Matthew 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Doar Jesus kapahrak oang pokonno apel nah sohnpadahkkok,

²“Johnpadahk in kojonned kan apel Pharisee‑ok ioar irai anki manman in kawoahwoa kojonned in Moses.

³Doari, kamwai uhdahn pirin pel peikkoang apel kapwaiahda me ohroj ma irai kin padahkihoang kamwai; a kamwai johpwa japjang arai wihwia kan. Pwa irai johpwa kin kapwaiahda dahkij arai kin kapahrakkihwe.

⁴Irai kin piroahdihoang wijik soausoau pohn armaj. Irai johkin kamwoakid apas jandin poahrai pwa en jeuwejehda wijik soausoau pwiai.

⁵Me ohroj ma irai kin wia, irai wia pwa en janjal mwehu mwohn armaj. Kamwai soahk mwehu koalik in koakon kan ma mine in soamwoarai apel in poahrai ma iren Puk Joarwi kan mine loaloa apel roairoai in mihn pirapirin arai likkoauwo.

⁶Irai perenki mwindi in moangoan sehpil kan nehn kamdipw apel mine nehn jeia ma keiou janjal nehn jinakoke kan!

⁷Irai perenki armaj en kin soahk irai pohn al kan, irai pel perenki armaj en panginki irai ‘johnpadahk.’

⁸Kamwai joah kin nimen armaj en panginki kamwai ‘Johnpadahk’, pwa kamwai ohroj doahroauwoar, apel anki Johnpadahk mennoar.

⁹Pel johpwa panginki emen pohn jampah ‘Mwahmwa’, pwa Jamamwai emennoar doari ma mine nehnloannge.

¹⁰Kamwai joah pel nimen emen en panginki koawoa koaun, pwa amwai koaun mennoar ioar ‘Christ.’

¹¹Minwa ma keiou laplap nehn pwungamwai kan en wia sohn papah.

¹²Pwa emen ma nimen laplap pirin siksikla, a Irai ma kin aksiksik pirin laplapla.

¹³“Ia woahr apwal oang kamwai johnpadahk in kojonned kan, apel Pharisee kan! Mwalaunpwi kamwai! Pwa kamwai kin risingdi jang wanihmw in Wein nehnloannge, a pein kamwai joh kin dilda ke mweidoahng armaj kan ma kin engdehn in dilda.

¹⁴“Ia woar apwal oang kamwai johnpadahk in kojonned apel Pharisee kan! Mwalaunpwi kamwai! Kamwai kin jerkihjang umwen liohdi kan nehn amwai kin lioajoahjki amwai kapkap roairoai. Ioar mehwa kamwai nen oaloahki koaloklok koalik.

¹⁵“Ia woar apwal oang kamwai johnpadahk in kojonned apel Pharisee kan! Mwalaunpwi kamwai! Kamwai kin joarjoaroakjili nehn jed apel kosohwe weipwi pwa kamwai en ukuddoang lamlamin armaj emen oang in amwai lamlam in mihn Jew; nehn ah ne lohdi kamwai kin wiahng ih en warroang inla nehn ehl pehn riahu koalik jang kamwai.

¹⁶“Ia woar apwal oang kamwai johnkaweid majkun kan! Kamwai kin padahkihoang armaj kan ma emen ma kin kahukihla Umw Joarwiho johkin pwukoahki.

¹⁷Armaj majkun pweipweipwi kamwai! Ia mehwa kajampwal in kohl ke Umw Joarwi ma kin kajarwihla kohl.

¹⁸Kamwai pel pwa ma emen ma kahukihla Mwoal Joarwiho, jehpirin pwukoahki; a ma armaj men ma kin kahukihla mihn meiroang in pohn mwoallo ih ioar pwukoahki ah kahula.

¹⁹Ia woahr amwai majkun! Mindahioau ma kajampwal, Meiroang ke mwoallo ma kajarwihla meiroanngo?

²⁰Doari, armaj men ma kin kahukihla mwoal joarwihoau, ih kin kahukihla mwoal joarwiho apel me ohroj ma mine puwoa.

²¹Nehn en emen kin kahukihla Umw Joarwiho, koawoa kahukihla Umw Joarwiho apel Koahs, ma mine loaloa.

