Matthew 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Jesus panginpene nah sohnpadahk eijek roahmenno, kioang irai manman en kajroahjang ngen jaus apel kemwehuwihla joangjoangoan johmwehu ohroj.

²Me ioar oadoan woaroak eijek roahmenno: Keiou Simon (ma pel adanki Peter) a riah jermweinno Andrew; James nihn Zebedee, apel riahu John;

³Philip apel Bartholomew; Thomas apel Matthew, johnrik daksis; James nihn Alphaeus, apel Thaddaeus;

⁴Simon mihn Canaan, apel Judas Iscariot, ma pangla Jesus.

⁵Sohnpadahk eijek roahmenno Jesus kadarla kioang irai kaweid pwiai: “Johpwa inla nehn pwungen mihn likin kan ke inla nehn koaujoan in mihn Samaria kan.

⁶A kamwai inlahng jihpw joaloanglahk ipen mihn Israel kan.

⁷Kamwai inla padahkki pwa: Wein nehnloannge no koaroan.

⁸Kemwehuwihla johmwehu kan, komourda min mehdi kan, kamwkelehda irai kan ma anki johmwehu lepa, kahuj jang ngen jaus kan. Doar amwai oaloa in joh dupkoa, Kamwai pel kihwei in joh dupkoa.

⁹Johpwa wa kohl, silper, ke kapa nehn amwai pwuko kan;

¹⁰johpwa wijik pehk nehn oamw jeiloak, ke joakid riau, ke ju ke jokon; pwa sohn doadoahk kan warroang oaloa dahkij arai anahne.

¹¹“Nehn amwai dilda nehn oau koaujoan ke koujapw, rapahkihda armaj men ma nimen kamwain mine nehn umwahn oaroh kamwai pwur.

¹²Nehn amwai en dilda nen umw oau, amwai rahnmwahu en doahroar me; popohl oang sohn ummwoauwe.

¹³Ma sohn ummwo kajamwo kamwai, amwai popohl en minmine iparai, a ma joah, amwai popohl en japaldohng kamwai.

¹⁴Ma mine umw oau ke koaujoan oau joah nimen kajamwo kamwai, ke rong amwai padahk, diljang wijahu jiped jang pwirejpar in pwoalkoamwai.

¹⁵Ngoahi pwehng kamwai pwa in mehlel, Rehn in Kadeikko Koahs pirin kajalehda ah kalahngan oang sohn Sodom apel Gomorrah koalik jang koaujoan pwiai.

¹⁶“Kamwai Rongmwehu ngoahi kadarwe kamwai doahroar jihppwi nehn pwungen wolf. Kamai uhdahn pirin kanaihoahng kamwai doahroar sinek kan apel maid doahroar mwurei kan.

¹⁷Kamwai mwajahn pwa armaj kan pirin joalihdi kamwai apel pangla kamwai mwohn mwoalen koapwung kan, apel poki kamwai nehn jinakoke kan.

¹⁸Pwa Ngoahi, kamwai nen wijikla mwohn koaun apel nahmwarki kan, pwa kamwai en kadehdehng irai apel mihn likin kan doahr Rongmwehu.

¹⁹Nehn irai pirin panglahng kamwai koapwung, kamwai joah pwunodki da kamwai pirin pwa, ke ia mwomwen amwai pirin pwa; nehn anjoauwo pirin lel, nen mweimweioang kamwai da kamwai pirin pwa.

²⁰Pwa lal kan ma kamwai pirin pwa jaudi amwai a Ngenin Jamamwaiho pirin kalallali kamwai.

²¹“Armaj pirin pangla riarai kan pwa en mehdi, pahpa kan pirin pangla nihrai jeri kan; Jeri kan pirin uhwoangda arai pahpa kan pwa irai en kojkojdi.

²²Armaj ohroj pirin lioassoang kamwai pwa ngoahi ma kahrehda, a emen ma pwojon lel imwin pirin mourla.

²³A ma kamwai koaloklok nehn oau koaujoan, kaulahng nehn oau koaujoan. Ngoahi pwehng kamwai in mehlel, kamwai nen johpwa koarjoahla koaujoan in Israel kan mwohn Nihn Armaj pirin pwurdo.

²⁴“Joh sohnpadahk men laplap jang ah johnpadahk: joh ludu men laplap jang ah koaun.

²⁵Sohnpadahk men en pel isarki en doahroarla ah johnpadahkko, apel luduhmen en pel doahrla ah koaunno. Ma moangoan peneinei oau poangpoanngki Beelzebul, ia woahr nauna in ad ma emen sohn peneineiho en poangpoanngki!

²⁶“Kamwai en joah mijik armaj. Me ohroj ma kin oakkoakla, uhdahn pirin janjalda, ke me rir ohroj pirin janjalda.

²⁷Da ma ngoahi pwehng kamwai in rir, kamwai en kajalehda nehn pokon janjal; a me ma ngoahi ngudngudkihoang kamwai, kamwai en pakairkihda pohn umw kan.

²⁸Johpwa mijik irai ma kak kojukdi palwahr a johkak kojukdi pali ngen. A mijik Ih ma kak koauwehla ara, ngen apel palwahr nehn ehl.

²⁹Send oau kamwai kak dupukda mahn siksik roahmen, a emen joh kak kipdi pohn pwirej likin koajoandi en Jamamwaiho.

³⁰A pel oang kamwai ohroj, pisen moangoamwai kan ohroj ne pel wadwaddi.

³¹A doar joah mijik; kamwai kajampwaljang mahn siksik dihrdir!

³²“Emen ma pohneje ngoahi mwohn armaj, ngoahi pel pirin pohneje ih mwohn Joamoaiho nehnloannge.

³³A emen ma kahmahmki ngoahi mwohn armaj, ngoahi pel pirin kahmahmki ih mwohn Joamoaiho nehnloannge.

³⁴“Johpwa lemleme pwa ngoahi indoahng wahdo moaloailoai pohn jampah. Ngoahi joah indoahng wahdo moaloailoai, a kodlaij.

³⁵Pwa ngoahi indoahng ukudla jermwein men en uhwoang jamah, jerpein men en uhwoang ah nohno, lihmen uhwoang inen pahioa.

³⁶En emen ah imwinsihsi pirin wia sowoa mehlel in nehn umwahu.

³⁷“Emen ma ipwilki jamah ke inah koalik jang ah ipwilki ngoahi johpwa warroang ngoahi; emen ma ipwilki nah jermwein ke jerpein koalik ah ipwilki ngoahi johpwa warroang ngoahi;

³⁸emen ma johpwa wahda ah lohpwu pwili ngoahi johpwa warroang ngoahi.

³⁹Emen ma nimen kolkol ah mour nen luhj jang, a emen ma luhj jang ah mour ki ngoahi nen kolkol ah mour.

⁴⁰“Emen ma kajamwo kamwai kin kajamwo ngoahi, a emen ma kajamwo ngoahi kin kajamwo ih ma kadardo ngoahi.

⁴¹Emen ma kajamwo johkohp en Koahs men pwa ih johkohp en Koahs men pirin oaloa kijakij in johkohp men, a emen ma kajamwo armaj pwung men pwa ih armaj pwung men pirin oaloa kijakij in armaj pwung men.

⁴²Ngoahi pwehng kamwai in mehlel, ma emen kioang mwoak in pil mwolou oau oang pwilioai siksik pwiai, ih nen uhdahn oaloa dupkoa.”