1Oh inminjoang jamwrou laplappok apel joumajjok no wiahda arai koajoandi pwa irai en kojukdi Jesus.
2Arai joalihdi ih, ukla jang wijahu ukla ipen Pilate, koapina in Rome.
3Nehn en Judas, ma pangla ih, kidalda pwa Jesus no dipda pwa ih en mehdi, ih inenin koluhla mehlel. Doar ih oaloa mwani silper jilihjek koawoa kapwurihlahng jamwrou apel joumajjok.
4“Ngoahi no wiahda dihp,” ih pwehng irai, “pwa ngoahi pangla woal pwung men.” “Ia kaspoahng kamai?” irai japoang ih. “Men pwen oamw pwukoah.”
5Doar Judas kerpwihdi mwanihkoa nehn Umw Joarwiho ih inla lohjakla.
6Jamwrou laplappo pwoakda mwanihok, “Kisai johkak kioang mwani pwiai nehn wijahn nahk in mwanihn Umw Joarwiho,” irai pwa, “pwa uhwoang kojonned kisai en oaloa mwani dupkoan kojukdi armaj.”
7Mwerin irai ekij sikoa irai koajnehdi pwa arai en dupukla japwen john wia ainpwoahsso, irai wiahkihla pei in armaj in likin.
8Ioar kahrehda mohj oauwo adanki Mohj in Insa.
9Me ne kapwaiahda kokohp in Jeremiah ma pwa, “Arai oaloa silper jilihjek—dopdopla mihn Israel lemleme pwa ioar woahr dupkoa—
10irai dupuk kihda mohjjo en john wia ainpwoahsso, Doahr en Koaunno kaweid.”
11Apkas Jesus uhda mwohn Pilate, koapinahn Rome. “Koawoa ioar Nahmwarkihn mihn Jew?” koapina idoak oang ih. Jesus japoang, “Eh, ma koawoa no pwa.”
12A anjoauwo ma jamwrou laplappok apel joumajjok kajalehda irai iroahk kadipoahki ih, Jesus nennenla johpwa lallal.
13“Koawoa johpwa rong dirin irai iroahk ma irai kadipoahki koawoa?” Pilate idoak.
14A Jesus johpwa pwa mehkij, oang iroahk ma uhwoang ih, ma inenin kapwuriamwei oang koapinahu.
15Nehn anjoau in joarwihn Passover ohroj. Koapina kin kapisla emen sohn kalpwuhjjo oang mihn Jew‑ok, joah lipilpil emen ma irai pilda.
16Nehn anjoauwo mine woal mwoarjuwed men nehn kalpwuhj oadoa Jesus Barabbas.
17Nehn en armajjok pokon pene mwohn umwen Pilate‑o minjoanngo, ih idoak oang irai, “Inje kamwai nimen ngoahi en mweidoahng kamwai—Barabbas ke Jesus ma adanki Messiah?”
18(Ih woahwoahki mwehu pwa koaun in mihn Jew‑ok joalihdi Jesus jang in pihrin.)
19Anjoauwohr, nehn en Pilate ah minmine nehn ah jeiahn koapwung, pahioahu kadardohng ih rong pas, “Mweidla woal pwung menen, pwa ngoahi loklok koalik nehn oai oarmoane ih pwohng.”
20Jamwrou laplappok apel joumajjok kaweidki pokonno en poaki Barabbas en lapwda, a Jesus en kojkojdi.
21Koapinahu pel pwuroahng idoak, “Inje in ara roahmenne kamwai nimen ngoahi en mweidoahng kamwai?” Pokonno rahukihla japoang ih, “Barabbas!”
22Pilate pel pwuroahng idoak, “A da ngoahi en wiahng Jesus ma adanki Messiah?” Arai ohroj pel rahukihda, “Kalohpwuhla ih!”
23“Kahrpoa?” Pilate idoak oang irai. “Dihp da ih wiahda?” A irai kapwa kakloakihla ngilarai,, “Kalohpwuhla ih!”
24Pilate no kidalda pwa ih johpwa kak wia mehkij ma en kak kauhdi pwa pingpinngo no koalkoalikla. Doar ih pwa oau pwohl in pil en wijikdo ih amwunnla poah mwohn pokonno, pwehng irai, “Ngoahi pijekjang insahn woal mene. Kamwai wud pwukoahki.”
25Armajjok ohroj pel rahukihla, “Kamai pirin pwukoahki ah mehdi—kamai apel nihmai jeri kan.”
26Doari, Pilate kadarla Barabbas oang irai. Ih koajnehdi arai en poki Jesus ki joal pahrang imwin pas, irai kioang johnpeihok en kalohpwuhla ih.
27Epwi nihn koapina johnpeihok wahla Jesus oang nehn arai oahpes koalikko a pangindo pwihnin johnpeiho ohroj.
28Arai kihjang ah likkoau a pwainkihdi ih rohp wahssahioau.
29Arai wiahda mwarmwar dokdok ingkoang roairoai pas kamwarmwarihkihdi moange, a irai kioang suhkoa pas nehn poah en wia kilel in manman. Doar irai poardi jang ih nehn irai kapiski ih, rahrahuki, “Kapang! Nahmwarkihn mihn Jew kan!”
30A irai andipoa ih pel koapwoa jang suhkoahu nehn poah pokihki nehn moange.
31Nehn irai no lok in wia mwahlki ih, irai kihjang rohppo a irai wud kioang pein ah likkoauwok. Doar irai ukla ih en lohpwuhla.
32Nehn irai allalu jang nehn kahnihmmwo, ihr koanoahdi woal in Cyrene men adanki Simon, irai ipong oang ih en wahda en Jesus lohpwuhwo.
