Mateu 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Iesu kadu aitam vona tana‑minikuna wayahina tomotau ipupuei.

²Ivona, “Yaubada ya pai veimea taina deina. Aitam kiniV mamaei, ka natuna onotona anianina nau‑vevewanei ya tavine wayahina.

³Ka kini‑nanaV tauna ya tau paisewa vi‑tune‑neiei, ine aviyaivia ya nuanua mataedai vi‑aniani wayahina. E ya tau paisewa itauya iomo tomotau‑naia wayahia, kate tomotaui, avaha kini‑nanaV ya tuyeha inononi, didikuna ivihahaiei.

⁴Ka kini‑nanaV, avaha yai dewaia anamanei, tau paisewa tupwai kadu vi‑tunei, ine, e imataedai havine deina. ‘Yami kiniV anꞌ aniani avaha vo‑vi‑aiaia, potapotami, kadu ya bulumakauV anani ka bulumakauV binabinai avaha vunu‑neiei, ka vahitau habuhabuna deina. Ka tauna vonevonemi, “Unꞌ‑omo natu ya tavine anianina wayahina, kanꞌ‑am, e kadewa‑haiawa.” ’

⁵Kate tomotaui kadu mataedana ivihahaiei, eha itꞌ‑omo. Ka tupwai imaꞌ‑kavokavovo, ka tupwai ine yai baguna wayahia, kadu tupwai mani paisewa idedewei, aviani taui yai nuanua.

⁶Ka tomotaui tupwai kini‑nanaV ya tau paisewa ipoyꞌ‑avini, ivunu‑neiei, inau‑vi‑anigi.

⁷Ka tutana kini‑nanaV dewaia tanoi vaneana nononi, tauna nua‑goyo ani‑vainena, ka ya tau nau‑havia vi‑tune‑neiei ine, e taui tau nau‑vi‑aniga‑naia imutu‑neiei, ka yai meagai itunu‑anai akanai.

⁸Ka kini‑nanaV ya tau paisewa honei iomo, e vonei, ivona, ‘Tavine anianina avaha vo‑vi‑aiaina mamaei, kate tomotau‑naia naona amataedai, taui eha nau‑wawani inꞌ‑omo.

⁹Wayahina, uneine etawana wayahia, ka avi tomotau uvaniahai uvonei inꞌ‑omo tavine anianina wayahina, inꞌ‑ania.’

¹⁰E tau paisewa‑naia ine tomotau habuhabui ivaniahai, ivahautei, tupwai goyogoyoi, ka tupwai ahiahi. Ka tavine a manua ivi‑nau‑vi‑anai.

¹¹Ka kini‑nanaV omo manuana, inui, e ya nuanua tau bwanibwani dudueyei. Ka tauna onoto aitam dueyei, ka onotona eha tavine kwamana ta‑weteni.

¹²Wayahina kini‑nanaV vi‑tanaiei, ivona, ‘Au niau, tavine kwamana eha eta‑weteni, wayahina koiaka awaehem baina enu‑mei?’ Ka onoto‑nana matauta nui eha ana pata kini‑nanaV ya vi‑tanai na‑nau‑pate.

¹³Wayahina, kini‑nanaV tauna ya tau paisewa vonei, ivona, ‘Onoto taina upoyꞌ‑avini, e nimana ka aena uyohoyohoni, e uhaponei na‑opu novanovana nihenina, e tanoi wayahina na‑tou, na‑nua‑vita inahe wayahina.’

¹⁴Unononi. Tomotau habuhabui Yaubada ya mataeda inononi, kate ai vi‑am wayahia nau‑wawani tauna vi‑nua‑dadanei? Eha habuhabui.”

¹⁵Ka Parisi ine, e yai vi‑nua‑hauhau ivo‑vi‑aiaia medeina Iesu ipoyꞌ‑avini, ka ivona, “Kavi‑tanatanaiei, ka ya nau‑pata nihenina ya goyona kavaniahei.”

¹⁶Ka taui wayahia ai tau vi‑muni‑waiwai tupwai ivi‑nua‑dadanei, kadue Erodi yaiana nui ivi‑tunei iomo Iesu wayahina, e ivona, “Tau Viwavenena, avaha anamanem wamke ahiahim, kadu wamke Yaubada ya nuanua eviwavenei tunutunuhina tomotau wayahia. Kadue wamke eha tomotau yai nuanua wayahina eta‑matamatauta, iuna taui ai wava anani eha aitam aviani wayahima.

¹⁷Wayahina, yama vi‑tanai taina enau‑pata wayahiai. Nau‑wawanika SisaV wayahina takesiV kaboui o eha?”

¹⁸Ka Iesu avaha yai nua‑goyo anamanei, wayahina ivona, “Itomi tau vitupu. Aviani wayahina udewa‑dadana unau‑daeu?

¹⁹Akanai, aitam kina takesinaV wayahina uomanei wayahiua adueyei.” Ka kinana aitamoata iepe, ivenei dueyei.

