1Nehn ah indi jang pohn dollo pokon koalik oau pwilihdo ih.
2Woalmen johmwehu lepa indoa ipen Jesus, poadpwomwla pwehng ih, “Maing, ma koawoa nimen, koawoa kak kamwkelehda ngoahi.”
3Jesus kailla poah pukkoang woallo, “Ngoahi nimen,” ih pwehng ih, “Ken mwakelkelda!” Anjoauwohr woallo mwehula jang ah lepa.
4Jesus pwehng woallo, “Kapang! Pwa koawoa en johpwa pwehng emen. Inla kajalehng jamwrou a koawoa wia oamw meiroang joanngo ma Moses koajnehdi, en wia oamw mihn kadehde oang irai.”
5Nehn en Jesus lel Capernaum, koaun in johnpei men indoa ipoa, poaki jauwaj.
6“Maing,” ih pwehng ih, “noai ludu men mine in ummwo, mwoasorla apel inenin weiroak.”
7Jesus pwehng woallo, “Ngoahi pirin inla kemwehuwihla ih.”
8Koaun in johnpeiho pwehng Jesus, “Maing, ngoahi joah warroang koawoa en indoa nehn umwoaiho. Pwen lalloar, ah noai luduhwo no mwehula.
9Pwa ngoahi pel anki manman pohn johnpei kan pehn ngoahi. Ngoahi kin pwehng emen, ‘inla,’ ih inla; a oang emen, ‘indoa,’ ih indoa. Ngoahi pwehng noai luduhwo, ‘Wia me,’ ih wia.”
10Nehn en Jesus rong me, ih pel pwuriamweikihla pwehng irai ma pwilpwili ih, “Ngoahi pwehng kamwai in mehlel, Ngoahi kahjik diar emen nehn Israel ma anki joangoan pwojon koalik doahr me.
11Ngoahi pwehng kamwai pwa armaj dir pirin injang palimese apel palikapi, mwindi nehn dohrai pwili Abraham, Isaac pel Jacob nehn Wein nehnloannge.
12A sohn Weiho pirin kerpwihekla likin, oang nehn rosso, wija ma irai pirin joang apel keikeikeisakai.”
13Doari Jesus pwehng koaun in johnpeiho, “alwe in umwoammwo, da ma koawoa kamehlele en wiawi.” Nah luduhwo mwehula Anjoauwohr.
14Anjoauwo Jesus lel nehn umwen Peter‑o, ih kidalda pwa inen pahien Peter‑o johmwehu karkar.
15Jesus koldi poahn liho, karkarro injang ipen liho; ih ken pwohrda sapda papah ih.
16Injoausikdi, armaj dir ma ngen jaus sihda pohrai wijikdohng ih, ih kihjang ngen jaus iparai, kemwehuwihla arai johmwehuwok.
17Me en kapwaiahda da me johkohp Isaiah pwa: “Ih oaloahda asai jasihkei kan pel wahda asai johmwehu kan.”
18Anjoauwo ma Jesus kapangda uwen koalikin pokonnoauwo pwilpwili ih, ih pwehng nah sohnpadahkkok pwa irai en jeila oaloap jed in Galilee.
19Johnpadahk in kojonneddo men indoa ipoa pwehng ih, “Johnpadahk, ngoahi en pwili koawoa wija ohroj koawoa inla.”
20Jesus japoang, “Fox mine arai lipw, mahnsang kan mine arai paj, a Nihn Armaj joh wija ih en koammoaldi.”
21Emen sohnpadahk pel pwehng ih, “Maing, mweidoahng ngoahi en inla jaripdi oai pahpahu mijkoalkoal, a ngoahi indoa pwilihla koawoa.”
22A Jesus pwehng ih, “Pwili ngoahi, a mweidoahng mehdi kan en jaripdi pein arai mehdi.”
23Jesus doaudahng nehn pohsso, nah sohnpadahkkok pwili ih.
24Anjoauwohr melmel oau pwokda pohn jeddo, nohk jaujaudo nehn pohsso. A Jesus moair.
25Sohnpadahkkok inla panginda ih pwehng ih, “Maing, doaroahla kisai! Kisain ken mehdi!”
26Ih japoang, “siksik amwai pwojon, Amwda kamwai ke majpwehk.” Ih uhda ruwoje enngok apel nohk en uhdi, anjoauwohr melmello ken molundi.
27Sohnpadahkkok pwuriamweila, idoak nehn pwungarai, “Armaj dahmen me? Ma eng apel no kin peikkoang!”
28Anjoauwo ma Jesus lel oaloap jeddo, nehn koujapw in Gadara, woal roahmen suhwoang ih ma indoa jang nehn joaujoauwok. Woal roahmen ne ma ngen jaus mine nehn ara inenin keper doar joh armaj kin wud nehn alloauwo.
29Anjoauwohr ara wering Jesus pwehng ih, “Koawoa Nihn Koahs, da koawoa nimen wiahng kama? Koawoa indoahng koalkoa kama mwohn anjoauwo?”
30Mine pwihnin pij koalik oau mwingmwinge joah dohla.
31Ngen jaussok poaki Jesus, “Ma koawoa pirin kajroahla kama, kadarla kama nehn pijjok.”
32“Inla!” Jesus pwehng ara. Doar ara ken inla dilloang nehn pijjok, nehn anjoauwohr pijjok kijoudihla duhla nehn lehu.
33Sohn apwali pijjok kaula inla nehn koaujoanno pwehng me ohroj, pwilihki da ma wiawihoang armajjok ma ngen jaussok mine pohra.
34Sohn koaujoanno ohroj inlahng suhwoang Jesus. Anjoauwo irai suhwoang ih, irai poaki ih en injang nehn arai wijahu.
