1Jesu e kesaic dâŋ mocwâc ʒuhuckerâ kecʒiŋuc muwec:
2“Sambâŋte kikefuŋ i ŋicwofuŋ moczi wiac ewec ira sâc hepe. Ŋicwofuŋ e ŋokâ‐ticne ŋokac râcneocte tiwâ bâzi sâko qame fisiwec.
3Iŋuc erâ kiŋaŋ motecfâcne sorec‐jopame jaŋe ŋic ʒâfo qanaŋ ejarekicne jowac‐jopaniŋte rambiŋ.
4Ra mupie qikiŋnepie ŋicwofuŋzi motec gâcne mocwâc jaza sorec ehuc muwec, ‘Ŋoŋe rarâ ŋic ʒâfo ejarekicne jazaniŋ: Manaŋgopieŋ, no tiwâ bâzi qape fisijec â bec bulimakao mupe hezu rikec embieŋ, ehuc wiac sasawa emoc bâmoc efârembieŋ, irec ŋoŋe warepie ŋic ŋokac bâturec‐jofahuc nâ ʒeri enʒepeneŋ.’
5Eme jaŋe rarâ iŋuc jazapie dâŋ mana takirehuc moc e gie‐ticnao rawec, moc e ŋicmanac rawec.
6Tucne jaŋe ine motec rocjoparâ râsi ejarehuc qâhâmoc‐jopambiŋ.
7Iŋuc epie ŋicwofuŋzi manarâ mana gâpârerâ momori ejareme jaŋe ʒika qaqa jopahuc hae‐jeŋic turuŋkepie ʒawec.
8“Eme ŋicwofuŋ e kiŋaŋ motec ʒiŋuc jazawec: ‘Tiwâ ʒepec i rike bâmoc ekicne, eme ʒâfo ejarekicne jaŋe takic‐jopame qikiŋneŋgopieŋte
9ŋoŋe bozene bozene rarâ bâfuac‐jopaniŋmu sâc rocjopapie warenʒepieŋ.’
10Mume motec jaŋe bozene bozene jufârehuc ŋic kosa, biaŋne mecne sâqocne mecne mâmâc amec‐jopapie fisirâ tutumaŋ fic fusucmarâ ŋembiŋ.
11Ŋehapie ŋicwofuŋzi honec‐jopaocte ferâ ŋic moc hombaŋ ŋaqi tâmiric ŋeme honewec;
12erâ ʒiŋuc âzâcnewec: ‘Âgo, go weniŋuc erâ hombaŋ ŋaqi tâmiric wefu ŋekomec?’ Mume ŋic e fâsâerâ ŋewec.
13Eme ŋicwofuŋzi motecfâcne jazarâ muwec, ‘Ŋoŋe me kikene qarâ duŋdapâc maŋko sârockepie huoc. Ira ki oowa ehuc mic kikiaric kihuc fozejec.’
14Hefârec‐jopakicnezi bocjaha, rowosâec‐jopakicnezi ine afecne.”
15Jesuzi iŋuc jazame farisaio jaŋe ficjeŋicko rarâ, dâŋzi bitiŋ moc weniŋuc bapene kizejec, muhuc dâŋ bâwosâembiŋ.
16Eku motecfâc‐jeŋic â Herodere ŋic tucne jaza sorec epie rarâ ʒiŋuc mumbiŋ: “Qaqazu, nâŋe gore fuŋne manaeŋgopeneŋ, go dâŋ burec mi ehuc jâmbomac jaha muekic, â mitire hata i fekicne wahakicne sâckoa nâzâ nâwotuc eekomec. Ehuc fekicne fosâoc‐jopahuc dâŋ mi muhasickeekomec.
17Irec wio‐garepene nâzâc: Sisa, takesi moneŋ râcneeŋgopeneŋ i manatec sâckekac me aricne?”
18Mupie maŋsioc‐jeŋic hone tararâ muwec, “Burecŋic, ŋoŋe wemocte dâŋzi bitiŋ banareŋgopieŋ?
19Ŋoŋe takesi moneŋ râeeŋgopieŋ i moc nowatupie honepe.” Mume 10 toea bâfuarâ jâutumbiŋ.
20Eme Jesuzi wio‐jare muwec, “Hawari â qâreŋ ʒi more?”
21Jaŋe mumbiŋ, “Sisare.” Iŋuc mupie jazawec, “Murâ Sisare biŋe i Sisa râcnenʒepieŋ, â Anuture biŋe i Anutu râcnenʒepieŋ.”
