1Iwe, Jesus a pwal kapas ngeni ekewe aramas lon pworausen awewe o üreniir,
2“Mwün Läng a wewe ngeni eman king mi amolätä eu kametipen apwüpwülü fän iten nöün mwän.
3A tinala nöün kewe chon angang ar repwe asile ngeni ekewe chon kökköto, pwe repwe feito fiti ewe kametip. Nge ir resap mochen feito.
4Mürin a tinala pwal ekoch chon angang o üreniir, ‘Oupwe asile ngeni ekewe chon kökköto, pwe ngang üa amolätä ai we kametip. Nei kewe ätemwänin kow me ekewe nienifön kow mi aümanau ra fen wes me kuk o mettoch meinisin a molotä. Oupwe feito fiti ewe kametipen apwüpwülü.’
5Nge ekewe chon kökköto resap afäli, ra feila ngeni en me an angang: Eman a feila ngeni an tanipi, nge eman a feila ngeni an lenien amömö,
6nge pwal ekoch ra turufi ekewe chon angang, ra wichiir o niirela.
7Iwe, ewe king a fokun song. Iei mine a tinala nöün kewe sounfiu pwe repwe niela ekewe chon nimanau o kenala ar kewe telinimw.
8Mürin a körato nöün kewe chon angang o üreniir, ‘Ai kametipen apwüpwülü a fen molotä, nge chokewe mi kökköto resap fich ngeni.
9Iei oupwe feila ren ekewe alelap o körato iö kana oua küna ngeni ewe kametip.’
10Iei mine ekewe chon angang ra feiliwu lon ekewe alelap o achufengeni ekewe aramas meinisin ra küneer, ekewe aramasöch me ekewe aramasangau. Iwe, ewe imwen kametip a urela ren ekewe aramas.
11Nge lupwen ewe king a tolong lon ewe imw pwe epwe nengeni ekewe aramas ra feito, a küna eman mwän esap üföüf üföüfen ewe apwüpwülü.
12Iwe, ewe king a aisini, ‘Pwii, ifa usun om tolong ikei, nge kosap üföüf üföüfen ewe apwüpwülü?’ Iwe, ewe mwän esap pölüeni och.
13Mürin ewe king a üreni ekewe chon angang, ‘Oupwe föti pöün me pechen ei mwän o aturawu lon rochopwaken lükün. Ikenan epwe pupuchör o akarüngi.’”
14Iwe, Jesus a sopwela lon an kapas, “Ekewe chon kö ra chomong, nge ekewe chon fil ra chokükün.”
15Mürin ekewe Farisi ra feila o pwüngüpwüngfengen usun ar repwe särei Jesus ren ar kapas ais.
16Ra tinala ren Jesus ekoch nöür kewe chon kaiö me ekoch chiechien Herotes pwe repwe üreni, “Sense, äm aia silei pwe en ka kapas wenechar. Ka afalafala mine a let usun letipen Kot fän iten aramas, nge kosap ekieki mine aramas ra eäni ekiek, pun kosap nenengeni wisen eman.
17Kopwe ürenikem met om ekiek. A pwüng ach sipwe mönätiu ach takises ngeni Sisar ika ese pwüng?”
18Nge Jesus a silei usun ar ekiek mi ngau, iei mine a üreniir, “Ämi chon likatuputup! Pwota oua sotuniei?
19Oupwe pwäri ngeniei ewe föün moni fän iten takises!” Iwe, ra uwato ren ewe föün moni.
20Nge Jesus a aisiniir, “Liosun iö me iten iö ei won ei moni?”
21Ra pölüeni, “Liosun Sisar me itan.” Iei mine Jesus a üreniir, “Mi pwüng! Oupwe ngeni Sisar mine än Sisar, nge oupwe ngeni Kot mine än Kot.”
22Lupwen ar rong ekei kapas, ra weitifengeniir. Mürin ra likitala i o feila.
23Lon ewe chök rän ekoch Satusi ra feito ren Jesus, ir ätekewe mi lükü pwe aramas resap manausefäl seni mäla.
24Iwe, ra apasa, “Sense, Moses a üra pwe are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fän iten mwirimwirin pwiin we mi mäla.
25A wor füman pwipwi mi nom lefilach. Ewe mwänichi a pwülüeni eman fefin, nge lupwen a mäla esap wor nöün. Iei usun a likiti pwülüan ngeni pwiin we.
26Iei usun chök a pwal fis ngeni ewe aruomanün me ewe aülümanün tori ewe afümanün.
27Nge lesopolan ewe fefin a pwal mäla.
28Iwe, lon ewe ränin, lupwen ekewe sotup repwe manausefälitä, iö me leir epwe pwülüeni ewe fefin, pun ir me füman ra pwüpwülü ngeni?”
29Nge Jesus a pölüeniir, “Ämi oua fokun mwäl, pun ousap silei makkeen ekewe Toropwe mi Pin me än Kot manaman.
30Pun lupwen ekewe sotup repwe manausefäl, repwe wewe ngeni ekewe chon läng resap pwüpwülü.
31Nge usun manausefälin sotup: Ousap mwo aleani mine Kot a fen ürenikemi? A apasa,
32‘Ngang än Apraham, Isaak me Jakop we Kot!’ Ei Kot än ekewe mi manau Kot, nge sap än ekewe mi mäla.”
33Iwe, lupwen ekewe aramas lon ewe mwich ra rong ekei kapas, ra weitifengeniir ren an afalafal.
34Lupwen ekewe Farisi ra rongorong pwe ekewe Satusi ra pinela ren mine Jesus a eäni pölüen ngeniir, ra chufengen.
35Iwe, eman me leir, i eman Sensen Allük, a sotun le särei Jesus ren an kapas ais ngeni.
36A aisini, “Sense, meni allük a kon aüchea seni meinisin?”
37Jesus a pölüeni, “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum.
38Iei ewe allük mi lap me aüchea seni meinisin.
39Nge ewe aruuen allük mi fokun aüchea a usun chök ewe aeuin: ‘Kopwe echeni chon arum usun chök püsin om echenuk.’
40Unusen än Moses kewe allük me än ekewe soufos kapas ra longolong won ekei ruu allük.”
41Iwe, lupwen ekoch Farisi ra chufengen, Jesus a aisiniir,
42“Met oua ekieki usun ewe Kraist? I mwirimwirin iö?” Ra pölüeni, “I mwirimwirin Tafit.”
43Mürin Jesus a aisiniir, “Pwota chök ewe Ngünün Kot a amefi ngeni Tafit an epwe aita ngeni i ‘Samol’? Tafit a apasa,
44‘Ewe Samol a kapas ngeni ai Samol: Kopwe mot lepelifichi tori üpwe anomu chon oputom fän pecheöm.’
45Are a ina usun pwe Tafit a püsin aita ngeni i ‘Samol’, ifa usun än Kraist epwe tongeni eman mwirimwirin Tafit?”
46Esap wor eman a tongeni pölüeni än Jesus kapas. Seni ena rän esap chüen wor eman a tongeni aisini och kapas ais.