²²Nehn en emen kin kahukihla nehnloannge, ih kin kahukihla mwoalen Koahs apel Ih ma mine puwoa.

²³“Ia woar apwal oang kamwai johnpadahk in kojonned apel Pharisee kan! Mwalaunpwi kamwai! Kamwai kin meiroangki oang Koahs eijek kij oau in amwai koapwoahn jampah, apel mihn kioang nimen mwinge ma doahroar mint, dill, apel cumin, a kamwai johkin peikkoang padahk kajampwal kan in kojonneddo ma doahroar pwung paiai, kalahngan apel mehlel. Ioar mehpwiai ma kamwai uhdahn pirin kapwaiahda apel pwilihkihoar minpwiok.

²⁴Johnkaweid majkunpwi kamwai! Kamwai likihla loang jang nehn nimemwai pil pwadoar kamwai japwungla johploahdi kamel?

²⁵“Ia woahr apwal oang kamwai johnpadahk in kojonned kan apel Pharisee kan! Mwalaunpwi kamwai, kamwai kin kamwkelehda likin nihmwai mwoak apel pileis, a loaloa dirkihla dipwjoau ma kamwai kin pein oaloadi jang in amwai kin roprop oang pein kamwai.

²⁶Pharisee majkun men koawoa! Keiou kamwkelehda nehn mwoakko mijkoalkoal, a likin nen pel mwakelkelda.

²⁷“Ia woahr apwal oang kamwai johnpadahk in kojonned apel Pharisee kan! Mwalaunpwi kamwai! Kamwai kin mwehuki mwakelkel in likin joaujoau, a loaloa dir in sihn armaj mehdi apel me kajaus ohroj.

²⁸Pel doahr Kamwai, kamwai jong en doahroar armaj pwung likimwaikan, a loaloa mohngiongimwai kan dirkihla widing apel mwoarjuwed.

²⁹“Ia woahr apwal oang kamwai johnpadahk in kojonned apel Pharisee kan! Mwalaunpwi kamwai! Kamwai kin wiahda joaujoau mwehu oang johkohp kan apel kalingihda joaujoau in armaj mwehu kan;

³⁰kamwai kin pwa, ‘Ma kamai kin pwili mine nehn mwein jamasaihok, kamai nen jehpwili kojukdi johkohppok.’

³¹Kamwai ne pein kadehdehda pwa kamwai kijehn kadaudok en irai ok ma kojukdi johkohppok.

³²Kamwai doaudoaula kadoarihla dahkij ma jamamwaihok ne sapkihda.

³³Sinekpwi kamwai, ipwihpw in sinekpwi kamwai! Kamwai lemleme pwa kamwai kak pisjang kadeik in nehn ehl?

³⁴A doar ngoahi pwehng kamwai pwa ngoahi pirin kadardohng kamwai johkohppwi, woal loalkoangpwi, apel johnpadahkpwi; kamwai pirin kojukdi epwi, kalohpwuhla epwi, poki epwi nehn amwai jinakoke kan apel kahuj jang irai nehn koaujoan kan.

³⁵Doari, imwlahn mehpwiai, koaloklok pirin aluhwoang kamwai pwa jang in amwai kojukdi armaj ma joh diparai; sapda jang Abel lel kojkojdihn Zechariah nihn Berechiah, ma kamwai kojukdi nehn pwungen Umw Joarwiho apel mwoal joarwiho.

³⁶Ngoahi pwehng kamwai in mehlel pwa koaloklok in kojukdi armaj pwiai pirin aluhwoang armaj in rehn oauwe!”

³⁷“O Jerusalem, Jerusalem! Koawoa ma kin kojukdi johkohp kan apel kasoahki sakai johnpakairrok ma Koahs kadardohng koawoa! Pehn doapoa ngoahi nimen jupwurpene nihmw jeri kan doahr jummwa pein men kin kihpene nah pwinihk kan pehn poah, a koawoa joah nimen mweidoahng ngoahi!

³⁸A doar, oamw Umw Joarwihn pirin soahnda johla sowoa.

³⁹A ngoahi pwehng koawoa me, koawoa nen johpwa pwuroahng kapang ngoahi oaroh koawoa en pwa ‘Koahs en kapaiahda ih ma indoa in oadoan Koaunno.’”