1Basa boe ma Yesus kokolak no sala bali, nenik nakandandaak, nae,
2“Manetualain totoꞌu palendan ndia, sama leo manek esa tao ndia ana manen feta kabin.
3Ledoeik lahehele lala feta so, boe ma nadenu ndia ata nala leu lafada hataholi nana hoka kala, lae, ‘Mai, huu feta sangga mulai ia so.’ Tehuu hataholi la sila taa nau mai.
4Basa de, ata la sila fali fo lafada manek. Namanene leondiak, boe ma manek ndia nadenu ata feꞌe nala, nae, ‘Ei miu mafada hataholi la sila, fo ala mai leo, huu feta nahehele so. Au hala sapi, ma tunu-nasu ala nanaꞌa malada la so. Madenu sala mai laꞌa feta, huu basan nana sadiak so.’
5Ata la sila leu lafada leondiak. Tehuu hataholi nana hoka kala sila taa nau mbali sala. Hambu mana neni osi neu, hambu mana neni mamana tao ues neu,
6hambu luma humu lala manek ata nala, de tao doidoso sala losa mate sala.
7Namanene leondiak, boe ma manek luli nalan seli. Basa de nadenu soldadu nala leu tao lisa hataholi la mana tao lisa ndia ata nala. Boe ma soldadu la hotu heni kota ndia bebelak no dae.
8Basa boe ma, manek noke nala ata feꞌe nala, de nafada sala, nae, ‘Feta kabin nahehele so, tehuu hataholi fo au hoka kala sila, taa landaa tungga au fetang.
9Hatematak ia, ei kalua mini dala hataholi noꞌu kala miu, fo hoka sudi see fo ei matanggo mia sala lai ndia.’
10Boe ma ata la sila leni dala hataholi noꞌu kala leu. Ala latonggo hataholi noꞌu kala lai ndia, de loo sala leni feta kabin ndia leu. Hataholi noꞌu kala tao lahenu feta ndia, de, hambu hataholi neulauk ma hataholi manggalauk.
11Basa de, manek neni feta ndia dalek neu de, ana mete ndule ndia hataholi mana mai nala sila. Boe ma nita hataholi esa taa pake baloꞌa feta.
12Boe ma manek ndia natanen nae, ‘Heh tolanoo! Hatina de o maso ia mai, taa pake baloꞌa feta?’ Tehuu hataholi ndia kada namanggonggoak.
13Boe ma manek ndia palenda ana mana ono-lau nala nae, ‘Hengge hataholi ia ei-lima nala, fo mbian deak neu. Ela ana namatani ma doidoso nai mamana makiuk ele.’
14Leondiak boe oo, Manetualain hoka hataholi noꞌuk, tehuu Ana hele nala kada lumak fo dadik neu Ndia hataholin.”
15Lamanene basa Yesus kokolan ndia, boe ma hataholi Farisi la lala-halak fo sangga teꞌen ma soli salak neu Ndia.
16Boe ma ladenu sila ana mana tungga nala lo Herodes hataholi partei politik, fo ala latane-lataak lo Yesus. Ala sosoꞌuk Ndia, lae, “Ama Mesen! Ai bubuluk Ama dalen ndoos. Ama taa masapepeko malelak, ma taa hehele matak. Ama manoli taa-taa Manetualain Dedeꞌa-kokolan no ndoos.
17Hatematak ia, ai sangga matane dedeꞌak esa. Tungga ita anggama Yahudi heti-heun, na, meda ita musi bae bea fee mana palenda Roma mane ina-huun, do taa?”
18Tehuu Yesus bubuluk so, ala sangga doluk Ndia, fo kokolak laban mana palenda Roma. De, Ana nataa nae, “Memak ei hataholi mana dea-dalek! Hatina de ei sangga teꞌek Au minik dedeꞌak ndia?
19Hena matudu Au doi lilo fulak esa fo hataholi paken bae neu bea!” Boe ma latudun doi lilo fulak esa neu Ndia.
20Basa de natane sala, nae, “See mata-aon ia? Ma see naden ia?”
21Lataa lae, “Ndia kesel, mana palenda Roma mane ina-huun ndindia.” Boe ma Yesus nafada sala nae, “Mete ma leondiak, na ei fee mana palenda hata fo ndia hak. Ma fee Manetualain hata fo ana dadik Manetualain hak.”
22Lamanene leondiak, boe ma basa sala heran lalan seli, huu Ndia kokolan tetebes. Huu ndia, de ala taa bisa teꞌek lala Ndia. Boe ma ala laꞌo ela Ndia.
23Nai ndia boe oo, hambu hataholi partei Saduki. Hataholi Saduki la lanoli, lae, hataholi mana matek taa nasoda fali. Faik ndia, sila boe oo, sangga dalak fo teꞌek Yesus. Huu ndia de ala mai latanek lo Ndia, lae,
24“Ama Mesen! Baꞌi Musa sulak ela ita so, hadak ia nae: mete ma touk esa mate laꞌo ela saon, tehuu anan taa, na, touk ndia fadin musi sao nala ina falu ndia, suek tao numbu-saduk fee kaꞌan mana matek ndia.
25Memak makahulun baꞌi Musa nanoli leondiak, tehuu ai sangga matane leoiak: hambu touk hitu tolanoo kala. Uluk sao, tehuu maten, ma anan taa. Boe ma fadin mana tungga ndia, sao nala ina falu ndia.
