1Jesus doaudahng pohn pohsso jeila oaloap jeddo, nehn ah koaujoanno.
2Woalpwi wahdohng ih woal mwoasor men mine pohn rohp oau. Anjoauwo ma Jesus kapang arai pwojon, ih pwehng woal mwoasorro, “Koapwoarpwoar, noai jeri! Dipoamw kan no lapwda.”
3A epwi Johnpadahk in kojonneddok ma mine o lemlemehki pwa “Woal mene lahlahwe.”
4Jesus kidal arai lamlam, doar ih ken pwa, “Amwda kamwai ke lamlam nauna nehn mohngiongimwai kan?
5Ia minno moangoai, ngoahi en pwa, ‘Dipoamw kan ne lapwda,’ ke, ‘Uhda alu’?
6A ngoahi en kamehlele oang kamwai en kidal pwa Nihn Armaj anki manmanin mahkoahng dihp pohn jampah.” Ih pwehng woal mwoasorro, “Uhda, oaloa kioamwen koawoa inla nehn umwoammwo.”
7Woallo ken uhda inla in umwahu.
8Nehn en pokonno kapang me irai inenin majpwehkda; irai kapnga Koahs ma kioang armaj joangoan manman oauwo.
9En Jesus injang o nehn ah allaluhla, ih kapangda woal men, adanki Matthew, johnrik daksis, ma onnonohn nehn ah oahpisso. Jesus pwehng ih, “Pwilihla ngoahi.” Doar ih ken uhda pwilihla ih.
10Nehn en Jesus mwingmwinge nehn umwen Matthew‑o, johnrik daksis apel armaj dipan dir indoa pel mwinge pwili ih apel nah sohnpadahkkok.
11Pharisee pwi kapang me pwehng nah sohnpadahkkok, “Amwda amwai Johnpadahkken ke pwili johnrik daksis pel armaj dipan kan mwinge?”
12Nehn ah rongda me, Jesus pwa, “Jaudi armaj sihkei ioar anahne johnwini, a armaj johmwehu.
13Inla woahwoahkihda woahwoahn mehkije jang nehn Puk Joarwi: ‘Ngoahi mwehuki kadek, jaudi meiroangin mahn.’ Ngoahi joah indoahng pangin armaj pwung, a armaj dipan kan.”
14Doar nihn John Johnpoapdaij sohnpadahkkok indoa idoak oang Jesus, “Amwda kamai apel Pharisee‑ok kin dod amai kaijihjol a nihmw sohnpadahk kan ken johkin kaijihjol?”
15Jesus japoang, “Imdoahr nihn woallo ma pirin koapoapwoaud sohnkaparrok en injinjuwed ma ih minmine iparai? A oau anjoau ma pirin indoa ma woal kamwohddo pirin wijik jang irai; doari, ioar anjoauwo irai pirin kaijihjol.
16“Joh armaj kin doahng dipwin likkoau kapw kij in likkoau dehn oau, pwa dipwin likkoau kappwo nen pworpene doapwdoapwjang in likkoau merinngo, nehn kakloakihla soahroakko.
17Joh armaj kin widekihoang wain kapw nehn dohn wain dehn. Pwa dohn wainno nen pwokpijoang, wainno widekla, dohn wainno ohla. Wain kapw en widekihoang nehn dohn wain kapw, a kapwa nekdekla.”
18Nehn ah pwahpwahpwa me, koaunin mihn Jew men indoa poadpwomwla mwohn Jesus pwehng ih, “Noai jerpeinno kapwehsen mehdi. A indoa kioang poahmmwen puwoa, pwa ih en mourda.”
19Jesus uhda pwilihla ih, pwilihki nah sohnpadahkkok.
20Anjoauwo lihmen ma johmwehuki insa koarkoar johnpar eijek riau indoa likinjarkin pukkoangdi imwin ah likkoauwo.
21Liho pwehng pein ih, “Ma ngoahi pwen kodurroar ah likkoauwo, ngoahi nen mwehula.”
22Jesus jipwella pwehng ih, “Koapwoarpwoar, noai jerpein, oamw pwojon ne kasihkeida koawoa.” Liho mwehula anjoauwohr.
23Anjoauwo ma Jesus dilda nehn umwen koaunno ih kapang johnkoajoanngok apel armaj kan loakloakoa,
24ih pwehng irai, “Kamwai dilla, jerpeinne johpwa mehdi, a ih moair.” A irai uruhrki ih.
25Mwerin armajjok dilla, ih dilla loaloa koldi poahn jerpeinno, ih pwohrda.
26Rong oauwe lohk pijoang nehn wija ohroj.
27Jesus daudauluhlla jang wijahu, woal majkun roahmen kahujla ih, poangpoang, “Mahkoahng kama, nihn David!”
28Nehn ah no dilda nehn umw, woal majkunnok indoa ipoa, a ih peidek oang ara, “Kamwa kamehlele pwa ngoahi kak kemwehuwihla kamwa? “Eh, Koaun,” ira japoang.
29Doar ih jair mijara pwa, “Me en wiawi jang in amwa pwojon;”
30ira pwuroahng kapangda wija. Jesus pwehng ira, “Kapang pwa johpwa emen en kidal mehkije.”
31A ira inla likin kalohkihjili wijahu ohroj.
32Nehn ara allaluhla, woal loahsoang men ma ngen jaus dilingla ih wijikdohng Jesus.
33Anjoauwo ma ngen jausso diljang ipoa, woal loahsoanngo lallalda. Pokonno inenin pwuriamwei pwa, “Kahjikkoar mehkij doahre wiawi nehn Israel.”
34A Pharisee‑ok pwa, “Koaunin ngen jaus kan ma kioang Jesus manman in kajroahjang ngen jaus.”
35Jesus allaluhjili nehn kahnihmw apel koujapw ohroj, padpadahk nehn jinakoke kan, padpadahkki doahr rongmwehuin Weiho, kemwehuwihla joangoan johmwehu ohroj ipen armaj kan.
36Nehn ah kapang pokonno, ih ipwilkihda irai, pwa ara injinjuwed apel joh jauwajparai, doahr jihpw ma ne joh jileperai.
37Doar ih pwehng nah sohnpadahkkok, “Roakke koalik a sohn doadoahk jipid.
38Poaki koaun in roakke en kadardo sohn doadoahk dir pwa en doadoahk nehn mwoaswello.”
