1Mwerin en Jesus noaisikdi nehn Bethlehem wein Judea, nehn mwein Nahmwarki Herod; woal loalkoanngok jang palimese indoa Jerusalem
2kalkalelpoak wija ma jeri siksikko noaisikdi mine, nahmwarkihn mihn Jew kan. Irai pwa, “Kamai kapangda ah ujuhwo palimese in loannge ioar kamai indoahng pwongi ih.”
3Nehn en Nahmwarki Herod rongda me, ih jalohkihda pwilihkihoar sohn Jerusalem ohroj.
4Ih panginpene Jamwrou laplappok apel johnpadahk in kojonneddok, ih kalelpoak iparai “Ia wija Messiah pirin noaisikdi?”
5Irai japoang pwa, “Nehn Bethlehem nehn wein Judea, pwa ioar mehwa johkohppo insingihdi:
6“‘Koawoa, Bethlehem, nehn wein Judah, jaudi koawoa, keiou siksik nehn pwungen koaun in Judah kan, pwa jang ipoamw emen koaun pirin indoa ma pirin kahlwa noai armaj in Israel kan.’”
7Doar Herod kapokonihpene in rir woal loalkoanngok pwa ih en woahwoahkihda ngehd uhdahn anjoauwo ujuhwo pwokda,
8ih kadarla irai Bethlehem pwehng irai, “Alwe rapahki mwehu jeriho. Ma kamwai kapangda ih, kamwai pakairkihdohng ngoahi, pwa ngoahi en pel pwili alwe pwongi ih.”
9Mwerin irai rong mehpwiai irai ken dauluhlla; A ujuhwa ma irai kapang palimese in loannge pel pwuroahng pwokda kahlwa irai oaroh lel wijahu ma jeriho mine.
10Anjoauwo irai kapangda ujuhwo, irai inenin malauda.
11Nehn irai dilda nehn ummwo kapangda jeriho pel ah nohnohu, Mary, irai poadpomwla pwongi ih. Doar irai kihda irai kijakij kajampwallok kijakijkihoang ih kohl, frankincense pel myrrh.
12Anjoauwo irai japahllahng nehn arai wei, irai wud nehn apas al sohrohr pwa Koahs no kaperki irai nehn oau oarmoan pwa irai en joah pwurla ipen Herod.
13Nehn irai no inla, sohnloang in Koaunno men pwokkoang Joseph nehn ah oarmoan. Sohnloanngo pwehng ih, “Pwohrda oaloa jerihen pwilihki inahu kaukihdihla ara Egypt. Mine oaroh ngoahi kapwa pwehng koawoa, ngehd kamwai en japahldo, pwa Herod raprapahki jerihen pwa ih en kojukdi.”
14Inpwonngohr Joseph pwohrda oaloa jeriho pwilihki inahu irai inla Egypt,
15mine o oaroh lel en Herod mehdi. Me no kapwaiahda dahkij ma Koaunno no pwa jang ipen johkohppo, “Ngoahi pangin noai jermweinno jang Egypt.”
16Nehn en Herod kidalda pwa woal loalkoanngok no kapweipweidi ih, ih inenin lioas. Ih ruwojla pwa jeri woal ohroj ma mahki johnpar riau apel pehnangin ma minmine nehn Bethlehem apel kahnihmw ohroj ma koaroannoang en kojkojdi; me jang in ah rong jang pwihnin woal loalkoanngok sapin irai kapangda ujuhwo.
17Me no pwoaida dahkij johkohp Jeremiah kohpda:
18“Ngilloau indoa joang nehn Ramah, ngilen joang koalik, Rachel ma joangjoangjoanngki nah jerihok, johpwa nimen injenmwahula, pwa jerihok no mehdi.”
19Mwerin Herod mehdi, sohnloang en Koaunno men pwuroahng pwokkoang Joseph nehn ah oarmoan nehn Egypt,
20“Pwohrda,” Sohnloanngo pwehng ih, “oaloa jerihen apel inahn kamwai japahlla Israel, pwa irai ma jongjong in kojukdi jerihen no mehdi.”
21Joseph pwohrda, oaloa jeriho apel inahu japahlla Israel.
22A nehn ah kidalda pwa Archelaus nihn Herod, koaun kapwin Judea ioar ih mijikin inla o. Mwerin ah ne pel oaloa kaweid nehn ah oarmoanno, ih inla nehn wein Galilee.
23Peneineiho inla koaujoanla nehn kahnihmw oau adanki Nazareth. Me ne pel pwoaida dahkij ma johkohppok no kohpda: “Ih pirin wiahla mihn Nazareth.”
