Matius 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Yesus nala wanakunu naho'ok wali'ur hi na'aheni,

²“Lere Makromod Lalap nodi molollo ri mormori naho'ok naise wanakunu eniyeni: Rai ida hi'i anan mo'oni nina yapi hohoo.

³An hopon nina man howok enihe laa polu ri man lernala popolu lalariyala enihe, maa ramhene mai.

⁴Kame'ede an hopon nin man howok namehin na'ahenia, ‘Lam kunukunohi hi ma'aheni, “Ai mesnedi arpau noro sapiyana ida woro'o ma'akene namkenedi me'ede, lariyala.” ’

⁵Maa ri man lernala kunukunohi onnenihe kar peinohi de heruwali rala'a rira kirne, la heruwali laa ra'olu rira hahaa me'e.

⁶Enla namehin kele rai nina man howok onnenihe nukur la resnedi.

⁷Rai derne panaeku ma namwali onneni, an ma'ara wake'e de hopon nina ma nasala ke'urauk enihe laa enne resnedi ri man ailanna onnenihe la harnedi rira kote.

⁸Enla an konohi nina man howok na'ahenia, ‘Ha rahu na'akeme namkenedi me'e, maa ri man ya'u poluwedi onnenihe, kan wa'an polu wali'ur me'e.

⁹Ende mala'a kalla lapa leke moro inhoi-inhoi pakromo lariyala mai yapi eni.’

¹⁰Kame'ede hi rala'a me'e. Roro ri pakromo raka'uk, ri wawa'an noro ri ailanna, de onno man ra'akene yapi hohoo onne penuwedi me'e.

¹¹Rai lan po'onnala ri lalariyala onnenihe, an do'on ri ida nina nainair ka nakoknohiyala wake'e ri man laa yapi hohoo.

¹²Rai na'ukani ri onne na'ahenia, ‘I wal'u, hi'ihehewi mai raram lernohi yapi eni nair nainair man namehiyale?’ Maa ri onne ka na'oho wake'e.

¹³Enime'ede rai hopon nina man howok enihe kele ai wukuwedi liman ein la rodi laedi paharne laa noho momohon eni. Lolo onne rin lernala apinpinha wake'e la raherhere mamani.

¹⁴Makromod Lalap polu lariyala ri nammori, maa An nili ri tarana mehe ramwali Nin ri.”

¹⁵Ka nalo'ol ne, ri Parisi enihe laa rahinopun ra'ukani Yesus leke koko Ai wakunu sala.

¹⁶Hir hopon rira ri ida woro'o roro Herodes nin muku heruwali laa ra'ukani na'ahenia, “Pap Meser, ai mauroin Pape akin ma namdudu de wakuku panaeku ma namlolo mamani, la ai mauroin Pape wakuku hi'ihehewi Makromod Lalap nodi molollo ri mormori lernohi honorok panaeku ma namlolo. Enla Papa mamkene mehe derne Makromod Lalap, ri mormori ka, ono Om horhawa ma na'alehe haida-haida namnenehe noro orkanaru.

¹⁷Ende ai ma'ukaniyala Pape haida ke'e: Lernohi iknika agame nina holoor halauk, lo'o wa'an ik pair noho nin paipaire laa hair Roma nina rai lalap, ee ka?”

¹⁸Maa Yesus nauroinnaledi rira panaeku yake onne me'e, de na'aheni, “Eih! Ri man kokme'e mamwali ri molololo mi! Alhi'ihepeni mim ken kokwudi Ya'ue?

¹⁹Ken mala minim kupan modi lam pair noho nin paipaire onne I po'onale ke'e.” Hi rala kupan pere ida An po'on ne,

²⁰na'ukani, “Inhoi oin makan la inhoi naran melle kupan eniyeni?”

²¹Hir walhe, “Kaisar.” Ende Ai na'aheni, “Inhawe man Kaisar nina, mala Kaisar, la inhawa man Makromod Lalap Nina, mala Makromod Lalap.”

²²Hir derne Nina wanakunu eniyeni, hir mehe nanana mouwedi la rala'a me'e.