33Irai inla lel wijahkij adanki Golgotha (woahwoahki wijahn sihn moang).
34Irai kioang Jesus wain doal kihda ad kasik pwa en nim, a mwerin ah jong ekij, ih johpwa nimla.
35Mwerin irai poanihdi ih oang in lohpwuhwo, irai wijwijki ah likkoauwo pwa inje en anki, irai ken nehkpijoang nehn pwungarai.
36Irai ken mwindihoang wijahu jiljiloa Jesus.
37Pohn moange in lohpwuhwo ihr poanihdihoang insing oau ma kawoahwoahda kahrpoan ah kalohpwuhla. Insinngo pwa, “Ioar Jesus me, Nahmwarkihn mihn Jew kan.”
38Johnpirap roahmen pel pwili ih lohpwuhla, emen mine loap kidal, a emen loap jehjoa.
39Armajjok ma kin dauli wijahu kin mwasmwasoahki arai kapiski Jesus, pwahpwahpwa,
40“Ioar koawoa ma pirin koauwehla Umw Joarwiho pel pwuroahng kouda mwerin rehn jiluh! Pein kapisla koawoa, ma koawoa Nihn Koahs! Doaudi jang in lohpwuhwen!”
41Jamwrou laplappok, apel johnpadahkkok in Kojonneddo, apel epwi joumajjok pwili kapiski Jesus,
42“Ih kapisla epwi, a ih johkak kapisla pein ih! Jaudi ih ioar nahmwarki in Israel? A ih en kerdi jang in lohpwuhen, a kamai nen kamehlele ih.
43Ih koapwoarpwoarki Koahs; doari, Koahs en kapisla ih en kajalehda ah pwungki ih! Ih pwahla pwa, Ih Nihn Koahs.”
44Johnpirappok ma pwili ih lohpwuhla; ara pel pwili lahlahwe Jesus.
45In jauwaj, roasoahdi oau wiawi pohn jappwo pwon, oaroain awa jiluh.
46Koaroan oang kiloak jiluh mwerin jauwaj, Jesus ngil koalikda pwa, “Eli, Eli, lema sabachthani?” ma woahwoahki, “Oai Koahs, oai Koahs, amwda koawoa kerpwihlahki ngoahi?”
47Epwi armajjok ma uhuhu wijahu ken rongda, irai pwa, “Ih pangpangin Elijah!”
48Emen irai pispis kijoula pwoakda spwoanj oau kapwuhrihdi wain kasik, kioang in mijen suhkoa pas kihdahlahng ih pwa ih en nim.
49A epwi irai pwehng ih, “jowi. Kisai kapang ma Elijah nen indoa kapisla ih.”
50A Jesus pel pwuroahng ngil koalikda, doar ih ken mweidla ngenin.
51Anjoauwohr kahdenngo ma poaroa mwoal joarwiho nehn Umw Joarwiho soahroakpijoang in riau, jang puwoa lel pah. Jampah roarda, sakai kan pwalpijoang,
52joaujoau kan rispijoang. Palwoaroan nihn Koahs armaj dihrdir ma no mehdi iejda.
53Arai injang nehn ahr joaujoau kan; a mwerin en Jesus ah iejda, irai pwokda nehn Kahnihmw Joarwiho pwokkoang armaj dir.
54Koaunin johnpei apel johnpeihok ma pwili jiljiloa Jesus inenin majpwehkda nehn irai kapang roarroarin jappwo apel joang ohroj ma wiawi. Irai pwa, “Mehlel minmene uhdahn Nihn Koahs.”
55Li dir ma pel pwilihdo mine wijahu, pwili kapkapang mehkan ma wihwiawi, a irai mine ekij doh jang wijahu; ioar irai koa ma pwili Jesus jang Galilee apel kin papah ih.
56Mary mihn Magdala, Mary inen James apel Joseph apel inen nihn Zebedee jermweinnok ma pwili mine ipen lihok.
57Injoausikdi, woal koapwoahpwoa men jang Arimathea ma adanki Joseph, ih pel sohnpadahk in Jesus men.
58Ih inla ipen Pilate poakihda palwoaroan Jesus. Pilate koajnehdi pwa en mweimwei oang ih.
59Joseph oaloa palwahrro kidimkihpene likkoau roairoai oau.
60Ih wahlahng nehn pein ah joaujoau kapw, ma kapwehsne wiawihda nehn sakai. Ih kasahpwroahng sakai koalik oau nehn wanihmw in joaujoauwo ih injang.
61Mary mihn Magdala apel emen Mary mwindi koaroannoang kapkapang joaujoauwo.
62Rehnwa mwerin, ioar rehn keiou in kasman in Passover—jamwrou laplappok apel Pharisee‑ok pokopene ipen Pilate.
63Irai pwehng ih, “Maing, kamai samanda en min likamw meno ah pwa anjoauwo ih pe mour: ‘Ngoahi pirin pwuroahng mourda mwerin rehn jiluh.’
64Koawoa en ruwoj pwa irai en jiloa ah joaujoauwo oaroh lel kajiluh in rehn, pwador nah sohnpadahk indoa pirapoahjang palwahrro, ken pwehng armaj pwa ‘Ih iejdahjang mehdi.’ Pwa likamw pase pirin nauna jang minin mijkoalkoallo.”
65Pilate pwehng irai “jiloapoahwa men, Alwe jiloahdi mwehu joaujoauwo uwen amwai kak.”
66Irai inla pinahla joaujoauwo ki sakai oau apel kioang jiloapoahpwi pwa en jiljiloa.
