1Iesu ese sivarai heḡereḡeredia ai ma e hereva henidia lou, eto,
2Guba basileiana na hanua pavapavana ta na heto, natuna ena headava ariana e karaia.
3Bena ena hesiai taudia e siaidia, e vavedia taudia iboiridia; to asie ura, bena asiema.
4Bena ena hesiai taudia haida ma e siaidia, eto, Na vavedia taudia ba hamaorodia, aniani vada na lai heḡaeḡae; egu boromakau bona egu ubu-ubu ḡaudia vada na aladia; ḡau iboudiai vada eme heḡaeḡae; headava ariana vada aema.
5To idia na e gwau edeede, ta ena uma ela, ma ta eha hoihoi.
6Oredia na hesiai taudia e dabaidia tao, e ḡonaḡonalaidia, bena e aladia mase.
7Hanua pavapavana e kamonai, bena e badu dika-dika, ena tuari oreadia e siaidia lao, unu ala-ala taudia e aladia ore bona edia hanua danu e doua.
8Bena ia ese ena hesiai taudia e hamaorodia, eto, Headava ariana vada e lai vaitani, to na vavedia taudia na dia nanamo.
9Taunabunai, dala katakata aola, ba davaridia taudia iboudiai ba hamaorodia, headava ariana ianina baema.
10Bena ena hesiai taudia na dala katakata ela, e davaridia taudia iboudiai, dikadia bona namodia, e haboudia, bena e hakaudia lao, aria gabuna vada e hahonua lao.
11Bena hanua pavapavana ese vadivadi itadia e raka vareai, bona asi ena headava dabuana tauna ta unuseni ai e itaia.
12Bena e nanadaia, eto, Henamo e, ede o raka vareai toma iniseni ai, asi emu headava dabuana? A una tau na se hereva.
13Bena hanua pavapavana ese ena hesiai taudia e hamaorodia, eto, Aena bona imana ba gui, bona murimuri diburana ai ba doria lasi; unuseni ai bae tai, gadigadidia bae hahedai.
14Badina be hutuma e boiridiamu, to gagadoi mo e abidia hidimu.
15Bena Farisea taudia na e henega bou, ena hereva amo ede bae idoaia toma.
16Bena edia hahediba, Herod ena orea taudia ida, ia dekena e siaidia ela; eto, Hahediba taumu e, dibamai oi na momokani, Dirava ena dala o hahedibalaiamu mai momokanimu ida, bona tau ta garina to garimu, badina be taunimanuna oromadia to lalomu.
17Taunabunai, mani ba hamaoromai, ede o laloa tomamu? Kaisara ena tax monina ihenina maoro eiava lasi?
18A Iesu na edia dika dibana, bena eto, Koikoi taumui e, dahaka dainai o dibaganigumu?
19Tax monina ame haheitalaigu. Bena silver monina ta e henia.
20Bena ia ese e nanadaidia, eto, Ina na daika laulauna bona daika ladana? Idia eto, Kaisara.
21Bena ia ese e hamaorodia, eto, Kaisara ena, Kaisara ba henia; Dirava ena, Dirava ba henia.
22Idia ese ena hereva e kamonai, e hoa; bena e rakatania, dauha ela.
23Una dinana ai, Sadukea taudia haida ia dekena ela: una orea taudia e tomava mase na basie tore isi lou. Bena idia ese e nanadaia, eto,
24Hahediba taumu e, Mose eto, Tau ta bema mase asi natuna, vabu na ihana ese bema adavaia, natuna bema havaraia mase tauna ena.
25Taunabunai, tadikaka na hahitu, tau guna e headava, bena e mase; asi natuna dainai, tadina ese hari vabu ma e adavaia.
26Ma ihatatoina ela bona ihahahituna unu mo e kara toma.
27Dokona ai hahine danu e mase.
28O, tore-isi-lou negana ai, hari hahine be vada daika adavana? Badina be hahituosi ese e adavaia.
29Iesu ese e haere henidia, eto, Umui na o helalo kerere-kereremu, badina be Buka Helaḡa na asi dibamui, bona Dirava ena siahu danu asi dibamui.
30Badina be tore-isi-lou negana ai basie headava: idia na Dirava ena aneru guba ai na heheto.
31A mase amo bae tore isi lou herevana Dirava ese e herevalai henimui na asio duahia, a? Ia eto,
32Lau na Abraham ena Dirava, Isaak ena Dirava, Iakob ena Dirava. Ia na dia mase taudia edia Dirava, a mauri taudia edia.
33Aru taudia na e kamonai, bena ena hahediba herevadia e hoalai.
34Farisea taudia na e kamonai ia ese Sadukea taudia vada e hatuidia, bena idia na ia inanadaina totona e hebou.
35Idia ta be taravatu tauna, bena ia ese Iesu e nanadaia hedibaḡani, eto,
36Hahediba taumu e, taravatu ai haheḡani hereana be edena?
37Iesu ese e haere henia, eto, Lohiabada emu Dirava ba lalokau henia mai lalomu idoinai, mai laumamu idoinai, mai daramu idoinai.
38Ina na haheḡani gini-gunana bona hereana.
39Iharuana binai, ia heḡeregerena, Dekemu tauna ba lalokau henia, sibomu o helalokaumu heḡereḡerena.
40Ini haheḡani ruaosi na taravatu iboudiai bona peroveta herevadia idoidiai anidia e habou.
41Farisea taudia ma e hebou, bena Iesu ese e nanadaidia,
42eto, Umui ese Keriso be ede o laloa tomamu? Ia na daika natuna o tomu? Idia eto, David natuna.
43Ia ma eto, Edeheto David be Lauma ese e rohea, bena eto,
44Lohiabada ese egu lohia e hamaoroa, eto, Lau idibagu kahana ai ba helai, Ela bona inaimu iboudiai na oi aemu ihadaidia ḡaudia ai baina halaodia?
45O David sibona ese ‘lohiabada” e gwauraia be edeheto ia na ia natuna a?
46Idia iboudiai ta ese asine haere henia diba; taunabunai, una negana amo ia inanadaina vada e gariva.
