jisasi'a ke nona'a anage huno zmasmi'ne, Tamagratmi tmazeri havia nehaze, na'ankure avontafero, Anumzamofo hanavea antahi'amara nosaze.

³⁰Na'ankure fri'nehnafinti'ma oti snazana, arave hu'zana omnesigeno, ara vasi omiami hu'zana omnesigeno, monafinka ankero vahe'kna hu'za manigahaze.

³¹Hianagi fri'naza vahe'ma otisaza zanku'ma Ra Anumzamo'ma tamagriku'ma hu'nea kea hamprita ontahinazo.

³²Nagra Abrahamuma Aisaki'ma Jekopu Anumza mni'noe hu'neana? Agra fri vahe'mofo Anumzana omni'ne, hagi kasefa hu'za mni'naza vahe'mofo Anumzane. (Ekso-Uti 3:6)

³³Tusi'a vea kevumo'za ana nanekema nentahi'za, rempima huzmia kegura tusi zmagogogu nehu'za antri hu'naze.

³⁴Hianagi Farisi vahe'mo'zama antahi'zama, Satusi vahera ke'osza kema Jisasi huzmantege'za, Farisi vahe'mo'za magopi eritru hu'naze.

³⁵Zamagripinti mago'zmimo'a, kasegere ugagota hu'nemo, reheno kenaku agenoka hu'ne.

³⁶Rempi huramine'moka, inana tra kemo mareri'agetereno vugagota hu'ne?

³⁷Jisasi'a kenona'a asmino, Rana, kagrika'a Anumzana, mika tumokareti ene, mika kagu kamenteti ene, mika antahintahi ka'areti avesinto. (Diu-Kas 6:5)

³⁸Ama e'i pusama huno, vugagote'nea kasege.

³⁹Anante'ma hu'neana, kagragu'ma kavesi'nentanaza hunka, tva'onkarema nemnisimofona avesinto hu'ne. (Lev-Pris 19:18)

⁴⁰Mika kase'gemo'ene, kasnampa vahe'mofo kemo'a, asma tare tra kemofonte aniri'ne.

⁴¹Farisi vahe'ma eri'tru'ma nehazageno'a Jisasi'a mago zmagenoka ke zmantahige'ne,

⁴²Tamagra Kraisinkura nankna tamagesa nentahi'ze? Agra iza ne' mofavre? Huno zmantahigege'za, Deviti mofavre hu'naze.

⁴³Agra zamagrira anage huno zmasmi'ne, nahigeno Avamumo Devitina asmigeno Ranimoke hu'ne?

⁴⁴Ramo'a nagri Rantega anage hu'ne, tmaga kzigani'a mni'negena, ha' vaheka'a zmare kagri kagafi ataneno hu'ne. (Sam-Zga 110:1)

⁴⁵Deviti'ma, Ra'ne huno'ma hu'neana, inankna huno agri mofavrea manigahie?

⁴⁶Ana kemofo nona'a, mika'amo'za mago'a kea huntega osu'za, ana knareti'ma vu'neana koro kazigati mago'anena, Agrira agenoka osu'naze.