²³Lere onne me'ede, ri Saduki ida woro'o aile lolo onne haenhi. Heri Saduki onne rira honorok panaeku ri man makiyedi kar mori wali'ur. Hir mai Yesus ra'aheni, “Pap Meser, nonolu eni Musa hopon nahenia lo'o mo'oni ida ho, maa makiyedi na'alehe tatana, walin ho wali'ur orno onneni leke lernala tatana nahinerre walla man maki eni.

²⁵Enla nano mayai eni ri wo'ikku aile ma na'umo'oniwali. Anulu ho, maa makiyedi na'alehe tatana, penia maeke ho wali'ur walin leke lernala tatana nahinerre walla man maki eni,

²⁶maa walla onne maki wali'uredi. Panaeku eni namwali lolo ri wo'ikku onnenihe.

²⁷Man horue, maeke onne makiyedi haenhi.

²⁸Ende lere ri man makiyedi mori wali'ur, nano mo'oni wo'ikku enihe, inhoi namwali ai hono?”

²⁹Yesus walha hi na'ahenia, “Memen mim sala wake'e, ono ka mauroin Makromod Lalap Lirna Wawan noro Nina ke'eke'el an'anhe.

³⁰Rakan lere ri man makiyedi mori wali'ur, hir mori naise Makromod Lalap Nina hophopon a'am raram, de kar ho me'e.

³¹Enimaa lo'o kam lesale Makromod Lalap Lirna ma na'ono ‘ri man maki mori wali'ur’ makun. Ai na'aheni,

³²‘Ya amwali Makromod Lalap man Abraham, Isak, noro Yakup ra'ul'uli rasa'sa'a rakan lere eniyeni.’ Ri man makiyedi ka ra'uli rasa'a Makromod Lalap, maa ri man mori penia ra'uli rasa'e!”

³³Heri man derne onnenihe aki'aki ulla ono raram nodi rehi Ainina wanakuku eni.

³⁴Lere muku Parisi derne Yesus wakunu hi'i muku Saduki enihe ka rauroin wakunu me'e, hir lawuku,

³⁵la rir meser ida ma nauroin Makromod Lalap Nin keneri hono'ok wawa'an laa na'ukani Yesus leke kene.

³⁶Ai na'aheni, “Pap Meser, lolo Makromod Lalap Nina keneri hono'ok na'akeme, ewi penia ma na'ono narehi?”

³⁷Yesus walha hi na'ahenia, “Modi mi honorok akin, mi irhun raramne noro minim ruri pe'el na'akeme maramyaka Makromod Lalap ma namwali Makrommu.

³⁸Onne penia Makromod Lalap Nina keneri hono'ok ma na'ono la ma nolu!

³⁹Rewro'o nine namnenehe: Maramyaka minim ri mormori wali naise maramyaka mi kemmu.

⁴⁰Ende Makromod Lalap Nina keneri hono'ok na'akeme noro nabi rira wanakuku enihe, melle keneri hono'ok woro'o eniyeni.”

⁴¹Parisi enihe ka rahina'ar lolo onne makun, Yesus na'ukani hi,

⁴²“Menmelollo minim honorok panaeku, Mesias (Kristus) man Makromod Lalap kikan namwali Rai laa ewi-ewi onne inhoi ananne?” Hir walha, “Daud Anan.”

⁴³Ai na'ukani wali'ur na'ahenia, “Alhi'ihepe Daud napolu Ai onne, ‘Makrom'u,’ lere Roh Kudus nodi molollo aie? Lere onne Daud na'ahenia lolo Horok Lape,

⁴⁴‘Makromod Lalap ne'el i Makrom'u na'ahenia: Maikoro I her'u malanne hehen nanumene Ya'u hi'i Num arwali enihe lolo yawa ki O.’

⁴⁵Ende lo'o Daud napolu Ai ‘Makrom'u’, hi'ihehewi namwali anan mememen?”

⁴⁶Ri mahaku ka nauroin walha, la nano lere onne me'ede ri namka'uk na'ukani haida-haida Ai me'e.