1E Iesu i warwara ulak tetek la ana warwara larlar mang,
2“A matanitu misaot na langit i arlar ana king ning i sang tar a ngasa na taulai sur e natna barsan.
3Pa i sune sen anuna na tena titol oros tetek la, ning di ka atai nigon tar la, sur lar ben pas la sur a ngasa. Ika la ngongoio rop ka.
4I sune seni maleng anuna dingla na tena titol oros masik ana warwara mang, ‘Mulor atai la ning di ka atai nigon tar la mang, “Ia ka sang rop tar a utna na hangan. Ia ka umkol tar na bulumakau pa na barman a butbut a bulumakau, a ututnala ka sang rop. Mulor han ute na ngasa na taulai.” ’
5“Ika bel la longor, la han masik ka. Takai i han uting na nuna barim, takai otleng sur anuna rumai a siusiurai.
6Pa dingla na tarai otleng ning di han sur la, la tong akes pasi ka na tena titol oros, pa la alaulau la pa la umkol la.
7A king ning, a balana i kut kol, i sune sen anuna tarai a harum, pa la umkol sen na tena umumkol a taraila ning, pa la tun sen anunla a hanua.
8“I atongi tana anuna na tena titol oros mang, ‘Di ka sang tar a ngasa na taulai, ika la ning ia ka atai nigon tar la, bel la tostos sur lar kes ana ngasa.
9Mulo han ana ngasla, pa esining mulor pasteki, mulor atai i mang ir han ute sur a ngasa.’
10Pa na tena titol oros la han uting na ngasla, pa la ben taum la rop ning la pastek la, na laulau a tarai pa wakak a taraila otleng, pa a ngasa na taulai i bukus ana wasirala.
11“Ika ning a king i kas sur ir oroi a tarai, i oroi tetek pas ning a barsan ning bel i mermer ana ta kaen a ngasa na taulai.
12Pa i dekeni mang, ‘Lak, u kas mangmangasa tar ute? Bel a num ta kaen na ngasa na taulai.’ A barsan ning bel i kelesi.
13Lamur a king i atai anuna na tena titol mang, ‘Mulor dot pas naur a hana pa naur a kuna pa mulor minggen purum seni utumo lapiu na mormorom. Di tangtangis pa di arngingit ngesendi tingia.’
14“Di ka kabah pas a galis, ika di aslang pas siklik tarai kama.”
15Lamur a Parisaiola la han taum tar, pa la warwara taum pas mang lar toh e Iesu sur ta warwara anunai, ning lar tiwi ono.
16La sune sen anunla kakak a asaerla taum ana halalna e Herot tetek e Iesu, pa la atongi mang, “Tena Asaer, mila tasmani mang u a tostos a barsan, pa u asaer a tarai ana ngas ane God ana momol. Bel u nuknuk kol ana sa ning a tarai la atongi hom, anasa a ginim i arlar ka tetek a tarai rop.
17Ur atai mila, asa a nuknukim? I tostos sur dir saran a totokom tetek a Sisar o bel?”
18Ika, e Iesu i tasmani mang, a nuknukinla i laulau, pa i atai la mang, “Mulo na tena asasongo, sur asa ning mulo mang sur mulor toho iau?
19Mulor asangan iau ana ta mani na totokom.” Pa la saran tar a mani tana.
20Pa i deken la mang, “A patar esi ne, pa a tumtumus ne ono anun esi?”
21La kelesi mang, “Anun a Sisar.” Pa i atai la mang, “Asa ning anuna Sisar, mulor sarani tetek a Sisar. Pa sa ning ane God, mulor sarani tetek e God.”
22Ning la longori, la kulkulan kol pa la han kusuni.
23Ana pukakiar ot ning a Sadusila, ning la sira puai ka mang bel ta lalaun ulak kusun a minat, la han tetek e Iesu, pa la dekeni mang,
24“Tena Asaer, e Moses i atongi mang, ning ta barsan ir mat pas kusun anuna hane, pa bel ta natundiau, e tasnalik ir ben pasi pa ir taulai ono, sur ir aitna tar al kakakla ana risana e tasnalik ning ka mat.
25Ning a kabaitas mais a barsan la, la kes na arpotor tamila. A ningnigona i taulai, pa i mat pas kusun anuna hane, pa bel ta natundiau. Pa a murmur tana maleng i taulai tana hane ning, pa i maleng i mat pas kusuni. Lamur a munatol a tasnalik maleng. Pa i larning tetek mais, la rop la taulai onoi, ika bel ta natun ta halinla.
27Pa lamur a hane maleng i mat.
28“Ana lalaun ulak kusun a minat, a hane ning, anun esi na halinla ma? Anasa la rop la ka taulai tari.”
29E Iesu i keles la mang, “Mulo rongo kol, anasa bel mulo tasman a Buk Tabu pa a rakrakai e God otleng.
30Ana lalaun ulak kusun a minat, bel ma lar taulai, lar arlar kama ana angelola saot na langit.
31Ika ning mulo puai mang a minatla bel lar laun ulak kusun a minat, mangmangasa, belot mulo was a warwara ning e God ka atong tari ta mulo? I atongi mang,
32‘Iau a God ane Abaram, a God ane Aisak pa a God ane Jekop.’ E God belsur a God ana minatla, i a God anunla ning la laun.”
33Ning a kunum a tarai la longori, la kulkulan kol ana nuna asaer.
34Ning a Parisaiola la longori mang, e Iesu ka wolot sot pas a Sadusila, la han taum teteki.
35Pa ning a halinla, a tena tastasmai ana warkurai, i tohi ana kabah mang,
36“Tena Asaer, esi na warkurai ning i itna kol tanla rop?”
37Pa i kelesi mang, “‘Ur mang sur anuma God a Leklek ana balam rop, a ingum rop, pa a nuknukim rop.’
38A warkurai ne i itna kol tanla rop, pa i a ningnigo na warkurai.
39Pa ine a munaur a warkurai, ning i arlar otleng larning, ‘Ur mang sur a halim larning u mang sur u ot.’
40Naur a warkurai ne, diau a kamkama warkurai rop ane Moses pa a asaerla anuna propetla.”
41Ning a Parisaiola la kes taum, e Iesu i deken la mang,
42“Asa ning mulo nuki ana Karisito? I a nat esi?” La kelesi mang, “A nat e Dewit.”
43E Iesu i atai la mang, “Manglarning, i mangasa a Talngan Tabu i nigon e Dewit pa i atong e Karisito mang ‘anuka Leklek’? Anasa e Dewit i atongi mang,
44‘A Leklek i atongi tetek anuka Leklek, “Ur kes te na sot a kuk, tuk ning ar tolsot pas anuma hiruala sur lar kes nahaim.” ’
45Ning e Dewit i atong a Karisito mang i anuna Leklek, ditamana mangmangasa?”
46Pa bel tik i nuk pas ta warwara ulak sur ir kelesi ono. Turpasi ana pukakiar ning, bel tik ulak ma i han teteki ana ta kabah, anasa la matmataut.
