1Ngen Joarwi kahlwahla Jesus nehn japwsoahn pwa en kajongjong ipen Jehsen.
2Mwerin ah joah mwinge rehn pahjek pel pwong pahjek, ih mwakohkohla.
3John Kajongjonngo indoa pwehng ih, “Ma koawoa nihn Koahs, pwehng sakai pwiai en wiahla pilahwa.”
4Jesus japoang, “Ne insingdi nehn puk joarwi: ‘Jaudi pilahwahr doari armaj kak mourki pwa lalkan ohroj ma kin indoa jang ipen Koahs.’”
5Jehsenno ukla ih nehn Jerusalem, kahnihmw joarwiho, kihdi oang ih pohn koadkoan Umw Joarwiho,
6pwehng ih, “Ma koawoa nihn Koahs, lujdihwe pwa ne insingdi nehn Puk Joarwi: ‘Ih pirin ruwoj nah sohnloanngok doahr koawoa, irai pirin pwoakkihda koawoa poahrai, pwa koawoa en joah darping.’”
7Jesus japoang ih, “Ne pel insingdi: ‘Joah kajongjongi Koaunno oamw Koahs.’”
8Jehsenno pel ukdahla ih pohn dol illoahioau, kajalehng ih wein jampah ohroj apel doahr ahr ling.
9Ih pwehng ih, “Mehpwiai ohroj ngoahi pirin kioang koawoa, ma koawoa rukdi pwongi ngoahi.”
10Jesus pwehng ih, “Alwe jang ngoahi, Jehsen! Pwa ne pel insingdi, ‘Pwongi Koaunno oamw Koahs, papah ih kalahpwuk.’”
11Doari Jehsenno injang ih, a sohnloanngok indoa jeuweje ih.
12Anjoauwo ma Jesus rongda pwa John no mine nehn kalpwuhj, ih pwurla Galilee.
13Ih joah koaujoan nehn Nazareth, ih inla wud mine Capernaum, ipen jed in Galilee, nehn wein Zebulun apel Naphtali.
14Me wiawi pwa en kapwaiahda kokohp en Isaiah:
15“Nehn wein Zebulun apel Naphtali, ipen jeddo, oaloap Pillap Jordan, nehn Galilee wija ma mihn likin dir mine!
16Armaj ma mine nehn ros pirin kapang maram koalik oau. Araihok ma mine nehn japw ros apel mehdi, marammo pirin dakarda.”
17Jang anjoauwo inla Jesus sapda padahk, “Wikjang dipamwai kan, pwa Wein nehnloannge no koaroando.”
18Rehn oau Jesus allaluhla pohn poahrinjedin Galilee ih kapangda riari oau, Simon ma pel adanki Peter apel riah Andrew. Ara loakloakjidki nihra ukko nehn jeddo, pwa ara sohnloakjid roahmen.
19Jesus pwehng ara, “Kamwa indoa pwilihla ngoahi, a ngoahi pirin wiahkihla kamwa sohnloakjidi armaj.”
20Anjoauwohr ara kihdi nihra ukko pwilihla ih.
21Pel aluhla ekij ih kapangda pel oau riari, James apel John, nihn Zebedee, mwindi nehn wararai pohsso pwili ara pahpa Zebedee, winwina nihrai ukkok. Ih pangin ara en pel indoa.
22Anjoauwohr ara kihdi pohsso apel ara pahpa, pwilihla ih.
23Jesus allaluhjili nehn Galilee ohroj, padpadahk nehn jinakoke kan, padpadahkki doahr Rongmwehuin Weiho, kemwehuwihla joangoan johmwehu ohroj ipen armaj kan.
24Rongin ih lel wija ohroj nehn Syria, armaj kan wahdohng ih ohroj ma johmwehuki joangjoangoan johmwehu, irai kan ma anki moadoak koalik, irai kan ma ngen jaus dilloang loaloa, pel irai kan ma anki epilepsi apel mwoasor—ih kemwehuwihla ohroj.
25Pokon koalik pwilihla ih wija ma ih inla—armaj jang Galilee, jang Decapolis, jang Jerusalem, jang ohroj Judea, apel jang palimese in Pillap Jordan.