²⁰Kadu Iesu vonei, ivona, “Kina taina hetana, koiaka mayamayauna iginumi mamaei, ka koiaka ana wava iginumi mamaei?”

²¹Ka ivona, “SisaV.” Ka Iesu nau‑patei, ivona, “Deina. Wayahina, aituhu aviani SisaV ya gugua, akanai SisaV uvenevenei, ka aituhu aviani Yaubada ya gugua, akanai Yaubada uvenevenei.”

²²Ka Iesu yana vona na nua‑uyana inononi, wayahina nuai venau‑tamatamana, ka ini‑tawanei.

²³Ka auyewana wayahina, tupwai Sadusi iomo Iesu wayahina. Taui eha mini‑havine ita‑vitumahane, kate mini‑havine wayahina ivi‑tanaiei,

²⁴ivona, “Tau Viwavenena, Mosese ivona aituhu onoto awana ka eha natunatui, ka aituhu onoto‑nana aniga, munia wadaena nau‑wawani namoiana tavine, e aituhu vavinena vi‑natuna, tevanina vivane onoto aninigana natuna.

²⁵Ka aitam onoto vavaneina ai yau 6 nui imamae, ka unu‑tauna tavine, e aniga, ka eha aitam natuna. Ka taina nepena vaneina wadaena tavinei.

²⁶Ka vꞌ‑inuana kadue deina, ka vꞌ‑itonuna deina ineine, e pai nau‑yehata vi‑7‑na.

²⁷Ka pai nau‑yehata wayahina, vavinena kadue aniga.

²⁸Ka mini‑havine anꞌ auyewa wayahina, yawai vovouna wayahina, ononotoi ai yau 7 wayahia, koiaka tauna awana? Iuna habuhabui itavinei.”

²⁹Ka Iesu ivona, “Itomi unuanua bwagona. Iuna eha Iginuma utꞌ‑anamane, kadue eha Yaubada ya bagibagi utꞌ‑anamane.

³⁰Mini‑havine munia, tomotau eha itavine. Ka taui imini‑havine, yai dewa anelose wahuma aitamoata deina.

³¹Ika, tau anianiga yai mini‑havine wayahina mwagemwagemi. Iuna eha Iginuma uta‑iaiava ahiahina. Unononi, Yaubada yana vona wayahimia, ivona,

³²‘Yauke Abaraham ya Yaubada kadu Isaki ya Yaubada kadue Iakobo ya Yaubada.’ Ka Yaubada eha tau anianiga yai Yaubada. Tauna taui yawayawai yai Yaubada.”

³³Ka tomotaui yoko nihenia ya vonana inononi, ka nuai vi‑tupatupa ya viwavenena wayahina.

³⁴Ka Parisi yoko, avaha inononi vivane Iesu Sadusi yoko yai vi‑tanai nau‑patei ahiahina ka vane‑tawanei tomotau mataia deina, taui inau‑hohona‑havine, ka iomo Iesu wayahina.

³⁵Ka taui wayahia veimea a tau nua‑uya aitam omo Iesu wayahina, nuanuana aitam vi‑tanai wayahina na‑nau‑dadani.

³⁶Ivona, “Tau Viwavenena, veimea habuhabui wayahia, avi veimea ananina?”

³⁷Ka Iesu ivona, “Veimea ananina taina, ‘Yam Kauvea Yaubada evi‑ateteyei nuam habuhabuna wayahina, kadu ininim habuhabuna wayahina, kadue yam nuanua habuhabuna wayahina.’

³⁸Vonana vona ananina, kadu veimea naona.

³⁹Ka kadu vꞌ‑inuana taina deina, vivane, ‘Tomotau habuhabui edewa‑vidovidohei taum nuanuam deina.’

⁴⁰Veimea habuhabui ai pai mini, kadu tau apa‑taputapu yai iginuma habuhabui ai pai mini ivinꞌ‑omo veimeaia wayahina.”

⁴¹Ka Parisi‑naia imimini, ka Iesu vi‑tanaiei, ivona,

⁴²“Medeina unuanua Tau Ito‑yavuha‑nana wayahina? Avi dede yana dede?” Ka taui ivona, “Davida yana dede wayahina na‑omo.”

⁴³Ka Iesu vi‑tanaiei, ivona, “Aituhu deina, aviani wayahina Davida apa‑taputapuei Nuana Ahihinata ya bagibagi wayahina, kadue apa‑Kauveyei deina? Ivona,

⁴⁴‘Yaubada ivona yau Kauvea wayahina, ivona, “Ateiua emanuena a itoava am havia aem iwaunina abouni, eveimeyei wayahina.” ’

⁴⁵Aituhu Tau Ito‑yavuha vivane Davida ya Kauvea, medeina Tau Ito‑yavuha ana pata Davida yana dede wayahina na‑omo?”

⁴⁶Ka eha aitam koiaka ana pata Iesu ya vi‑tanai taina na‑nau‑pate. Ka auyewana wayahina a itoava Iesu yanꞌ aniga wayahina, tomotau imatamatautei. Wayahina, eha aitam koiaka kadue Iesu ta‑vi‑tanatanai‑havine.