1Iroakdihn dihkan ma lel Jesus Christ nihn David, nihn Abraham:
2Abraham ioar jemen Isaac, Isaac jemen Jacob, Jacob jemen Judah pel riahkan.
3Judah ioar jemen Perez apel Zerah, ma inanki Tamar, Perez ioar jemen Hezron, Hezron jemen Ram,
4Ram jemen Amminadab; Amminadab jemen Nahshon; Nahshon jemen Salmon;
5Salmon jemen Boaz (ma inanki Rahab); Boaz jemen Obed (ma inanki Ruth); Obed jemen Jesse;
6Jesse ioar jemen Nahmwarki David. David ioar jemen Solomon, ma inanki pahien Uriah.
7Solomon jemen Rehoboam, Rehoboam ma jemen Abijah, Abijah jemen Asa,
8Asa jemen Jehoshaphat, Jehoshaphat jemen Jehoram, Jehoram jemen Uzziah
9Uzziah jemen Jotham, Jotham jemen Ahaz, Ahaz jemen Hezekaiah,
10Hezekaiah jemen Manasseh, Manasseh jemen Amon, Amon jemen Josiah,
11Josiah jemen Jechoniah pel riahkan nehn anjoauwo irai kaliplipla Babylon.
12Mwerin kaliplipla Babylon: Jechoniah ioar jemen Shealtiel, Shealtiel jemen Zerubbabel,
13Zerubbabel jemen Abiud, Abiud jemen Eliakim, Eliakim jemen Azor,
14Azor jemen Zadok, Zadok jemen Achim, Achim jemen Eliud,
15Eliud jemen Eleazar, Eleazar jemen Matthan, Matthan jemen Jacob,
16Jacob jemen Joseph, pahien Mary, ma noaisikihdi Jesus, ma adanki Christ.
17Ohroj ma insingdi me ioar di eijek pahu jang Abraham lel David, di eijek pahu jang David lel kalipliplahng Babylon, di eijek pahu jang kalipliplahng Babylon lel Christ.
18Me ioar mwomwen en Jesus Christ noaisikdi: Ah nohno Mary inoauwen pwoapwoaud oang Joseph, a mwohn ara paspene, diarekda pwa ih lijaian jang Ngen Joarwi.
19A Joseph nehn ah wia woal lelpoak apel pwung men johpwa nimen koauwehla oadoan Mary mwohn armaj kan, lemehda pwa ih en mweijang ih in rir.
20A mwerin ah lemehda me, Sohnloang in Koaunno men pwokkoang ih nehn ah oarmoan pwehng ih, “Joseph nihn David, joah mijik in oaloa Mary wiahkihla pahioamw, pwa dahkij ih lijaiankihda jang Ngen Joarwi.
21Ih pirin noaisikihdi jermwein men, koawoa en kioang oadoa Jesus, pwa ih pirin doaroahla nah armaj jang nehn diparaihok.”
22Mehpwiai ohroj wiawi pwa en pwoaida da ma Koaunno pwa jang ipen johkohppo,
23“Meipwonno pirin lijaianda, noaisikihdi jermwein men, ma irai pirin kioang oadoa Emmanuel,” (woahwoahki “Koahs pwilpwili kisai”).
24Nehn en Joseph pwohrda ih wia da sohnloang in Koaunno pwehng ih. Ih ken oaloa Mary painkihla.
25Joseph johpwa suhoang Mary in palwahr oaroh liho noaisikihdi nah jermweinno. Ih kioang oadoa Jesus.
