1Pharisee pwi apel johnpadahk in Kojonnedpwi indoa jang Jerusalem indoa ipen Jesus, idoak oang ih,
2“Amwda nihmw sohnpadahkkok kin joah kapwaiahda asai siahk koadoaudoaudo jang jamasai mihn mehjjok? Irai joh kin amwunnla poahrai mwohn arai mwinge!”
3Jesus japoang, “A amwda kamwai ke japeik oang kojonned in Koahs nehn amwai kin pein daur amwai padahk kan?
4Pwa Koahs pwa, ‘Woaunki joamoamw apel inoamw, a ma armaj men lahlahwe jamah ke inah, en kojkojdi.’
5A kamwai kin padahkki, ma armaj men ma anki mehkij ma ih kak jeuweje ki jamah ke inah, a ih pwa, ‘Me en Koahs,’
6Irai johpwa anahne woaunki jamarai, ioar doar amwai kin mwamwahlki lal in Koahs, pwa kamwai en daur pein amwai padahk kan.
7Mwalaunpwi kamwai! Mehlel oar pwa uhdahn pwung oang kamwai dahkij johkohp Isaiah ne kohpda oang kamwai nehn ah pwa,
8“‘Koahs pwa, armaj pwiai kin woaunki ngoahi jang in arai lal a mohngiongirai inenin dohjang ngoahi.
9Johpwa kaspoan ahr kin joarwi oang ngoahi, pwa irai kin padahkki kojonned in armaj, a irai karaunki pwa en Koahs Kojonned.’”
10Doar Jesus ken pangindo pokonno ipoa, pwehng irai, “Kamwai rong apel woahwoahki mwehu me:
11Johpwa mehkij ma kin aluhwoang nehn oawoan armaj ma kin kajaminihla armaj, pwa me ma kin injang nehn oawoa.”
12Doar sohnpadahkkok indoa ipoa pwa, “Koawoa kidal pwa Pharisee‑ok lioaski dahkij ma koawoa pwahla?”
13Jesus japoang, “Suhkoa ohroj me Joamoaiho nehnloannge johpwa poadokdi nen wijwijdahjang,
14joah injinohki irai! Johnkaweid majkunpwi arai. Doar ma armaj majkun men kahlwa emen armaj majkun ara nen kipdihoang nehn lippwo.”
15Peter pwehnglahng ih, “Kawoahwoahda woahwoahn karajraj pasen.”
16Jesus japoang irai, “Kamwai kahjik oar loalkoangla, doahr irai ok ma joaloalkoang?
17Kamwai johpwa woahwoahki? Mehkij ma koawoa kangla indihla nehn kapehdimwen kin pel injang nehn palwoaroamwen.
18A me ma injang nehn oawoa, kin sapda jang nehn mohngiong, ioar kin kajaminihla armaj.
19Lamlam nauna kin injang nehn mohngiong, ioar kin kahrehda, kojarmaj, kamwahl, nenek, pirap, likamw, pel karaun mwahl.
20Mehpwiai ioar kin kajaminihla armaj. A jaudi mwinge johpwa amwumwla!”
21Jesus injang wijahu inla wija kij ipen kahnihmw in Tyre apel Sidon.
22Lihn Canaan men, ma kin koaukoaujoan wijahu, indoa ipoa, ngil koalik poangpoanglahng ih, “Maing, koawoa ma nihn David, kadek oang ngoahi! Noai jerpein men mine ma ngen jaus ne dilingla; ih kin minmine nehn apwal koalik.”
23A Jesus johpwa pwahla lal oau oang ih. Nah sohnpadahkkok sohla ipoa, engdehn poaki ih, “Kadarla lihen! Ih kadiroapwoa kisai ki ah poakpoak en.”
24A Jesus japoang liho, “Ngoahi, koadoaddoardohng ipen jihpw joaloangla in mihn Israel oar doari.”
25A liho sohla ipoa dairukdihoang in pwoalkoa, “Maing, jeuweje ngoahi!”
26Jesus japoang, “Johpwa pwung en kihjang kenen jerihkan mwinge peidlahng doahk kan.”
27“Mehlel, Maing,” liho japoang, “a doahk kan kin pel kang mwoarmwoarin mwinge kan ma mwoardi pehn en laplappok sehpil.”
28Doar Jesus ken japoang ih, “Koawoa lihmen ma anki pwojon inenin koalik! Dahkij ma koawoa poaki nen pwoaihoang koawoa.” Nehn anjoauwohr nah jerpeinno mwehuda.
29Jesus injang wijahu, alu paianla poahrinjed in Galilee. Ih doauda pohn dol oau mwindi.
30Pokon koalik oau indoa ipoa, wahdohng ih armaj mwoasor, armaj majkun, armaj dangpel, armaj loahsoang, apel dir ma anki joangjoangoan kahpwal in palwahr, irai wahdo kihdi ipen ehn Jesus. Ih kemwehuwihla ohroj.
31Pokonno pwuriamweikihla ahr kapangda doahr armaj loahsoanngok kakla lallal, armaj dangpellok mwehula, armaj mwoasorrok ne kakla alu, apel araihok ma majkun no kapangda wija. Irai kapngahki Koahs in Israel.
32Jesus panginpene nah sohnpadahkkok ipoa ih pwehng irai, “Ngoahi ipwilkihda armaj pwiai pwa irai minminehki ipoai rehn jiluh, doar no pel rojla kanrai mwinge. Ngoahi johpwa nimen kadarpijoang irai nen irai johpwa mwinge, pwadoar irai mwehlehlla nehn allok.”
33Sohnpadahkkok idoakkoang ih, “A ia wija kamai kak kihjang mwinge nehn japwsoahnoauwe ma en isar oang pokonnoauwe?”
34Jesus idoak oang irai, “Lopwon in pilahwa doapoa mine ipamwai?” Irai japoang, “Lopwon ujuh, apel mwumw siksik jipidpwi.”
35Jesus pwehng pokonno en mwindi pohn pwirej.
36Doar ih oaloa lopwon ujuhwo pwilihki mwummwok, kapingkalahnganki oang Koahs, sipwangpijoang, kioang nah sohnpadahkkok, sohnpadahkkok wud nehk oang pokonno.
37Irai ohroj mwinge oaroh moad. Sohnpadahkkok rikda luhwen mwingehk wiahda kiam ujuh.
38Dirin irai ma pwili mwinge rehnno, woal pahkid, li apel jeri jehpwili waddoang.
39Doar Jesus kadar pijoang armajjok, ih doauda pohn pohs pas, jeilahng ipen koaujoan in Magadan.
