1“Wein nehnloannge doahroar woal men ma inla inminjoang pwa ih en oaloa armaj in doadoahk nehn ah mwoaswelin wainno.
2Ih pwungkihoang irai pwa ih en dupuk irai doahloa oau rehn oau, ih kadarla irai en doadoahk nehn mwoaswelin wainno.
3Ih pwuroahng inla nehn wijahn noasnoasso kiloak duwoau minjoanngo, ih pel kapangda epwi armaj onohn mwahl joh me irai wia.
4Ih pel pwehng irai en inla doadoahk a ih en dupuk irai dahkij ma koanoahng.
5Irai ken inla. A ih pel pwuroahng inla kiloak eijek riau apel kiloak jiluh, ih pel wia joanngohr ma ih wia inminjoanngo.
6A injoausik, nimwennoar kiloak limoau ih pwuroahng inla wijahn noasnoasso, ih pel kapangda epwi armaj ma pel onnonohn mwahl. Ih idoak oang irai, ‘Amwda kamwai ke koauwehkihla amwai anjoau onnonohn mwahl, johpwa doadoahk rehn oauwe?’
7Irai japoang, ‘Pwa joh armaj nimen doadoahkki kamai.’ Woallo pwehng irai, ‘Kamwai inla pwili doadoahk nehn mwoaswelin wainno.’
8“Injoausikko woallo pwehng nah johnkouwahu, ‘Panginpene sohn doadoahk kan, koawoa dupukla irai, sapkihda irai ma indoa mwuhr kan oaroh lel arai kan ma sapin indoa.’
9Woal kan ma sapda doadoahk kiloak, emen oaloa doahloahioau.
10A anjoauwo ma irai ma sapda doadoahk mijoa indoahng oaloa dupkoarai, irai lemleme pwa irai nen oaloa koalik. A irai pel oaloa doahloahioau emen emen irai.
11Nehn irai oaloa dupkoaraihok, irai sapda lipahnedi joumwoasso pwa,
12‘Armaj pwiak doadoahk awa oauwoar, a kamai koakoahkla doadoahk pehn joauwo rehnnoauwe pokon pehn joauwo, a koawoa kioang kamai joangoan dopdop oauwoar!’
13Ih japoang emen irai, pwa, ‘Johpwa japwung oau ngoahi wiahng koawoa, kisa joah pwungkihpene pwa doahloahioau rehnnoau?
14Oaloa dupkoammwen, koawoa ken inla in umwoammwo. Pwa injenoai, ma ngoahi nimen dupukkoang irai ok ma indoa mwuhr doahroar oai dupuk oang koawoa.
15Imdoahr, Ngoahi joah anki pwungin doadoahkki pein noai mwanihkai oang pein injenoai? Ke koawoa pihrinki ki oai kadek?’”
16Jesus kadoarihkihla ah sikesik, pwa, “Armaj in mwuhr pirin mijoahla, a armaj in mijoa pirin mwerinla.”
17Nehn en Jesus allaluhdahlahng Jerusalem, ih kasohrohrihla nah sohnpadahk eijek roahmenno wijahkij nehn allo, ih pwehng irai,
18“Kamwai kidal pwa kisai allaluhdahlahng Jerusalem, wijahwa ma Nihn Armaj pirin likliklahng ipen jamwrou laplap apel johnpadahk kan in Kojonned. Irai pirin kadeikda ih pwa ih en kojkojdi.
19Irai pirin pangla ih ipen mihn likin kan ma pirin wiahla mihn kapis iparai, pwa en pokpok apel kalohpwuhla; in rehn kajiluh ih pirin iejda.”
20Doari, pahien Zebedee indoa ipen Jesus; pwilihkihla nah jermwein roahmenno, dairukdi mwohn ih, wia ah poakpoak.
21“Da koawoa anahne?” Jesus idoak. Liho japoang, “Inoauki oang ngoahi pwa noai jermwein roahmenne en pwili mwindi ipoamw in oamw loap moaun apel oamw loap meing nehn dohioammwo, ma koawoa pirin nahmwarkihla.”
22Jesus japoang ara, “Kamwa jehjoa pwa da kamwa poakpoakihen! Kamwa kak nim jang nehn mwoak in loklok ma ngoahi ne pirin ken nim?” Ara japoang, “kama kak.”
23“A doar mwehu kamwa pirin pwili nim nimoai mwoakke,” ih pwehng ara. “A joh oai oang pilda pwa inje pirin mwindi loap kidal apel loap jehjoa in ngoahi. Wijahpwiak no kileldi oang irai ok ma Joamoaiho no koaunopda.”
24Nehn en sohnpadahk eijekko rongda me, irai inenin lioas oang riariho.
25A Jesus panginpene irai ohroj, pwehng irai, “Kamwai kidal pwa nehn jampahioauwe koaun kan kin anki manman in koaunda sohn ahr wei kan, laplap kan ioar kin anki manman ohroj.
26A ih jehpirin doahr me ipamwai. Inje ma nimen laplap ioar ih pirin papah ohroj;
27a inje ma nimen keiou ioar ih pirin wiahla luduhn ohroj—
28doahroar Nihn Armaj, ma indoa jaudi armaj kan en papah, a ih en papah armaj kan apel sohnmesei kihdi ah mour pwa en dupukda armaj ngoadoar.”
29Nehn en Jesus apel nah sohnpadahkkok injang Jericho, pokon koalik oau kahuj mwerirai.
30Woal majkun roahmen mwindi imwin allo rongda pwa Jesus allaluhla wijahu, ara sapda rahrahu, “Maing, Koawoa ma nihn David! Jeuweje kama!”
31Pokonno woarwoarihda ara, pwehng ara en nennenla, a ara kapwa koalikla ara rahrahu, “Maing, nihn David! Jeuweje kama!”
32Jesus uhdi, pangin ara en indoa, “Da kamwa nimen ngoahi en wiahng kamwa?” Ih idoak ipara.
33Ara japoang, “Maing, kama nimen kapangda wija!”
34Jesus ipwilkihda ara, ih pukkoang mijarahk. Anjoauwohr ara ken kak kapang wija. Doar ara ken kahujla ih.
