1Nehn en Jesus kapangda pokonno, ih indahla pohn dol oau mwindi; nah sohnpadahkkok pokondo ipoa.
2Ih ken sapda padahkki irai pwa:
3“Meid pai irai kan ma anahne ngen, pwa arai pirin johjohki Wein nehnloannge.
4Meid pai irai kan ma joang, pwa Koahs pirin kainjenmwahuwihla irai.
5Meid pai irai kan ma aksiksik, pwa irai pirin johjohki jampah.
6Meid pai irai kan ma kin ngoangki me pwung, pwa Koahs pirin kaisarihla irai.
7Meid pai irai ma kin kadek, pwa irai pel pirin diar kadek.
8Meid pai irai ma mwakelkel nehn mohngiongirai, pwa irai pirin kapang Koahs.
9Meid pai irai ma kin wihwia doadoahk in kamwahu nehn pwungen armaj kan, pwa irai pirin adanki jerihn Koahs.
10Meid pai irai ma kin loklokki pwung jang in irai mohmohmourki Koahs, pwa irai pirin anki Wein nehnloannge.
11“Meid pai kamwai ma armaj lahlahwe, apel koalkoa kamwai, apel karaunihki kamwai joang likamw apel japwung ohroj pwa ngoahi.
12Kamwai injenmwahu apel malau pwa kijakij koalik joujouwi kamwai nehnloannge, pwa ioar pel joangwahr irai wiahng johkohppok mwohn kamwai.
13“Kamwai ioar jed in jampah. A ma nimen jeddo johla mine, joh mehkij kak en wiawihoang pwa en pwuroahng minehda mine. Johla kaspoan jeddo, ioarroar en kerpwihekla pwa armaj kan en alu puwoa.
14“Kamwai ioar maram in jampah. Kahnihmw oau ma mine pohn dol oau johkak oakkoakla.
15Armaj pel johkak okojda lahm oau kioang pehn pwohl oau. A irai en kioang pohn dohiahu pwa en kamarami ohroj nehn ummwo.
16En pel doahr amwai maram en janjalda mwohn armaj, pwa irai en kapang amwai wihwia mwehu kan apel kapngahki Jamamwai nehnloannge.
17“Joah lemleme pwa ngoahi indoahng koauwehla Kojonned in Moses ke pel padahk in Johkohppok; Ngoahi joah indoahng koauwehla arai padahk kan, a ngoahi indoahng kapwaiahda.
18Ngoahi pwehng kamwai in mehlel, ma nehnloannge apel jampah johla, insing siksik oau ke mwei siksik kij in Kojonneddo johkak joaloangla oaroh audoapoa ohroj en pwoaida.
19Emen ma koauwehla oau in kojonneddok, mihndar ma kojonnedwahr ma keiou siksik apel padahkihoang epwi en pel wia doahroar, pirin keiou siksik nehn Wein nehnloannge. A inje ma kin kapwaiahda apel padahkki kojonned pwiai pirin laplap nehn Wein nehnloannge.
20Ngoahi pwehng kamwai, ma amwai wihwia mwehu joah mwehu jang en johnpadahk in Kojonned apel Pharisee‑ok kamwai uhdahn johkak dilda nehn Wein nehnloannge.
21“Kamwai no rong padahkkok ma mihn mehjjok oaloa, ‘Joah kojukdi armaj; emen ma kojukdi armaj pirin lelloang kadeik.’
22A ngoahi pwehng kamwai: emen ma lioas oang riah pirin lelloang kadeik. Pel oau, emen ma pwehng riah, ‘Pweipwei men koawoa,’ pirin pel wijikla mwohn mwoalen koapwung. A emen ma pwa, ‘Koawoa Iahk!’ ih kak lel oang nehn keper in oaiho nehn ehl.
23Ma koawoa wia oamw meiroang in mwoallo a koawoa samanda pwa rioamw men injinjuwed oang koawoa,
24kihdi oamw meiroanngo ipen mwoallo. Inla koapwungla nehn pwungamwa, japahldo wia oamw meiroanngo.