22Iŋuc muhuc jazame jaŋe wareckerâ beherâ rambiŋ.
23Ʒoaŋ gie bapa ijaha sadukaio ŋic jaŋe Jesurao fisimbiŋ. Ŋic i jaŋe, hâmockonec fafahare mi fokac, iŋuc muhuc jumbiŋ. Jaŋe hâcne fisirâ dâŋ moc wiocnembiŋ,
24ʒiŋuc muhuc: “Qaqazu, Mose e dâŋ kecʒiŋuc qâreŋkewec: ‘Ŋic moczi ɋâric tâmiric hâmome ɋanezi hozec‐ticne rozejec, ehuc hahac‐ticnere biŋe ɋâric bâfuazejec.’
25Eme ŋondeŋ‐nâŋecko hahac ɋa 7 jumbiŋ, ehuc mârâc hahac‐jeŋic ŋokac rorâ ɋâric tâmiric jurâ hâmome ɋanezi hozec‐ticne rowec.
26E iŋuc jaha hâmome ɋaticne moczi hozec ijaha rowec. Iŋuczi iŋuc eku hahac ɋa 7 jaŋe mâmâc hâmo‐fârembiŋ.
27Izi ʒâhec hozec‐jeŋic e wâc hâmowec.
28Eme jaŋe mâmâc sasawa ŋokac ijaha rombiŋte fafahare dameŋko more ezokac?”
29Mupie Jesuzi ʒiŋuc jazawec: “Ŋoŋe miti â Anutu tâpiri‐ticne kâuc bahuc dâŋ musifuckeŋgopieŋ.
30Fafahare dameŋko ŋic ŋokac roroc mocwâc mi enʒoŋgopieŋ. Jaŋe sambâŋ aŋelo iŋucne erâ mâc junʒoŋgopieŋ.
31Eme ŋoŋe fafaharere muŋgopieŋte ŋazape. Anutu e dâŋ kecʒiŋuc ŋazawec i ŋoŋe wose manac mi eeŋgopieŋ me?
32‘No Abraham â Isaka â Jakobo jaŋere Anutu.’ Ine hâcne, e hâmokicne jaŋere Anutu mâcne, e ɋâricne juju jaŋere Anutu.”
33Jesuzi dâŋ iŋuc mume ŋic ŋokac guru sâko jaŋe miti mumu‐ticnere manapie bipinehec ewec.
34Jesure dâŋzi sadukaio ŋic bâniniŋ‐jopawec, i farisaio jaŋe manarâ qâturerâ
35âgo‐jeŋic moc sâcmutâc mamana saric e ecnepie Jesu esâickehuc kecʒiŋuc muwec:
36“Qaqazu, sâcmutâc dâŋ wenimoizi qizecne sâko?”
37Mume Jesuzi ʒiŋuc âzâcnewec: “Go maŋge â qâqâtâcge â mamanasuge Wofuŋ Anutuge furu jaha qikiŋnecnetec fozejec.
38Dâŋ izi sâcmutâc dâŋ fârine â femicne.
39Erâ âgone moc fokac, jahe sâckoa ekopirec, ine kecʒiŋuc: Go gahacnere egareekac sâc ijaha âgogere egarezejec.
40Sâcmutâc i jahe hâcne Mose â porofete jaŋere dâŋ qâhâcke‐fârekopirec.”
41Farisaio ŋic qâturerâ juhapie Jesuzi mu indiŋ ejarerâ
42kecʒiŋuc muwec: “Ŋoŋe Kristore weniŋuc muŋgopieŋ, e more ɋâric?” Jaŋe mumbiŋ, “Dawidire.”
43Mupie Jesuzi jazawec, “Eme Dawidi e Mârozi ecneme weniŋucte Kristo ‘Wofuŋnane’ mucnewec? Kecʒiŋuc muhuctecne:
44‘Wofuŋzi nore Wofuŋ âzâcnewec, go ware fâre‐naneo ŋehaŋtec râsifâcge kikegere rurumaŋko guruc‐jopazepac’.
45Irec Dawidi e ‘Wofuŋ‐nane’ mucnewec, iŋucnezi weniŋuc erâ ɋâric‐ticne ekac?”
46Iŋuc muhuc wio‐jareme jaŋe dâŋ bâtikiecneniŋte efefeckembiŋ. Erâ ʒâhec mocwâc esâickeniŋte mi afeckembiŋ.