26Taa dook bali, boe ma maten boe, ma anan taa. Leondiak boe fadi katelun: ana sao nala ina falu ndia, tehuu maten, ma anan taa. Leondiak nakandondoo henin losa fadi mateꞌa teisusuk maten.
27Boe ma ina falu ndia maten.
28Hatematak ia ai sangga matane leoiak: inak ndia sao nitak touk hitu so. Dei fo neu daebafok babasan, boe ma Lamatuak tao nasoda falik hataholi mana mate kala, na, inak ndia dadik neu see saon?”
29Boe ma Yesus nataa nae, “Mete ma ei matane leondiak, na, ei sala malan seli ia maa! Huu ei taa bubuluk Manetualain Susulan isin. Ma ei boe oo, taa bubuluk Ndia koasan fo ana seli ndia!
30Teteben na leoiak. Dei fo mete ma Manetualain tao nasoda falik hataholi mana mate kala, na, taa lasaok so bali, sama leo Ndia ata nala malai nusa-sodak.
31Ma Au boe sangga kokolak laꞌeneu hataholi bisa nasoda fali, do taa. Nai baꞌi Musa susulan tui nae, ai huu anak esa haꞌi naꞌan tehuu taa kade sana. Neme tutuik ia mai, ita bisa bubuluk, tae, hataholi mana matek bisa nasoda fali. Huu nai ndia Manetualain nafada baꞌi Musa nae,
32‘Au ia, o baꞌi mala Manetualain. Fo ndia baꞌi Abraham, baꞌi Isak, ma baꞌi Yakob. Sila basa sala lakaluku-lakatele lakandondoo henin neu Ndia losa hatematak ia.’ Ita bubuluk, tae, ledoeik Lamatuak kokolak leondiak, na, baꞌi la sila mate sala dook ia so. Tehuu Manetualain nae, Ndia bei dadik neu sila Lamatuan. Huu ndia, de ita bubuluk, tae, sila samanen bei lasoda lakandoo, mae sila mate dook ia so. De mae hataholi mana matek, tehuu ana nasoda fali. Huu kada hataholi kasodak nakaluku-nakatele neu Manetualain, tehuu taa hataholi mana matek hetu?!”
33Lamanene Yesus nanoli leondiak, boe ma hataholi Saduki la taa bisa bala fa boe bali. Tehuu hataholi noꞌu kala sila heran lalan seli de lakokola lae, “Awii! Hataholi ia, nanonolin ana seli maa!”
34Ledoeik hataholi Farisi la lamanene, lae, Yesus senggi hataholi Saduki la sila, boe ma lakabubua noꞌu fo sangga latanek lo Ndia.
35Sila malela anggaman esa sangga teꞌek sudik Ndia nae,
36“Ama Mesen! Au sangga atane leoiak: ita hada heti-heun, ma anggama palendan nala, noꞌun seli. Neme basa baꞌi Musa palendan ndia mai, na, bee ndia ina-huun ana seli?”
37Boe ma Ana nataa nae, “Palenda manai lain seli nai Manetualain Susula Malalaon ndia, leoiak: ‘Manetualain ndia na ei Manetualaim. De, ei musi sue Ndia lena heni basan. Huu ndia, de ei musi dokodoe Ndia taa-taa, malelak Ndia, ma tao ues mbilu mbuse fo tungga Ndia hihii-nanaun.’
38Palenda ndia, penting nalan seli ma ana seli!
39Ma hambu palenda kaduan, fo nae leoia: ‘O musi sue hataholi feꞌe kala, sama leo o sue o ao-ina hehelim.’
40Palenda kadua kala ia, ndia huun neme basa baꞌi Musa heti-heun, ma basa Manetualain mana kokolan nala nanonolin basan. Hataholi taa bisa tungga palenda feꞌe kala, mete ma ndia taa tungga nakahuluk palenda kadua ina-huu kala ia.”
41Ledoeik hataholi Farisi la sila bei lakabubua lai ndia, boe ma Yesus natane nasafali sala, nae,
42“Neme makahulun ele mai Manetualain helu memak so, fo haitua Karistus mai, fo tao nasoda Ndia hataholi nala. Naa, tungga ei duduꞌa mala, na, Karistus ndia, na see numbu-sadun ndia?” Boe ma lataa, lae, “Ndia ndia, mane Dauk numbu-sadun.”
43Yesus kokolak nakadaik bali, nae, “Mete ma leondiak, na hatina de Manetualain Dula Dale Malalaon nafada mane Dauk, fo noke Karistus ndia, na, ‘Lamatuak’? Huu Dauk sulak nae,
44‘Manetualain nafada au Lamatuang, nae, “Mai fo manggatuuk muu Au boboa konang, nai mamana nana hadak nalan seli ia. Huu dei fo Au tao o musu mala, leu doꞌok o.’ ”
45Neme susulak ndia mai, ita bisa bubuluk tae, mane Dauk mesa kana noke Karistus ndia, na, ‘Lamatuak.’ De, mete ma hataholi lae, Karistus ndia, kada mane Dauk numbu-sadun, na, ndia bei taa dai! Huu Ndia boe oo, mane Dauk Lamatuan!”
46Lamanene Yesus kokolan leondiak, boe ma hataholi Farisi la sila kada lamanggonggoa kala, huu taa hambu hataholi esa boe bisa nataa Yesus. Huu ndia de, mulai neme faik ndia mai boe, ala bii latanen, ma ala taa lambalani teꞌek sudik Ndia so bali.
