1Mwerin Sabbath, injohrehn in Rehn Joarwi, Mary mihn Magdala apel emen Mary inlahng kapang joaujoauwo.
2A nehn anjoauwohr jampah roarda; sohnloang en Koaunno men indihdo jang nehnloannge kasahpwroahjang sakaiho, ih mwindihoang puwoa.
3Mwomwe inenin ling, doahroar lingin joarom, ah likkoauwo korohro doahroar snoh.
4Jiloapoahk inenin jalohda dauluhl apel roarroarkihda arai majpwehkda, irai ken kipdihoang nehn pwirej doahroar armaj mehdihpwi.
5A sohnloanngo pwehng lihok, “amwa joah mijik, pwa ngoahi kidal pwa kamwa raprapahki Jesus ma kalohpwuhla.
6Ih joh me! Ih no iejda, doahroar ah pwehng kamwaiho. Kamwa indoa, kadehde wijahu ma ih neknekdi.
7A apkas, kama pispis alwe pwehng nah sohnpadahkkok pwa ‘Ih no iejda jang mehdi, ih pirin inla Galilee mijen kamwai. Ioar wijahwa ma kamwai pirin kapang ih.’ Kamwa samsaman da ma ngoahi pwehng kamwa.”
8Ara ken pispis pwurla jang in joaujoauwo, irai inenin majpwehk apel peren, ara kijkijoulahng pakair kioang sohnpadahkkok irair oauwe.
9A anjoauwohr Jesus uhda mijara pwehng ara “Popohl.” Ara sohla ipoa rukdi mwowoa koldi ehnnok pwongi ih.
10A Jesus pwehng irai, “Kamwa joah mijik, kamwa alwe pwehng rioaihok arai en inla Galilee, pwa ioar wijahwa ma kamai pirin suhpene.”
11Nehn en lihok ara kijkijoula ipen sohnpadahkkok, epwi johnpeihok ma jiljiloa joaujoauwo lelloang nehn kahnihmmwo pwa irai en pwehng jamwrou laplappok me ohroj ma wiawi
12Jamwrou laplap apel joumajjok pokopene pwa irai en wia lamlamki da ma pirin wiawi. Irai en kioang johnpeihok uwen mwani koalik oau.
13Irai pwehng johnpeihok, “Kamwai pirin pwa, ‘Nihn Jesus sohnpadahkkok indoa inpwonngo nehn amai moair pirapoahla palwahrro.’
14A ma koapina rongda, kamai pirin kadehde, a kamwai jehpirin perki mehkij.”
15Jiloapoahk oaloa nihrai mwanihok, irai wiahda doahroar ma jamwrouwok padahkihoang irai. Sikesik pase lohk jili ipen mihn Jew jang rehnno indoa lel rehnnoauwe.
16Sohnpadahk eijek emenno injang pohn dolin Galilee, wijahu Jesus pwehng irai en inlahng.
17Nehn irai kapangda Jesus wijahu, irai rukdi pwongi; a epwi irai pwen kahjikkoar kamehlele!
18Jesus sohdo iparai pwehng irai, “Manman ohroj nehnloannge apel jampah no liklikkoang ngoahi.
19Doari, kamwai alwe wija ohroj padahkihoang sohn wei kan ohroj; pwa irai en wiahla noai sohnpadahk: poapdaijihla irai in oadoan Koahs Jahm apel Nah apel Ngen Joarwi.
20Apel padahkihoang irai, ahr en peikkoang me ohroj ma ngoahi no koajnehdihoang kamwai. Doari, kamwai en kidal pwa ngoahi pirin pwilpwili kamwai anjoau ohroj lel in imwin kawa.”