25“Ma mine emen pirin wahlahng koawoa nen mwoalen koapwung, pispis koajnehdi nehn pwungamwa mwohn ah wahla koawoa ipen johnkoapwung kan, doar koawoa ken wijikla nehn kalpwuhj.
26Ngoahi pwehng koawoa in mehlel, koawoa johkak pisla oaroh ngehd koawoa en dupukla pwaipwanid ohroj.
27“Kamwai no rong padahk paso, ‘Joah kamwahl.’
28A apkas ngoahi pwehng kamwai emen ma kapang lihmen apel mwehukihda, ih no kamwahl nehn mohngiongin.
29Ma loap kidal kioang koawoa nen dihp, dipoaljang kerpwihla. Ma ekij in palwoaroamwen kerpwihekla mwehujang ma palwoaroamwen ohroj kerpwihekla nehn ehl.
30A ma loap kidal kahrehng koawoa en wia dihp, poaloahjang kerpwihla. Mwehuwoang koawoa en luhjjang ekij in palwoaroamwen jang palwoaroamwen ohroj en kerpwihekla nehn ehl.
31“Kamwai ne kidal da kojonneddo pwa, ‘Emen ma mweijang pahioahu en kioang ih kijinlikoau in kamweid.’
32A ngoahi pwehng kamwai, ma woalmen mweijang pahioa, jang in kahrpoahioau likin kamwahl, ih ne kahrehioang liho nehn kamwahl, a ma emen woal painkihda liho, ih ne mine nehn dipen kamwahl.
33“Kamwai no rong da ma no pweiekkoang mihn mehjjok. ‘Joah koauwehla oamw kahula, a kolkol oamw inoau oang Koaunno.’
34A ngoahi pwehng kamwai, Joah kahula mwahl. Joah kahukihla nehnloannge pwa ioar mwoalen Koahs wa.
35Joah pel kahukihla ke jampah pwa ioar dohn ehn wa; ke Jerusalem pwa ioar kahnihmw in Nahmwarki Laplap.
36Pel joah kahukihla moangoammwen, pwa koawoa johkak wiahng apas pisenmoang en korohrohla ke soalla.
37Amwai sikesik en kin mine in ‘Eh’ ke ‘Joah’; a ma dauhlihla a kin sapjang ipen me juweddo.
38“Kamwai ne pel rong pwa. ‘Pwoaroanmaj oau dupukki pwoaroanmaj oau, a ngihpas dupukki ngihpas.’
39A ngoahi pwehng kamwai, kamwai en Joah pallan armaj men. Ma emen pokihdi joapoamwen loap moaun, pel kioang ih oaloap.
40A ma emen panglahng koawoa mwoal en koapwung en kihjang oamw jehsso, pel kioang ih oamw joakidden.
41Ma emen ipong oang koawoa en alu ki mwail oau, a koawoa en pwili aluhkihla mwail riau.
42Ma emen poaki koawoa mehkij koawoa mweidoahng, ma emen poaki koawoa mehkij pwa ih en kajpahlihdo mwuhr pel mweidoahng.
43“Kamwai ne pel rong ih no pwa, ‘Ipwilki mihn ipoamw a lioassoang oamw imwinsihsi.’
44A ngoahi pwehng kamwai: Ipwilki amwai imwinsihsi kan apel kapkapki irai ma kin koalkoa kamwai,
45pwa kamwai en kak wia jerihn Jamamwaiho nehnloannge. Pwa Ih ma wiahng joauwo en dakda pohn me nauna apel pohn me mwehu, Ih kadardo wud pohn armaj pwung apel armaj japwung.
46Ma kamwai ipwilki irai ma ipwilki kamwai, kijakij dahioau kamwai nen oaloa? Johnrik daksis kan joah kin pel wia doahroar?
47Ma kamwai pel kajamwo rioamw kan oar doari, dahioau kamwai wia koalik jang epwi? Armaj rosros kan joah kin pel wia doahroar?
48Kamwai en unjek doahroar Jamamwaiho nehnloannge ma unjek.
